Plattdeutsche Nachrichten Plattdüütsche Narichten vun'n 06. Februar 2025

Israel organiseert Utreis vun Palestinensern ut den Gazastriepen

Tel Aviv: De israelsche Minister för´t Verdeffenderen Israel Katz hett de Armee anwiest, en Plaan för de Utreis vun Palestinensern ut den Gazastriepen torechttomaken. Israel snackt vun en „freewillig Utreis“. De Stapp kummt den Vörslag vun US-Präsident Donald Trump na, twee Millioon Palästinenser ut den Küstenstriepen ümtosiedeln. Na Trumps Willen schüllt de Bewahners vun dat Rebeet in Tokunft in annern araabschen Staaten umto ünnerkamen. Internatschonaal warrt de Plaan bekriddelt.

Wahl-O-Mat gaht in´t Nett

Berlin: Goot twee Weken ehrder de Bunnsdagswahl stattfinnt, warrt de Wahl-O-Mat hüüt freeschalt. Dat online-Anbott vun de Bunnszentraal för politsche Billen geiht um un bi in een Stünn in´t Nett. Dat schall en Hölp för Minschen ween, de noch nich weten, wecke Partei se wählen schüllt. Över den Wahl-O-Maten köönt Börgerslüüd testen, wecke Partei to de eegen Denkwies passt.

Bremen un Bremerhoben hebbt de düersten Pleegplätz

Bremen: Pleegplätz warrt in Düütschland jümmer dürer. Dat is bi en Utweerten vun de Freekassenverbann vdek rutsuert. In dat Land Bremen un Bremerhoben gifft dat den hööchsten Eegenandeel, hier liggt de Dörsnitt bi binah 3.500 Euro. Dat sünd rund 500 Euro mehr as in den Bunnsdörsnitt.

Cuxhoben boet nee´e Offshore-Liggplätz

Cuxhoben: Just in düssen Minuten fangt symboolsch de Bo för dree nee´e Liggplätz in dat Düütsche Offshore-Industriezentrum Cuxhoben an. Dorför warrt Neddersassens Wertschopsminister Olaf Lies un Staatssekretär Stefan Wenzel ut dat Bunnswertschopsministerium den eersten Rammslag setten. De Havensellschop N-Ports snackt vun „Mielensteen to`n Stärken vun dat düütsche Offshore-Zentrum“. All tohoop schall de Bo 300 Millioon Euro kösten.  

Bunnspolizei schütt op en Messangreper an den Bremer Hööftbahnhoff

Bremen: Bi en Insatt vun de Bunnspolizei is verleden Nacht op den Platz vör den Bremer Hööftbahnhoff en Mann anschaten worrn. De 38-johrige keem swor versehrt in en Krankenhuus. Na Angaav vun de Polizei hett de Mann de Bunnspolizisten mit en Mess angrepen. De Lannspolizei ünnersöcht den Fall.

Dat Weer

Un nu kiekt wi op dat Weer: In Emm twee Graad, in Möppen dree Graad un in Bremen un Bremerhoben hebbt wi opstunns veer Graad. De Dag fangt mit dicken Wulken an, an´ne Küst lütte Wulken un dor schient ok al de Sünn. Över Middag un Namiddag schafft de Sünn dat ok in´t Binnenland an de Wulken vörbi, dobi blifft dat dröög bi söss bet acht Graad. In de Nacht eerst blots hier un dor Wulken, laater warrt de mehr, liekers blifft dat dröög bi twee Graad op de Eilannen un een bet null Graad in´t Binnenland. Morgen meist dicke Wulken, wenig Sünn, an de Elv kann dat Grisselgrussel- or Sneeregen geven. Meist blifft dat aver dröög bi dree bet veer Graad.

Dat weren de Plattdüütschen Narichten. Tohoopstellt vun Gabriele Intemann. Op platt torechtmaakt un vörleest vun Martina Brünjes.