Plattdeutsche Nachrichten Plattdüütsche Narichten vun'n 20. November 2024

IG Metall un Bedrievsraat leggt Tokunftsplaan för VW vör

Wolfsborg: De VW Bedrievsraat un de Gewarkschaft IG Metall hebbt en Plaan för de Tokunft vun Volkswagen vörleggt. Dat is en Reakschoon un Gegenvörslag to de scharpen Spaarplaans vun dat Ünnernehmen. De Konzern will den Lohn üm teihn Perzent daalsetten. Bavento drauht dat Dichtmaken vun Warken un dat Strieken vun Jobs ut bedrievliche Grünnen. Morgen steiht de drütte Verhandlungsrunn över den Huustarifverdrag an.

Thüringen kriggt Maatschaft ut dree Parteien

Erfort: Tweenhalf Maand na de Landdagswahl in Thüringen is de Regeern nu meist op de Been stellt. CDU, SPD un dat Bündnis Sahra Wagenknecht hebbt sik op de Grundlagen för en Koalitschoonsverdrag enigt. Na dat Drapen vun de Parteiböversten is vermellt worrn, datt de Plaans woll an’n Freedag vörstellt ward. Denn mööt noch de Parteigremien vun de dree Partners tostimmen.

BKA snackt över Künstliche Intelligenz

Wiesbaden: Dat Bunnskriminaalamt kummt an’n Middag to sien Harvstversammeln tosamen. Vör allen geiht dat üm dat Thema Künstliche Intelligenz. Gemeensam mit Fachlüüd snackt de Deelnehmers över Gefohren, Schangsen un rechtliche un ethische Fragen. De Reed to’n Anfang hollt Bunnsbinnenministersche Nancy Faeser.

Eerster Castor-Transport siet Johren in Baden-Württembarg

Phillipsborg: An de Steed, wo fröher dat Atoomkraftwark bi Karlsroh stünn, rekent Atoomkraftgegners hüüt mit en Castor-Transport ut Frankriek. De Toog mit veer Castor-Containers hett woll güstern Namiddag de Wedderopbereitungsanlaag in La Hague in Frankriek verlaten. De Fohrplaan un de Streek sünd ut Sekerheitsgrünnen geheem. An Bord is Müll, de na dat Wedderopbereiten vun Brennelementen ut düütschen Atoomkraftwarken nableven is.

Bremen köfft fröheres Kaufhof-Huus in de Binnenstadt

Bremen: So as dat schient, is nu en wichtigen Stapp för den wieteren Verloop vun de Bremer Binnenstadt maakt worrn. Na Informatschonen vun’n Werser-Kurier hett de Stadt dat fröhere Kaufhof-Huus köfft. De Bo is Deel vun den Plaan rund üm dat Parkhuus Mitt. Wo dat nu mit dat Huus vun 50 Johr wietergahn schall, steiht aver noch nich fast.   

Dat Weer

Un nu en Blick op dat Weer: In Leer un Nordholt 1, in Bremen un Bremerhaben 2, un op Borkum sünd dat opstünns 5 Graad. Hüüt gifft dat veele Wulken, un jümmer wedder treckt Regen-, Sneeregen- oder Grisselgrusselschuers vun de Noordsee in’t Binnenland. Ok korte Gewidder sünd mööglich. De Sünn is meist gor nich to sehn. Vun’t süüdliche Emsland bet to de Aller sünd de Schangsen an’n gröttsten, datt dat ok mal dröög blifft. De Temperaturen liggt bi 3 bet 6 Graad. In de Nacht treckt de Regen wietgahns över de Aller af. Darna kummt nee’e Schuers vun de Noordsee un de Nedderlannen na. In de Tüschentiet kann dat ok mal oplockern, besünners Oosten de Werser bi 4 bet -3 Graad. Hier un dor kann dat glatt ween. Morgen gifft dat jümmer wedder dichte Wulkenfeller. An de Küst bringt de’n poor Schuers mit Regen, Sneeregen oder Grisselgrussel. In’t süüdliche Binnenland blifft dat aver fakener dröög. Af un an is ok’n beten Sünnschien mööglich. Dat blifft aver natt-koolt bi 3 bet 6 Graad.

Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Marc Gelhart.