Plattdeutsche Nachrichten Plattdüütsche Narichten vun'n 10. März 2025

Laway för Wohrschau leggt 13 düütsche Flegerhabens lahm

Bremen: Siet Middernacht löppt an 13 Flegerhabens in heel Düütschland en Laway för Wohrschau. Dorto hett de Gewarkschaft Verdi opropen. Ok an de Flegerhabens in Bremen, Hamborg un Hannover fallt all Flöög ut. Grund för den Laway is de Tarifstriet bi’n öffentlichen Deenst, aver ok dat Verhanneln för de Steden vun de Luftsekerheit.

Carney ward nee’er Kanadischer Premierminister

Ottawa: De fröhere Baas vun de Zentraalbank Mark Carney ward de nee’e Vörsitter vun de Liberaalen Partei in Kanada. Dat is bi dat Afstimmen ünner de Liddmaten rutkamen. De Fachmann för Weertschaft löst dormit Justin Trudeau af, de Anfang Januar künnig maakt hett, datt he sien Hoot nehmen ward. Carney övernimmt nu sowoll dat Leit vun de Partei as ok, tominnst för en Tied, dat Amt vun’n Premierminister. Dat ward nu woll bald Neewahlen geven.

CDU stimmt över Koalitschoonsverhanneln af

Berlin: Na CSU un SPD hebbt ok de CDU-Böversten för dat Anfangen mit dat swatt-rode Koalitschoonsverhanneln afstimmt. Güstern hebbt al de Vörstänn vun CSU un SPD dorför stimmt. Dat Koalitschoonsverhanneln över en gemeensam Bunnsregeern vun Union un SPD kann dormit an’n Dünnersdag losgahn.

Seilschoppschipp „Düütschland“ verlett sien Anlegger in Bremerhaben

Bremerhaben: Dat Seilschoolschipp „Düütschland“ hett sien Anlegger in’n Nee’en Haben verlaten. De meist 100 Johr oole Dreemaster mutt för üm un bi twee Weken in’t Dock. Op de Bredo Warft in’n Kaiserhaben ward ünner annern prüüft, wo goot dat Schipp noch swümmt. Opstünns rekent se dormit, datt dat üm un bi 100.000 Euro kosten ward. Dat kann aver mehr warrn, wenn bi dat Ünnersöken gröttere Maleschen vör Dag kaamt.

Wesernetz överprüüft Gasleitungen in Bremen un ümto

Bremen: Wesernetz överprüüft in de Stadt Bremen un‘n poor Gemeenden ümto vun hüüt an, wat dat Eerdgasnett överall dicht is. Dorto ward dat Gas bet Dünnersdag en Röökmiddel bimischt. Wenn dat undichte Steden gifft, würr dor en düchtigen Röök na Swavel rutkamen. Dütt Prüfen findt eenmal in’t Johr statt. Blangen Bremen sünd düttmal ok Schwanewe’e, Osterholt-Scharmbek, Hu’e, Leendool, Theenhusen, Stuhr, Weyh un Achim an de Reeg.

Dat Weer

Un nu en Blick op dat Weer: In Bremführ -1, in Bremen 2, in Deefholt 3, in Bremerhaben 4, un in Demorst sünd dat opstünns 7 Graad. Hüüt geiht dat eerst deels mit Sünnschien, deels dakig un dröög in den Dag. Bet to’n Middag löst sik de Feller mit Daak to’n gröttsten Deel op, so datt an’n Namiddag un Avend blangen wenig Wulken meisttiets de Sünn schient. Hööchstens to de Elv un de Lünborger Heid hen kann dat noch länger wulkig ween. Dat blifft dröög bi 8 bet 10 Graad op de Eilannen un an de Küst, un 13 bet 14 Graad op’t Fastland. De Nacht is eerst licht wulkig bet klaar un dröög. Later breedt sik vun de Küst dichte Feller mit Daak ut, aver dat gifft hööchstens’n poor Druppen. Anners blifft dat dröög bi 4 bet 0 Graad. Morgen gifft dat düütlich mehr Wulken as Sünnschien, eerst noch hier un dor Daak, later sünd vun de Noordsee her enkelte lichte Schuers mööglich. Meisttiets blifft dat aver dröög bi 6 bet 7 Graad an de Küst un op de Eilannen, un 8 bet 9 Graad op’t Fastland.

Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Marc Gelhart.