Plattdeutsche Nachrichten Plattdüütsche Narichten vun'n 10. Februar 2025

Staatsgerichtshoff Bremen verhannelt Klaag vun den Bündnis-Düütschland-Afgeordneten Timke

Bremen: De Staatsgerichtshoff snackt opstunns över en Klaag, de de Frakschoonsvörsitter vun Bündnis Düütschland, Jan Timke, vörbrocht hett gegen de Präsidentin vun de Börgerschap Antje Grotheer. Bi en Börgerschaftsversammeln in Juli 2023 harr se Timke mal um mal to Ordnung ropen un denn dat Woort afsneden. Grootheer harr Timke opropen, he schull bi’t Thema blieven. Timke meent, dat steiht gegen sien Recht as Afgeordneten un he smitt de Präsidentin vun de Brögerschap vör, se harr de Parteipolitik nich ut ehr Doon rutholen.

Scholz un Merz striedt in Feernseh-Snack över Inwannern un Wirtschap

Berlin: SPD-Kanzler Olaf Scholz un de Unions-Kandidaat Friedrich Merz sünd bi den eersten Feernseh-Snack vör de Bunnsdagswahl vör allen, as dat um’t Inwannern gung, hart mit’nanner in’t Gericht gahn. Scholz hett wedder kloor rut seggt, na de Wahl wörr Merz mit de AfD tohooparbeiden. Merz hett kloormaakt: Dor is nix an wohr. Ok bi Wirtschaps- un Energiepolitik weren de beiden wiet ut’neens. Tokamen Sünndag sitt Scholz un Merz in noch en Feernseh-Runn an een Disch mit de Kanzlerkandidaten vun AfD un de Grönen, Weidel un Habeck.

Trump: Toll op Stahl und Aluminium kummt

Washington: De USA warrt woll wedder Extra-Toll op Stahl un Aluminium verlangen. För allens, wat in’t Land rinkummt, nehmt se 25 Perzent, vertell Trump Lüüd vun de Press in sien Staatsfleger. Düsse Toll schall al bald gellen, un dat för all Länner. Mehr Toll op Woren ut Europa – dat weer Gift för de düütsche Wirtschap. De USA sünd de gröttste Afnehmer vun düütsche Woren, de na’t Butenland gaht.

Top-Drepen in Paris to Künstliche Intelligenz

Paris: In de franzöösche Hauptstadt geiht an’n Vörmiddag en internatschonaal Top-Drepen los. Över Künstliche Intelligenz snackt Fachlüüd mit en Reeg Top-Lüüd vun Staaten un Regerung. Snacken wüllt se doröver, wat KI bi Gesundheit, Bildung un Arbeit hölpen kann. Ok över ethische Fragen bi düsse Technik schall dat gahn. Mit dorbi ween warrt Bunnskanzler Olaf Scholz, man ok de EU-Kommisschoons-Präsidentin Ursula von der Leyen un de Vizes vun de USA un China.

Warnstreiks in den Öffentlichen Deenst in Bremen un Neddersassen loopt wieder

Bremen: In de Binnenstadt versammelt sik hüüt Vörmiddag Mitarbeiders vun den Umweltbedriev Bremen, vun Immobilien Bremen un Lüüd, de an de Slüüs in Habenhusen arbeit. Wat dor achter stickt, is de Tarifstriet in den Öffentlichen Deenst. Ok in Neddersassen hebbt se wat in Gang. Warnstreiks gifft dat in Kitas in de Landkreisen Deefholt un Staad. Tokamen Week löppt de twete Runn för de Tarifen in den Öffentlichen Deenst. De Gewarkschap verlangt 8 Perzent mehr Geld un mehr free’e Daag.

Dat Weer

Un woans süht dat mit dat Weer umto ut? Opstunns hebbt wi in Bremen 1 Graad, in Möppen sünd dat 2 un in Bremerhaven un Demost 3 Graad. Vundaag: Eerst vele Wulken, dat blifft aver dröög. Över Dag lockert de Wulkendeek wat op, un hier un dor kriggt de Sunn de Bavenhand. An’n Namiddag treckt vun Süden her wedder mehr Wulken ran. Dat Thermometer krabbelt op 3 bet 5 Graad. De Wind dorto weiht in Maten, an de See ok mit mehr Wumm vun de noordoosten bet oosten Kant. In’t Binnenland deegte, an de See ok stöörmsche Böen. Tokamen Nacht: Westlich vun de Werser vele Wulken, ööstlich kriegt wi de Steerns to sehn. Fröh an’n Morgen kaamt vun’t Emsland her Snee un Sneeregen rin, mag ween ok as Iesregen, de de Straten glatt maakt. Wohrschau! Bi plus 1 bet minus 2 Graad. Morgen: Eerst na de Elv to noch Sünnschien un dröög, anners kriegt wi överall dichte Wulken to sehn. Twüschen Werser un Ems ok mit Snee, Sneeregen oder Iesregen. Wohrschau – op de Straten kann dat glatt warrn. Gegen Middag löppt de Snee över de Werser weg. Dat Ganze bi kole 0 bet 2 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Anja Guse.