Plattdeutsche Nachrichten Plattdüütsche Narichten vun'n 14. Februar 2025

Diskussion över mehr Sekerheit

München: Na den womööglichen Anslag gistern in München, warrt de, de dat woll maakt hett, den Haftrichter vörföhrt. De 24-Jöhrige Afgahn is mit sein Auto in een Demonstration rinföhrt. Tominnst 30 Minschen sünd dorbi to Schaden kamen. SPD-Boss Lars Klingbeil verlangt vun de demokratischen Parteien, för mehr Sekerheit in Düütschland tosamen to arbeiden, un den Wahlkampf achteran to stellen. De CSU hett SPD un Gröne opropen, to ehre Gesetzesvörläge to Migration un Sekerheit „Ja“ to seggen.

Sekerheitskunverenz hollt Raatslag över Ukraine

München: Hütt Middag geiht de 61. Münchener Sekerheitskunverenz los. Mit vun de Partie sünd 60 Staats- un Regeerungsbosse, un ok över 100 Minister. Ok de ukrain`sche Präsident Wolodymyr Selenskyi reist an. Ut de USA kummt Vizepräsident JD Vance. Bi de Kunverenz geiht dat bestimmt ok dorüm, dat US-Präsident Donald Trump direkt mit Kremlboss Wladimir Putin över de Tokunft vun de Ukraine verhannelt hett. Vance harr Russland opletzt mit Sanktionen un mööglichen Militäraktionen drauht, wenn Putin nich “Ja” seggt to een Fredensafkomen, op lange Sicht.

Danzen gegen Gewalt

Bremen: Ünner de Överschrift „One Billion Rising“ willt Initiativen in Bremen un Bremerhaben an´t Nomdag vör Gewalt gegen Deerns un Froenslüüd wohrschaun. Dorto gifft dat op den Bremer Domshoff eene Danz-Demonstration. Luut Polizei hebbt sik mehrere hunnert Minschen anmellt. In Bremerhaben willt se an´t fröhen Avend ok tosamen danzen. Meist tosamen mit junge Lüüd in´t Deenstleistungszentrum Gröönhöfe.

Senior starvt bi Füer in Wahnung

Weyhe: Een 80-jöhrige Mann, de up Pleeg anwesen weer, hett man bi een Füer doot opfunnen. Dat Huus in´t Landkeis Defhold, wo he binnen wesen is, is komplett utbrannt. Anwohners harrn dat Füer mellt, un sik all dacht, dat de Mann noch in´t Huus weer. Siene Rettung kunn dör dat grote Füer un dordör, dat de Decke instött is, nich goot aflopen. As de Insatzkräften den Mann funnen hebbt, is he al nich mehr an´t Leven wesen.

Schaffermahl sammelt Geld för Seelüüd

Bremen: In´t Raathuus finnt hüüt Nomdag de traditionelle Schaffermahltied statt. Dat is de 481. Schaffermahltied. Ehrengast is de Ministerpräsident vun Nordrhein-Westfalen, Hendrik Wüst. Bi de Veranstalten sammelt se Spennen för dat „Huus Seefohrt“ un för in Noot kamen Seelüüd. All tosamen rekent man mit 300 Gäste in de Bövere Raathuushall.

Dat Weer

Un nu een Blick op dat Weer: in Emm, in Bremerhaven, in Bremen un in Defhold sünd dat opstünns 0 Graad. Hütt hebbt wi vele Wulken an´t Heven un de Sünn kummt blots af un an mal dör. An´t Vomdag kann dat hier un dor noch glatt sein. Över den Dag kann dat ok mal een paar Sneeschuers geven, bi 1 bit 2 Graad. Tokamen Nacht blifft dat jüst so bedeckt. Wi mööt ok wedder mal mit lichte Sneeschuers un Glatties reken, bi 0 bit -2 Graad. Morrn ännert sik dat griese Weer ok nich. Mehr Wulken as Sünn, man meist dröge. De Temperaturen liggt bi 1 bit 2 Graad. Sünndag ok wedder een dröge Wessel ut Sünn un dichte Wulken, bi 0 bit 2 Graad. Dat weren de Narichten op Platt. Tohoopstellt hett se Sven Kuhnen. Trechtmaakt un vörleest vun Antje Kruppa.