Plattdeutsche Nachrichten Plattdüütsche Narichten vun'n 30. April 2024

Gewarkschuppen foddert högeren Minnestlohn

Berlin – Dat Ropen na een högeren gesettlich Minnestlohn ward mehr. Verdi Baas Werneke un de Grönen in’n Bunnesdag hebbt sik dat Foddern ansluten. DGB-Böverste Fahimi hett in’n Morrnmagazin vun ARD un ZDF op een nee’e EU-Richtlien henwiesen. Darna schall de Minnestlohn bi 60 Perzent vun’t so nöömte Median-Inkamen liggen – dat wöörn nu all rund 14 Euro, vermellt Fahimi. Verdi-Baas Werneke hett all een Minnstlohn vun 15 Euro bit 2026 foddert.

G7 eenigt sik op Utstieg ut de Köhlen bit 2035

Turin – De G7-Staaten hebbt sik in’n Groden un Ganzen op een Utstieg ut de Köhlen bit 2035 verstännigt. Dat Bunneswertschuppsministerium hett all vermellt, dat stimmt. Se sünd sik eenig worrn bi’n Drepen vun de Ümwelt- un Klimaministerinnen un –minister vun de söben groden westlich Industrienatschonen. Dütschland harr een Utstieg bit 2038 besluten. De Ampelkoalitschon will, wenn’t geiht, bit 2030 rut ut de Köhlen.

Bremens letztet Köhlenkraftwark geiht vun’t Nett

Bremen – Dat letzte Köhlenkraftwark in’t Land is vun’t Nett gahn. Mit dat Drücken op een Knoop hebbt de Vörstandsbaas vun’n Bedriever swb, Schneiker un Bremens Börgermeister Bovenschulte den so nöömten Block 15 in Hastedt afschalt. Energie ward dar wieter maakt, man mit nich mehr so veel Utstötten vun CO2: in een Blockheizkraftwark, dat mit Gas bedrieven ward.

Se snackt över de Problems an de Robinsbalje

Bremen – Minschen ut dat Quarteer in Huchting un Vertreder vun de Ämters snackt över de Probleem-Wahnungen in de Straat Robinsbalje. De Lüüd, de in twee rünnerkamen Wahnblocks leevt, hebbt siet Weken keen Heizung, wiel Reknungen nich betahlt worrn sünd. Woans de Stadt de Hüerslüüd helpen will, is noch nicht klaar. Een Gesett gifft den Ämters siet verleden Johr mehr Schangsen gegen Vermeder vörtogahn, de sik nich mehr üm ehr Hüüs scheert.

Seenootredder söökt na Minschen, de misst ward

Cuxhaben – In de Dütsche Bucht söökt Seenootredder siet güstern Abend na twee Lüüd. Een Mann weer in een Slauchboot ünnerwegens, vermellt de Dütsche Gesellschupp to’n Redden vun Lüüd, de Mallör mit een Schipp hebbt. Dat Slauchboot is twüschen Helgoland un Cuxhaven funnen worrn, mit nümms mehr binnen. Buterdem is een Segler as misst mellt worrn. Sien Boot is an’n Morrn nördlich vun Amrum funnen worrn un weer ok leer.

Dat Weer

Un nu een Blick op dat Weer: op Wangerooge 12, in Deefholt 16, in Bremerhaben 17 un in Bremen sünd dat opstunns 18 Graad. Vundaag wesselt sik Sünnschien un Wulken af un dat kann ok mal verenkelt Schuers or Grummelschuers geven. Man faken geiht de Dag fründlich un dröög to Enn – bi 21 bit 24 Graad, op de Eilanden bi 16 bit 21 Graad. Tokamen Nacht is dat meist locker wulkig or klar un dröög. Dat Thermometer sackt op 13 bit 11 Graad. Morrn lacht de Sünn vun’n Heben bi blots een paar lichten Wulken. Darto ward dat orrig warm bi 24 bit 27 Graad, op de Eilanden un an de Küst bi 18 bit 23 Graad. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.