Plattdeutsche Nachrichten Plattdüütsche Narichten vun'n 13. Februar 2025

US Präsident Trump telefoneert mit mit Kreml-Boss Putin

Washington: US-Präsident Donald Trump hett an´t Avend mit den russ`schen Staatsboss Wladimir Putin telefoneert. Dorbi hebbt se een direktet Drepen klar maakt. Dat schall in Saudi-Arabien stattfinnen, seggt Trump an´t Avend in´t Witte Huus. De EU-Kommission un mehrere EU-Staaten verlangt, dat se un de Ukraine bi dat Verhanneln mit dorbi sien künnt.

Commerzbank striekt dusende Jobs

Frankfurt: De Commerzbank will in de kamen dree Johren an de 3.900 Arbeitssteden strieken. Dat hett de Konzern hütt morrn bekannt geven. 3.300 Jobs schüllt in Düütschland wegfallen. De gröttste Deel in de Zentrale, un ok in Frankfurt an´t Main. Achtergrund dorför is, dat de italieni`sche Grootbank UniCredit versöken will de Commerzbank to övernehmen.

Bremer Behöörd Opfer vun Cyberangrepen

Bremen: Mehr Behöörden sünd gistern Opfer vun een Cyber-Attack wesen. Dat hett een Spreker vun dat Finanzressort buten un binnen mellt. Dorna sünd de Server siet gistern Morrn mit E-Mails överswemmt wesen un dat hett dorför sorgt, dat nix mehr gung. IT-Fachlüüd vun de Stadt hebbt in de Nacht de Websieten wedder in Gang bröcht. Erst in´t Dezember hett dat so eenen lieken Cyber-Angriff op Behörden un de Polizei in Bremen geven.

Arbeitnehmerkamer bekrittelt dat wat wegstrieken vun „Meisterprämie“ in Bremen

Bremen: De Arbeitnehmerkamer bekrittelt, dat Bremen de so nömte „Meisterprämie“ to´n 1. März op 1.300 Euro rünner sett. Vele Anstellte hebbt för ehr Wiederbilden mit de Prämie, as bit nu vun 4.000 Euro, rekent. Dat knappe rünner setten stellt dat Vertoen in Fraag, so de Kamer. Ok seggt se, datt dat wegen den Mangel an Fachlüüd kontraproduktiv is.

Warnstreik bi Staatsdeenst geiht wieter

Verden: An´t veerten Dag vun de Warnstreikweek bi den Staatsdeenst in Bremen un Neddersassen sünd hütt ok de Landkeise Verrn un Nenborg bedropen. De Gewarkschaft Verdi hett de Anstellten vun Verwaltung ut Kitas un ok vun Verkehrsbedrieve to Warnstreiks opropen.- So seggt de Stadtverwaltung Osterholt-Scharmbeck Wohrschau an, vunwegen, dat de Winterdeenst villicht nich ganz normaal aflöppt.

Dat Weer

Un nu een Blick op dat Weer: In Nenborg -5, in Bremen -3, in Bremerhaben -2, un in Cuxhaben sünd dat opstünns -1 Graad. Hütt sünd vele Wulken unnerwegens. Vun de Nordsee un de Elb her mööt wi mit Snee un Glatties reken. De Sünn kummt denn later ok af un an mal dör, bi 0 bit 2 Graad. Tokamen Nacht is de Heven wedder mit Wulken bedeckt. Dat blifft meist dröge. Hier un dor mööt wi ok mit Sneeschuers reken. Dat kann glatt sien, bi 1 bit -3 Graad. Morrn is dat jüst so bedeckt as hütt. De Sünn kriegt wi nich veel so sehn. Dat blifft meist dröge. De Temperaturen liggt bi 1 bit 3 Graad. Sünnavend mehr Wulken as Sünn, man dor kummt nix vun baven rünner, bi 1 bit 2 Graad. Dat weren de Narichten op Platt. Tohoopstellt hett se Irene Lottes. Trechtmaakt un vörleest vun Antje Kruppa.