Plattdeutsche Nachrichten Plattdüütsche Narichten vun'n 19. Juli 2024
Standdatum: 19. Juli 2024.
Plattdüütsche Narichten vun'n 19. Juli 2024
Informationen zum Audio
- Verfügbar bis: 19. Juli 2025 Informationen zur Verweildauer
Kummer mit Computer – Fleger fleegt nich
Hamborg: Computers överall op de Welt loopt mit Maleschen. In Düütschland is de Bedriev op de Flegerhavens Hamborg un Berlin för en Tietlang op Null ween. In anner Länner kunnen ok Banken, Krankenhüüs un Inkoopsgeschäften nich orntlich arbeiden. Medien meent: Dat kunn an en Programm-Update vun de IT-Sekerheitsfirma Crowdstrike liggen. De Fehler hett sik ok utwirkt op de Software vun Microsoft.
Trump nimmt Posten as Präsidenten-Kandidaat an
Milwaukee: Donald Trump hett sien Posten as Präsidenten-Kandidaat för de US-Republikaners annahmen. Op den Parteidag sä de Mann vun 78 Johr, he will en Präsident ween för ganz Amerika. Striet un een gegen den annern in de Gesellschap – dat müss en Enn hebben. Dat weer Trump sien eerste Reed in de Öffentlichkeit, sietdem dat op em schaten worrn weer. De fröhere Präsident weer an’t Ohr drapen worrn.
Faeser seggt an: Grenzen na Frankriek kontrulleren
Berlin: Vun morgen op an schall de Grenz na Frankriek eerstmal wedder kontrulleert warrn. Dat hett Bunnsbinnenministersch Faeser fastleggt. Dor achter steekt de Olympischen Spelen in Paris. In ene Week gaht de los. Kontrulleren wüllt se nich blots an de Lannsgrenz, man ok op de Flegerhavens. Dor wüllt se aver blots op’n Punkt un mal um mal Kontrullen maken. Al bi de Football-Europameisterschap harrn se an de düütschen Grenzen wat strenger henkeken.
Gootachten över de Meyer Warft seggt an: Geld vun Bund un Land oder nich
Papenborg: En Fachmann vun buten leggt vundaag en Gootachten to de Meyer Warft vör, de wegen to wenig Geld in de Kniep is. Dat hett de NDR to weten kregen. Bavenan steiht de Fraag: Kann de Warft sülvst ut de Bredullje rutkamen? Un: Kann Meyer mit anner Warften noch mitholen. So oder so: Dat Gootachten gifft den Kurs dorför vör, wat dat Land Neddersassen un de Bund Geld geevt, um Meyer wedder op de Been to bringen.
Mann vun Windkraftanlaag haalt
Wanna: De Höhenretters vun de Füerwehr Bremerhaven hebbt in den Kreis Cuxhaven en Mann vun en Windanlaag daalhaalt. 60 Meter över Grund harr sik de Mann vun en Wartungsbedriev sien Foot inklemmt – in dat Maschinenhuus vun de Anlaag, dicht bi en Rotor. De Füerwehr seggt: Se hebbt eerst technische Utrüstung op de Anlaag bringen musst. Denn eerst hebbt se den Mann vun 23 Johr freekregen un na unnen brocht. Achteran is he na’t Krankenhuus kamen.
Dat Weer
Un woans süht dat mit dat Weer umto ut? Opstunns hebbt wi in Bremerhaven, Friesaythe un Weyerbarg 21 Graad, in Bremen sünd dat 22 Graad. Vundaag: Eerst nix as Sunnschien. An’n Namiddag un Avend treckt vun’t Ossenbrügger Land lockere Wulken op. Dat blifft aver dröög. Dat Thermometer krabbelt op 28 bet 30 Graad. Op de Inseln un an de See 23 bet 27 Graad. De Wind dorto weiht flau vun de oosten Kant. An de Küst ok en beten mehr un mit Böen, an’n Namiddag dreiht he op Noordoost. Tokamen Nacht: Steernenkloor oder en poor Wulken, dröög. Süüdlich vun Bremen en poor mehr Wulken. Bi 19 bet 15 Graad. Morgen: Eerst Sunnschien, denn kaamt opstiegen Wulken dorto. Dat blifft aver hell un dröög. An’n Avend kaamt denn aver doch noch vun’t Emsland her Schuer un Gewidder ran. Dat Ganze bi bruttige 30 bet 33 Graad, an de See 26 bet 29 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.