Plattdeutsche Nachrichten Plattdüütsche Narichten vun'n 11. März 2025

Union un SPD kummt mit ehr Finanzpaket mit  de Grönen nich op eenen Nenner

Berlin: Union un SPD hebbt sik Möög geven, bi snacken an böverste Steed mit de Grünen, üm Stütt för ehr plaantet Schuldenpaket. Man bi dat Drepen an´t Avend is nix bi ruutsuert. De parlamentar`sche Boss vun de Unionsfraktion, Frei, snackt vun een vernünftigen Uttuusch. De CDU weet, dat man op annere togahn mutt. Grönen-Boss Banaszak seggt in´t ZDF, dat siene Partei, to de plaanten Investitionen in Milliarden Hööchde för Verdefenderen un Infrastruktur, so nich tostimmen will. Se hebbt nu eene Week Tied woans se dat ut de Welt bringen köönt.

Winn bi Volkswagen-Konzern brickt in

Wolfsborg: De Auto-Boer Volkswagen, wo dat krieselt, hett in`t letzte Johr düütlich weniger Winn maakt. Ünnern Streek hett VW mit 12,4 Milliarden Euro knapp 31 Perzent weniger, as in´t Johr dorvör, verdeent. So seggt de Konzern. Grund dorför sünd Kosten, de in de Hööchte gaht. Buterdem sünd ok de Verkoop-Tallen in China trüchgahn. Ünnernehmen un Gewarkschaft harrn sik in´t Dezember nah veel Hen un Her op een Plaan fastleggt, den Bedief wirtschaftlich wedder op de Been to stellen. 35.000 Arbeitssteeden schüllt in Düütschland bit 2030 wegfallen. Dat is jede veerte Steed.

Een Minsch is bi grote Drohnen-Attack op Russland sturven

Moskau: Bi de, as dat schient, gröttste Drohnen-Attack op Moskau, siet de russ`sch Invasion in de Ukraine, is in de Nacht tominnst een Minsch sturven. Na Angaven vun`t russ`sche Amt hett dat vele Bränn geven. De Flegere un  Isenbahn in de Gegend hebbt se instellt. Luut dat russ`sch Ministerium för Verdeffenderen hebbt se 330 Drohnen twei maakt. An de 90 dorvun över de Gegend vun Moskau. In Saudi-Arabien nehmt de USA un de Ukraine hütt eenen nee`en Anloop, üm över een mööglichet Enn vun den russ`schen Angriffs-Krieg to snacken.

Havereekommando schickt Schipp to Öltanker, de brennt

Cuxhaben: Vunwegen een Öltanker, de brennt, in de Noordsee dichtbi de brit`sche Küst, hett dat Havereekommando in Cuxhaben een düütschet Mehrzweckschipp to Stütt dorhen schickt. De „Mellum“ is gegen Middag dor. Luut Havereekommando is se ok mit Technik för den Kampf gegen Füer utrüst, un se kann ok Öl opnehmen. Ok steiht een Fleeger in Nordholt paraat. Den Öltanker hett gistern een Frachtschipp rammt. Man worüm dat so kamen is is noch nich rut. Op beide Schippe is Füer utbroken.

Polizeigewarkschaft wohrschaut vör Överlast vun Bremer Polizei

Bremen: De Gewarkschaft vun de  Polizei Bremen wohrschaut vör Arbeits-Överlast vun Polizistinnen un Polizisten in Bremen. De Polizei kummt nich trecht mit de Tall vun de Fallen, so seggt de Landesvörsitter vun de Gewarkschaft, Nils Winter. He reageert dormit op Tallen vun de Polizei-Kriminalstatistik vun´t letze Johr. Dor steiht binnen, dat se nich mehr Verbrekers faatkriegt hebbt. De Tall is sogar torüch gahn. Dat is een Teken, dat de Beamten nich noog Tied hebbt üm de Saak nah to gahn. Vun meist de sülvige Oort hett sik ok de Bremer CDU utspoken.

Dat Weer

Un nu een Blick op dat Weer: In Nenborg 1, in Achim 2, in Bremen 3, un in Bremerhaben sünd dat opstünns 4 Graad. Hütt Hebbt wie dichte Nevel- un Wulkenfeller an´t Heven. Dat kann hier un dor mal so`n beten pieseln. An´t Nomdag lockert dat op un dat ist meist dröge. De Sünn kummt blots later vun Oostfreesland her mal dör, bi 6 bit 8 Graad. Tokamen Nacht hebbt wie dichte Wulken an´t Heven. An de Küst mööt wie jümmer wedder mit lütte Schuers reken. Dat warrt wedder köhler, op de Eilannen 4 bit 3 Graad, un in Bremen 1 Graad. Morrn gifft dat eenen Mix ut Sünn un dichte Wulken. Vun´t Emsland un Oostfreesland, över de Ünnerweser bit in´t Cuxland sünd Schuers mööglich. De Temperaturen liggt bi 6 bit 9 Graad. Dunnerstag wedder vele Wulken an´t Heven, af un an mal lütte Schuers, bi 5 bit 8 Graad. Dat weren de Narichten op Platt. Tohoopstellt hett se Anja Guse. Trechtmaakt un vörleest vun Antje Kruppa.