Plattdeutsche Nachrichten Plattdüütsche Narichten vun'n 12. Februar 2025

Mit neje US-Minister för´t Verdeffenderen warrt to´n eersten Mal bi de Nato rekend

Brüssel. In de belgisch Hauptstadt draapt sick af den Namiddag de Ministers för´t Verdeffenderen vun de NATO. To´n eersten mal is denn ok de neje US-Verteidigungsminsiter Hegseth dorbi. Bi dat Drapen warrt dat wohrschienlich ok üm Geld gahn. US-Präsident Trump harr vör en poor Weken verlangt, de NATO-Liddmaatstaaten mööt mehr Geld för de Afwehr utgeven – man fief Perzent vun de Wirtschaftsleistens statt betto twee Perzent.

Netanjahi sett Hamas Frist üm de Geisel free to laten

Tel Aviv. Na US-Präsident Donald Trump hett ok de iraelisch Regerung vun de Hamas en Frist sett, üm de Geiseln free to laten. Wenn de Terrororganisatschon nich bit Sünnavend noch mehr Geiseln free laat, kann de Wapenroh vörbi ween, see Regereungsbaas Benjamin Netanjahu na en Drapen vun sien Sekerheitskabinett. De Hamas smiet Isreal Verstööt gegen de Wapenroh vör un will dorüm dat Freelaten vun Geiseln utsetten.

En Gleis is na legen Togutfall in Hamburg wedder free

Hamborg. Na en Togunfall mit een Doden un 25 Versehrten in´n Süüden vun de Stadt is de ICE afsleppt wurren. Na Angaven vun de Düütsche Bahn is en vun de bedrapen Gleisen siet den fröhen Morgen wedder free. De ICE hett an en Bahnövergang in Hamborg-Rönneborg güstern en LKW rammt, de Bahnschenen laden harr. De LKW hett dat schienbor nich schafft, rechttiedig över den Övergang to fohren. De Fohrer vun den Lastwagen wurr eerstmal fastnahmen.

Arbeiten för Leistenzentrum för den Nawass bei Werder fangen in´n April an

Bremen. Dat plante Zentrum för de jungen Lüüd bi Werder Bremen in dat Landstück to´n Verhalen, Pauliner Marsch, schall tominnst 22 Millionen Euro kosten. Dat hett de Footballvereen an´n Avend op en Extra-Drapen vun den Biraat Vörstadt in´n Oosten bekannt makt. De Arbeiten op dat Landstück schüllt dorna in´n April anfangen. Denn will Werder eerstmal sien Sporthall un en Huus blangenan afrieten laten. Fardig weern schall dat neje Zentrum för den Nawass 2027.

Unbekannte roven Juwelierladen in Ollenborg ut

Olleborg. Twee Mannlüüd, vun den de Polizei bet nu noch nich weet, wokeen se sünd, hebbt an´n Avend en Juwelierladen in de Ollenborger Binnenstadt utroven. Kort vör Fieravend bedrauhen se fief Minschen in dat Geschäft mit en Scheetiesen, as de Mitarbeiters Smuck un Klocken in den Panzerschapp rümen wullen. De Opfers flüchten in en Achterruum vun den Laden. In düsse Tied hebbt de beiden Mannslüüd Smuck un Klocken as Büüt mitnahmen. All tohoop in en Weert in de Midde vun en Bedrag mit söss Stellen. De Polizei hett de Binnenstadt ok mit en Helikopter na se afsökt. Dor is nix bi ruutkamen.

Dat Weer

Un nu noch en Blick op dat Weer: In Demorst null, in Bremen-Mitt un in Bremerhaben minus een un in Nordholt sünd dat opstunns minus twee Graad. Vundag fallen de Sneeflocken twüschen Ems un Weser. Een bit fief Zentimeter sünd möglich. In´n Süüden vun Cuxhaven, in Oosterholt, Vern un Rodenborg-Wümm kamen de Sneeflocken blots af un to ut de Wulken. De Wind weiht en beten bit in Maten. Un dat Thermometer wiest null bit dree Graad. In de Nacht sünd vele Wulken an´n Heven. Een bit fief Zentimeter Snee kann dat man geven. De Temperaturen liggen bi minus veer bit null Graad. Morn is de Heven vull mit Wulken ut de ok mal Sneeflocken kamen. Vör allen in Bremen, man ok in´n Süüden un Oosten vun us Hansestadt sünd hier un dor een bit fief Zentimeter Snee möglich. Null bit dree Graad stahn denn op dat Thermometer.

Dat weern de Narichten op platt. Tohoopstellt hett se Anja Guse. Op Platt trechtmaakt un vörleest vun Markus Weise.