Plattdeutsche Nachrichten Plattdüütsche Narichten vun'n 29. April 2024

Anfangen mit Perzess gegen Reichsbörger-Nettwark

Stuttgart: De Perzess üm dat womöögliche Reichsbörger-Nettwark „Grupp Reuß“ hett anfungen. Vör´t Brett staht 9 Mannslüüd, se schüllt eenen Staatsstriek plaant hebben. Man smitt jem Hochverraad vör, un dat se in eene terroristische Verenigung sünd. Dat is de eerste, vun all tosamen dree Perzessen, de anstaht. Luut Staatsanwaltschaft höört, to dat Nettwark vun den Geschäftsmann Heinrich Prinz Reuß, 27 Personen daarto.

Minister för Justiz Buschmann rekent mit wietere Spionage-Verraden

Berlin: Minister för Justiz Buschmann rekent dormit, dat man wietere Spionage-Fallen in Düütschland opflegen laten kann. Buschmann seggt in de ARD, dat dat scharpe Angahn gegen eenen Mitarbeider, vun den AFD-Politiker Maximilian Krah, woll keen enkelten Fall is. Na Ansicht vun den FDP-Politiker is Düütschland all länger in´t Fokus vun verschede autoritäre Mächte. Ok hebbt se eenen Ex-Mitarbeider vun Krah dorvör fastnohmen, man smitt em Spionage för China för.

Söken na sössjöhrigen Jungen ut Bremführ geiht wieter

Bremführ: Dat Söken na den sössjöhrigen Arian geiht ok hütt wieter. De Jungen is nu all siet eene Week verswunnen. Eene Sprekerin vun de Polizei seggt, dat man jümmers noch Höpen hett, dat man den Jungen lebennig finnen kann. De Hölpers harrn an´t Avend ehren Groot-Insatz, bi dat Söken na den Jungen, eerst mal instellt, wiel dat denn to düüster weer. Rund 1200 Hölpslüüd hebbt versöökt Arian to finnen.

Bahnstreek twischen Nordenham un Bremen loppt wedder

Elsfleth: Hütt willt se de Bahnstreek twischen Nordenham un Bremen wedder so richtig free geven. Ok de Minister för Wirtschaft vun Neddersassen Olaf Lies will dorbi wesen. In de verleden Weken hett man eene Behölpsbrüch över de Hunte boot. De egentliche Brüch hebbt se afreten, denn in´t Februar is een Binnenschipp gegen den Pieler vun de Isenbahnbrüch stött. De Nordwestbahn will övermorgen wedder mit den Isenbahnverkehr na Plaan losleggen.

Darmstadt eerste Afstieger ut Football-Bundesliga

Darmstadt: Na een Johr in de Football-Bundesliga steiht de SV Darmstadt 98 as erste Afstieger fast. De Club hett an´t Avend to Huus gegen Heidenheim mit 0 to 1 eenen op de Mütz kregen. Dorvör harr Mainz gegen Köln 1:1 speelt. Un in de Partie Mönchengladbach gegen Union Berlin hett dat heel keene Tore geven.

Dat Weer

Un nu een Blick op dat Weer: In Bremen 9, in Rotenborg 10, in Cuxhaben un in Bremerhaben sünd dat opstünns 9 Graad. Hütt lacht us de Sünn den ganzen Dag an, later kummt in´t Binnenland een paar opstiegende Wulken op. Man dat blifft fründlich un dröge, bi 17 bit 21 Graad. Tokamen Nacht kummt mehr un mehr Wulken op. Vun´t Emsland, över Bremen bit to dat Ole Land sünd een paar Schuers mööglich, bi 13 bit 10 Graad. Morrn treckt de Wulkenfeller ut de Nacht över de Nordsee af un de Sünn kummt rut. An´t Nomdag wesselt sik de Sünn un de Quellwulken af und at kann hier un dor Schuers geven. Ok mit Blitz un Dunnerslag. De Temperaturen liggt bi 16 bit 25 Graad. Middeweeken schient meist den ganzen Dag de Sünn. Blots in de Richt vun de Graaftkupp Bentheim kann dat mal af un an Schuers un Gewidder geven, bi 17 bit 28 Graad. Dat weren de Narichten op Platt. Tohoopstellt hett se Michael Kück. Trechtmaakt un vörleest vun Antje Kruppa.