Plattdeutsche Nachrichten Plattdüütsche Narichten vun'n 24. September 2024

Frankriek beandragt Sünnerdrepen vun’n UN-Sekerheitsraat

Paris – Na de dullen Attacken vun Israel op Steden in’n Libanon hett Frankriek een Sünnerdrepen vun’n UN-Sekerheitsraat foddert. Dat Drepen schall noch düsse Week stattfinnen, heet dat. UN-Generalsekretär Guterres hett all Parteien opropen, normale Börger un dat Üm un Bi to schützen. Bi de Attacken ut de Luft vun’t israelisch Militär sünd bold 500 Minschen üm’t Leven kamen, mehr as 1.600 sünd versehrt worrn – heet dat vun’n Libanon.

UN-Generaldebatt in Nee York fangt an

Nee York – Vundaag fangt in den USA de Generaaldebatt vun de Vereenten Natschonen an, de een Week duern ward. In Nee York kummt mehr as 130 Staats-un Regeernbaas tosamen, darünner ok US-Präsident Biden un Israels Ministerpräsident Netanjahu. Ok de ukrainsche Präsident Selenskyj ward vör dat Plenum snacken. De Butenminister vun de G7-Staaten ward buterdem över dat Levern an de Ukraine vun Raketen, de wieter weg flegen köönt, beraden.

Schoolmesterverbänne foddert Medienbillen gegen Rechtsruck

Berlin – Na den Erfolg vun de AfD ünner de jungen Wählers bi de Landdagswahl in Brannenburg hebbt Schoolmesters een beter Medienbillen foddert – un twars för Schöler un Schoolmesters. De Vörsittersche vun’n Dütschen Philologenverband, Lin-Klitzing, sä, sotschale Medien weern faken goot för Extreme. Een mutt darüm Schölern bibringen, bi Informatschonen kritisch natofragen.

Bremer Linke wüllt Parkgebühren in de Stadt ropsetten

Bremen – De Bremer Linken wüllt de Parkgebühren in de Stadt höger setten. As de Weser-Kurier vermellt, schall dat in de Bewahner-Parkflachs buterdem mehr kosten, je grötter de Wagen is. SUV-Fohrer schüllt woll duppelt so veel tahlen as Fohrer vun een lüttjet Auto. Buterdem plaant de Linken, dat dat besünners dar dürer ward, wo dat besünners wenig Parkplätze gifft.

Stüertahlerbund bekrittelt mehr Steden in Bremerhaben

Bremerhaben – De Bund vun de Stüertahler bekrittelt, dat in de Bremerhabener Verwaltung vele tosättliche Arbeitssteden inricht worrn sünd. Binnen een Johr sünd dat mehr as 500 Steden, dat is een Na-Baben-Kladdern vun rund 11 Perzent. Se sünd vermoden, dat dat nich för all Steden een goden Grund gifft, so de Stüertahlerbund. Wegen den Mangel vun Facklüüd schüllt sik de Verwaltungen eher darop instellen, mit weniger Personal uttokamen, heet dat.

Dat Weer

Un nu een Blick op dat Weer: in Bremerhaben un Deefholt 14, op Wangerooge 15 un in Bremen sünd dat opstunns 16 Graad. Vundaag gifft dat mehr Wulken as Sünn un besünners vun Middag an köönt Schuers un Grummelschuers opkamen – bi 17 bit 19 Graad. Tokamen Nacht treckt bi dicken Wulken wieter een paar Schuers dör, man vun’t Emsland her lockert dat ok kort op, ehrdat dat later wedder mehr Wulken un Regen gifft. Dat Thermometer sackt op 14 bit 11 Graad. Morrn sünd vele Wulken an’n Heben un de Schuers treckt in Richt Elv af. Darachter kummt dat blots selten natt vun baben, dat kann ok mal fründlich weern. An’n Namiddag kummt aver nee’er Regen op, bi 16 bit 18 Graad. Dat weern de Narichten op Platt. Anja Guse hett se tohoopstellt. Op platt trechtmaakt un vörleest hett se Heidi Jürgens.