Plattdeutsche Nachrichten Plattdüütsche Narichten vun'n 26. September 2024

Ok de Vörstand vun de Grönen Jungen Lüüd maakt nich wieder

Berlin: Eerst harrn de Liddmaten vun den Bunnsvörstand vun de Grönen seggt, se gaht ut jemehr Amt rut. Nu wüllt ok de Top-Lüüd vun de Jungen Lüüd nich wiedermaken. Bavento wüllt se ut de Partei rutgahn. In en Breef heet dat, se wüllt en „neen, kloor linken Verband vun junge Lüüd“ op de Been stellen. Dat se ut de Partei rutgaht, harrn se al in de verleden Weken besnackt. Dat weer also vör de Tiet, as de Grönen-Bunnsvörstand anseggt hett, dat he nich wiedermaakt. Güstern harr de hele Parteivörstand mit de beiden Vörsitters Omid Nouripour un Ricarda Lang bekannt maakt: In’n November gaht se ut jemehr Amt rut.

USA un Frankriek wüllt: Keen Scheten mehr in den Libanon

Nee York: Wo de UN-Generaalversammeln jüst löppt, sett sik Frankriek un de USA dorför in, dat dat Scheten in den Libanon för dree Weken ophöört. Ok UN-Generaalsekretär António Guterres hett sik dorför stark maakt. Noch mal hett he sik an all richt, de dor jemehr Fingern in’t Speel hebbt, richt un seggt, se schullen dor en P vörsetten, dat de hele Levante anfangt to brennen. De Libanon stünn hart an de Kant. Frankriek un de USA wüllt, dat in de dree Weken mit Israel un de Hisbollah verhannelt warrt.

Selenskyj will sien Fredensplaan vörstellen

Washington: De ukrainsche Präsident Wolodymyr Selenskyj besöcht vundaag US-Präsident Joe Biden in’t Witte Huus. He will em enkelte Punkten vun en Fredensplaan för de Ukraine verkloren. Al bi de UN-Generaalversammeln in Nee York harrn de beiden över den Plaan snackt. Nu will Selenskyj vertellen, woans he sik dat vörstellt. Biden hett al toseggt: De Ukraine kriggt vun de USA mehr Geld för’t Militär.

Bremen: Weniger Klaueree op de Straten

Bremen: In de Stadt Bremen gifft dat op de Straten weniger Klaueree. Dat hett Binnensenater Ulrich Mäurer seggt. Liekers blifft de Stratenklau en groten Posten, meen Mäurer. Wo se de Sonderkommischoon „junge Rövers“ opstellt hebbt, hebbt se in de Stadt 60 mal en Haftbefehl utstellt. 39 Lüüd sitt opstunns noch achter Trallen. Mäurer sä: De Sonderkommischoon schall tokamen Johr mit ehr Arbeit wiedermaken.

Bremerhaven: Energy-Port bringt Schangsen för Arbeitssteden

Bremerhaven: Wat as Energy-Port plaant is, kunn för de Wirtschap in de Stadt groot wat in Gang bringen. So steiht dat in en Bericht, över den de Haven-Utschuss snackt hett. Wenn se den süüdlichen Fischereehaven utboot, kunn dat 10.000 ne’e Steden bringen. De Energy Port in Bremerhaven schall sik vör allen um dat Umslaan vun Watergas un dat Herstellen vun Windanlagen kümmern. De den Bericht schreven hebbt, sünd sik seker: Ok in teihn Johren warrt düsse beiden Opgaven in de Wirtschap noch en grote Rull spelen.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven, Cuxhaven un Deefholt överall 14 Graad. Vundaag: Eerst gries mit deegten Regen, de aver an’n Vörmiddag över de Noordsee un de Elv aftreckt. Achteran vun allens wat: lockere Wulken, en beten Sunnschien, pladdern kann dat ok, hier un dor ok mit Blitz un Dunnerslag. Dat Thermometer krabbelt op 17 bet 20 Graad. De Wind dorto weiht in Maten bet frisch vun de süüdwesten Kant, mit deegte Böen, vör allen an de See. Tokamen Nacht: Dichte Wulken, un de smiet ok mal wat Natts vun baven. In’t Binnenland ok länger mal dröög, un hier lockert de Wulkendeek op. Bi 13 bet 12 Graad. Morgen: Mal dichte Wulken, mal Sunnschien, mal en Schuer, an de See ok mal en Gewidder. Bi 16 bet 18 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Sven Weingärtner.