Plattdeutsche Nachrichten Plattdüütsche Narichten vun'n 3. Mai 2024

Bunnsregerung: De russsche Militärgeheemdeenst stickt achter Internett-Attack op SPD

Adelaide: De Bunnsregerung seggt: Achter de Internett-Attack op de SPD verleden Johr stickt de russsche Militärgeheemdeenst. Dat hett Butenministersch Anna-Lena Baerbock bi ehren Australien-Törn anseggt. Se hebbt allens an den Fall unnersöcht, un unner’n Streek is de Saak kloor. Baerbock hett ok meent: Dor kummt wat na. Wat dat ween kunn, hett se nich seggt.

Törkei: Kenn Hannel mehr mit Israel

Ankara: De Törkei hett den Hannel mit Israel op Null sett. Wat dor achter stickt, is de Krieg in’t Gazaland. Dat törksche Hannelsministerium sä: Mit Israel warrt se eerst wedder hanneln, wenn de Regerung dor ahn Wenn un Aver Hölp för de Minschen in’t Gazaland rinlett. De israelsche Butenminister Israel Katz weer vergrellt.

Ministerien liggt woll wiet över dat, wat Finanzminister Lindner jem opgeven harr

Berlin: Dat lett: En Reeg Ministerien is över dat weggahn, wat Finanzminister Christian Lindner jem opgeven harr. So hett de Spiegel to weten kregen: Dat Entwicklungsministerium bruukt twee Milliarden mehr as dat, wat jem na Lindner tosteiht. Ok in‘t Butenministerium wüllt se för tokamen Johr mehr Geld. De Ministerien schullen güstern jümehren Plaan för de Utgaven 2025 op’n Disch leggen.

Gröne in Bremerhaven verlangt: Kene Autos mehr dör de Stadt transporteren

Bremerhaven: De Grönen verlangt: Autos schüllt nich mehr dör de Stadt transporteert warrn. De Grönen-Politiker Ralf-Rüdiger Heinrich hett de BLG en Protestbreef tostüert. He is dor nich mit inverstahn, dat dusende Wagen, de nich foorts mit Scheep wegbröcht warrt, dat de nu al Maanden lang op en Streek in den Süden vun de Stadt afstellt sünd. Vun dor fohrt se de Autos denn mit Lastwagen dör de Stadt – un dat weer gor nich goot för de Gesundheit un de Umwelt, bekriddelt Heinrich.

Senaatsfier för Fishtown Pinguins

Bremen: In’t Raathuus steiht vunnamiddag en Senaatsfier för de Fishtown Pinguins an. De harrn dat bet in de Endspele um de düütsche Ieshockey-Meisterschap schafft. So wiet weer de Vereen vörher noch nienich kamen. Börgermester Andreas Bovenschulte, Sportsenater Ulrich Mäurer un Bremerhavens Oberbörgermester Melf Grantz warrt de Kru för den tweten Platz in de Meisterschap hoochleven laten.

Dat Weer

Un woans süht dat mit dat Weer umto ut? Opstunns hebbt wi in Bremerhaven un Cloppenborg 15 Graad, in Bremen sünd dat 16 un in Weyerbarg 18 Graad.

Vundaag treckt vun’t Emsland un Ollenborger Mönsterland mehr un mehr Wulken rin. Achteran kann dat pladdern, hier un dor ok mit Blitz un Dunnerslag. Twüschendör waagt sik aver ok mal de Sunn rut, un dat kann ok heel un deel dröög blieven. An’n Avend wedder fründlicher un dröög. Dat Thermometer krabbelt op 16 bet 21 Graad an’n Vörmiddag, an’n Namiddag meist nich mehr as 15 Graad. De Wind weiht flau, later en beten mehr, he dreiht bet Middag op Süüdwest. Tokamen Nacht lööst sik de restlichen Wulken op. Na Middernacht blenkert de Steerns oder an’n Heven versammelt sik blots en ganz poor Wulken. Dröög bi 10 bet 7 Graad. Morgen: Mal Sunnschien, mal ok en Handvull Wulken. Vun Middag op an ballt sik de eersten opstiegen Wulken tohoop, un süüdlich vun Bremen kann dat an’n Namiddag ok pladdern. Dat Ganze bi 16 bet 20 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Irene Lottes.