Plattdeutsche Nachrichten Plattdüütsche Narichten vun'n 07. Februar 2025

Wohrschaustreiks an Bremer Kitas un Krankenhüüs

Bremen: De Wohrschaustreiks in den apen Deenst in Bremen gaht hüüt wieder. De Gewarkschop Verdi will in en halv Stünn mit en Demonstratschoonstog vun den Bremer Hööftbahnhoff to de Domsheid trecken. Mitarbeiders vun dat Krankenhuus Oost un de Kinnergorns, de de Stadt tohöört laat hüüt de Arbeit liggen. In den Kitas keem dat hüüt aver nich överall to en Streik. An dat Krankenhuus Oost wurrn Operatschoon wegschuuvt.

Veel grippekranke Kinner

Berlin: Jümmers noch sünd över de Maten veel Schoolkinner in Düütschland krank. Binah jedeen sösst Kind twuschen 5 un 14 Johren hett just kranke Luftweeg, mellt dat Robert Koch Institut. Verleden Johr üm düsse Tiet weer dat meist jedeen söövt Kind. Düütschlandwiet hebbt in Momang na RKI-Tahlen binah acht Millioon Minschen akut Lieden an de Luftweeg – dormang Verköhlen, aver ok Gripp un Corona.

Trump geiht gegen Straafgerichtshoff vör

Washington: US-Präsident Donald Trump hett Sankschoon gegen den internatschonalen Straafgerichtshoff in Den Haag anoornt. De Sankschoon drepen Leidkräft un Mitarbeiders, de gegen Börgerslüüd ut de USA or Lüüd de an de Siet vun de USA stahn Ünnersökens dörchföhren. Trump meent, dat Gericht hett sien Macht missbruukt, wiel dat Haftbefehlen gegen israelsche Politiker utstellt hett.

US-Regeern will Entwicklungshölp hart bekniepen

Washington: De US-Entwicklungshölp US AID schall na Medienberichten an tokamen Wekenenn hart beknippt warrn. Vun den aktuell meist 10.000 Mitarbeiders schüllt all bet op um un bi 300 ehren Job verleeren – maakt de New York Times künnig. De nee´e US-Regeern harr al dat Geld vun US AID stoppt – de Behöörd hett en Etat vun över 40 Milliarden US-Dollar. Dorvun bedrapen sünd veel humanitäre Projekten in pover Rebeeten.

Wieder Demonstratschoon gegen Rechts

Bremen: Ut Protest gegen de gemeensame Afstimmung mit de AfD in den Bunnsdag gifft dat wedder verscheeden Demonstratschoon in den Noordwesten. Ünner dat Motto „Kien Tee för Nazis“ reken de Utrichters hüüt Namiddag gegen Klock fief in Ollenborg mit 500 Minschen. Op den Marktplatz is en Luchtermeer plaant. Morgen gifft dat wiedere Kundgaven – ünner annern in Suling, Westerstäe, Cuxhoben, Nordenham – un vun Klock dree an Namiddag op den Domshoff in Bremen.

Dat Weer

Un nu kiekt wi op dat Weer: In Bremen, Emm un Rottenborg hebbt wi överall twee Graad in Bremerhoben sünd dat opstunns dree Graad.

Hüüt hangt de Heven vull Wulken, de Sünn schafft dat meist nich. Dat blifft dröög bet op en poor lütte Druppen or Flocken bi dree bet veer Graad, wat sik aver dör den bööig oost-Wind köhliger anföhlt. In de Nacht wiederhen veel Wulken, korte Tiet mal en beten weniger dorbi blifft dat dröög. An de Küst kann dat en poor Druppen geven. Dat Thermometer wiest us plus een Graad op de Eilannen un null bet minus een Graad in´t Binnenland. Sünnavend fangt mit dicken Wulken an, de aver weniger warrt, achteran kummt ok mal de Sünn rut un dat blifft dröög bi twee bet veer Graad. Sünndag mehr Wulken as Sünn un wiederhen dröög bi dree bet fief Graad.

Dat weren de Plattdüütschen Narichten. Tohoopstellt vun Sven Kuhnen. Op platt torechtmaakt un vörleest vun Martina Brünjes.