Plattdeutsche Nachrichten Plattdüütsche Narichten vun'n 20. Juni 2024

Düütschland al ünner de letzten 16 bi de Europameisterschaft

Stuttgart: De düütsche Football-Natschonaalmannschaft is bi de Europameisterschaft vör de Tiet ünner de letzten 16 kamen. De Mannschaft hett an’n Avend dat twete Gruppenspeel gegen Ungarn mit 2:0 wunnen. De Tore för dat DFB-Team hebbt Musiala un Gündogan schaten. Tovör sünd Kroatien un Albanien mit 2:2 utnanner gahn. Dat Speel Schottland gegen de Swiez is mit 1:1 to Enn gahn.

Ministerpräsidentenkonferenz snackt över Migratschoonspolitik

Berlin: De Ministerpräsidenten vun de Länner snackt hüüt ünner annern över de Migratschoonspolitik. Vör allen de Länner ünner dat Leit vun de Union wüllt, datt Asylverfohren in anner Staaten utlagert un mehr Flüchtlinge afschaben ward. Bavento geiht dat üm en möögliche Plichtversekerung för Schaden dör de Natur. Bremen will ok över mehr Geld för dat Ruumfohrt-Wirtschaftsfeld in Düütschland snacken.

Bargen vun Frachtschipp „Verity“ hett in Oostsee anfungen

Helgoland: In de Oostsee hett dat Bargen vun dat Frachtschipp „Verity“ anfungen. Dat Schipp is vör söben Maand mit en anner Frachtschipp tosamenstött un ünnergahn. De Behörden gaht dorvun ut, datt dorbi fief Seelüüd doodbleven sünd. Dat Schipp wüllt se nu in twee Delen snieden un mit en Swümmkraan hoochhieven.  

Bremsche Börgerschaft will Huushoolt afnicken

Bremen: De Bremsche Börgerschaft will hüüt een för allemal över den Huushoolt för dütt Johr afstimmen. Tovör mutt dat Parlament noch dat Ännern vun de Landsverfaten afnicken. Dorbi geiht dat üm dat Inrichten vun en Extra-Geldputt. Mit 300 Millionen Euro will de Senaat besünners dat Bremer Stahlwark Stütt geven, dormit dat in Tokunft ahn Schaden för dat Klima Stahl produzeern kann. Den Extra-Geldputt hett ok de CDU tostimmt. Den Huushoolt hett sowoll de CDU as ok de FDP un Bündnis Düütschland aflehnt.

Musikfestival „Hurricane“ in Scheeßel fangt an

Scheeßel: Meist 80.000 Minschen ward vun hüüt an bi dat Musikfestival „Hurricane“ ween. Dorbi rekent de Polizei rund üm de Oortschaft twüschen Bremen un Hamborg mit veel Verkehr un Staus. För de Töög vun den „Metronom“ gifft dat en Extra-Fohrplaan. Bet Sünndag staht meist 90 Bands un Künstler op de Bühnen.

Dat Weer

Un nu en Blick op dat Weer: In Bremerhaben un Emmen 14, in Bremen un Cloppenborg 15, un in Demhorst sünd dat opstünns 16 Graad. Hüüt gifft dat veel Sünnschien. Enkelte Feller mit Daak löst sik gau op, blots‘n poor dünne Wulken blifft na. To’n Namiddag un Avend hen blifft dat fründlich un dröög, ok wenn vun Noordrhein-Westfalen mehr Wulken dortotreckt. De Temperaturen liggt bi 20 bet 23 Graad in’t Binnenland un 17 bet 19 Graad an de Küst. In de Nacht treckt jümmer wedder Wulken dör, de bald vun’t süüdliche Binnenland her Schuers un enkelte Gewidder bringt. Later gifft dat wietere Schuers un Gewidder, aver dat blifft ok mal för längere Tiet dröög. De Temperaturen gaht blots’n beten trüch op 16 bet 13 Graad. Morgen gifft dat mehr Wulken as Sünnschien un jümmer wedder Schuers un Gewidder, to’n Deel mit starken Regen. Lütte Flachen köönt denn ok mal ünner Water stahn. Af un an blifft dat aver ok mal dröög. Dat ward bruttig bi 19 bet 24 Graad.

Dat weern de Narichten op platt. Tohoopstellt hett se Justus Wilke. Op Platt trechtmaakt un vörleest vun Marc Gelhart.