Plattdeutsche Nachrichten Plattdüütsche Narichten vun'n 11. April 2025

Ukraine-Kuntaktgrupp snackt över wiedere Hölp

London: Grootbritannien hett en nee´et Militärpakeet för de Ukraine in Utsicht stellt. Na dat britsche Ministerium för Verdeffenderen schall Kiew Radorsystemen, Panzerafwehrminen un hunnertdusende Drohnen in en Gesamtweert vun mehr as 500 Millioon Euro kriegen. De Regeern in London överleggt ok, in den Fall vun en Wapenstillstand Truppen in de Ukraine to schicken. Wo dat nip un nau utsehen schall will de Minister för´t Verdeffenderen John Healey bi dat Drepen de Ukraine-Kuntaktgrupp in Brüssel, de siet hüüt Vörmiddag löppt, vörstellen.

Trump löövt EU-Politik in den Tollstriet

Washington: US-Präsident Trump is dormit inverstahn, dat eerstmal opgeven warrt, wiedere Töll op Produkten ut de Vereenigten Staaten to nehmen. Dat is en kloken Schritt, vunwegen de EU torecht wesen weer Gegenslääg to maken, hett aver anners as China, sik torüchhalen, see Trump. För China gellen middelwiel Tollopslääg vun 145 Perzent. För veel anner Staaten hett Trump künnig maakt, en Grootdeel vun de nee´n Sonnertöll för dree Maand to stoppen.

Bunnsraat snackt över kommunale Ooltschullen un Wülv

Berlin: De Bunnsraat befaat sik hüüt Vörmiddag mit en Grundgesettännerung, dorbi künnt de Bund utnahmswies un eenmalig Schullen vun den Kommunen övernehmen. Ok Bremen un Bremerhoben künnt dorvun profiteren. Dat Land hett al vör fief Johren de Schullen vun sien twee Städern övernahmen un künnt nu en Deel dorvun wedder kriegen. Man ok över de Situatschoon vun Wülv warrt in den Bunnsraat snackt. Meckelnbörg-Vörpommern un Brannenborg verlangt, dat de Bund sik in de EU dorför insett, Wölv lichter doot to maken.

Bremer Lannskriminalamt befraagt Minschen wo seker se sik föhlt

Bremen: Dat Lannskriminalamt Bremen will in de tokamen Weken knapp 30.000 Minschen in dat Bunnsland to dat Thema Sekerheit befraagen. De Polizei will weten, wo seker sik de Minschen in Bremen un Bremerhoben föhlt. De Ümfraag geiht dorop rut, of de Minschen an bestimmten Öörd mulmig warrt un se de dorüm miedt. Fraagt warrt tofällig utwählt Minschen, de en Fraagbagen per Post kriegt.

Fährlinie Bremerhoben-Helgoland föhrt wedder

Bremerhoben: Vun hüüt af an gifft dat wedder an den Wekenenn en Fährlinie twuschen Bremerhoben un Helgoland. Na de Reederei Cassen Eils warrt de „Fair Lady“ freedags, sünnavends un sünndags vun de Seebäderkaje ut na Helgoland föhren. Bet to 800 Fohrgäst köönt je Fohrt op de Hoochseeinsel kamen, se duert meist dree Stünnen. De letzte Fohrt weer vör söss Johren.

Dat Weer

Un nu kiekt wi op dat Weer: In Möppen hebbt wi söven Graad, in Bremen, Bremerhoben un Emm sünd dat opstunns överall acht Graad. Hüüt sünd meist dicke Wulken vun dat Elv-Werser-Dreeeck bet hen na dat Oole Land ünnerwegens un köönt ok en poor Druppen bringen. Süüdwestlich dorvun lacht de Sünn blangenbi lütte opstiegen Wulken. Dat warrt en beten warmer bi veerteihn bet achteihn Graad in´t Binnenland un ölven bet darteihn Graad an de Küst. In de Nacht blifft dat dröög, meist sünd blots en poor Wulken an Heven, Daak is aver ok wedder dorbi un dat bi acht bet söven Graad op de Eilannen un fief bet veer Graad in´t Binnenland. Sünndag wesseln sik Wulken un Sünn af, man ok Schuers un Gewidder mischen mit, dat Thermometer wiest us fofteihn bet twintig Graad.

Dat weren de Plattdüütschen Narichten. Tohoopstellt vun Anja Guse. Op platt torechtmaakt un vörleest vun Martina Brünjes.