Plattdeutsche Nachrichten Plattdüütsche Narichten vun'n 12. März 2025

EU: Mehr Toll op Woren ut de USA

Brüssel: De EU nimmt mehr Toll op amerikaansche Woren as Jeans, Whiskey, Motorrööd un Bööd. Dat hett de EU-Kommischoon künnig maakt. Dat is en Antwoort dorop, dat vun hüüt op an de US-Toll op Stahl un Aluminium um 25 Perzent na baven geiht. Wat se noch dorgegen in Gang setten wüllt, dat wüllt de EU-Staaten Mitt April mit’nanner afsnacken.

Keen Scheten mehr: EU dorför

Brüssel: Top-Lüüd vun de EU hebbt seggt: De Vörslag vun de Ukraine un de USA, dat in den Krieg 30 Daag lang nich schaten warrt, is en richtigen Schritt. So kunn dat en kumpletten un gerechten Freden op Duer geven, sä EU-Kommischoonspräsidentin Ursula von der Leyen. Ok Butenministersch Annalena Baerbock snack vun en Dreihpunkt. Nu harr Russland dat in de Hand, dat de Krieg to Enn kummt. De Amerikaners hebbt ok toseggt, dat de Militärhölp för de Ukraine wiederlöppt.

Wahl in Gröönland: Oppositschoon hett de Nees vörn

Nuuk: Gröönland kriggt woll en ne’e Regerung. Bi de Parlamentswahl hett de Oppositschoon, de dicht bi de Wirtschap is, gegen de linke Regerungskoalitschoon de Bavenhand hatt. Wo in de Hauptstadt Nuuk de Krüzen tellt worrn sünd, liggt de Demokraatsche Partei – se seggt vun sik sülvst, se weer „sozialliberal“ – so wiet vörn, dat se nich mehr verleren kann. Mehr Stimmen hett ok de natschonalistische Oppositschoonspartei kregen. De will, dat Gröönland en egen Staat warrt un nich mehr to Däänmark tohöört.

Bahn bi Wunstörp dicht

Bremen: De vundaag mit de Bahn twüschen Bremen un Hannover unnerwegens is, mutt dormit reken, dat nich allens rund löppt. Bi Wunstörp is en Damm afrutscht. Nu fohrt den helen Dag keen ICE. De IC-Bahnen köönt fohren, ok wenn se 15 Minuten later sünd. Regionalbahnen fohrt normal.

Sandstrand warrt opschütt

Wangeroog: De Winterstorm hett düt Johr nich ganz so veel vun de Küst afknabbert. Liekers mööt se den Hauptstrand op de Insel Wangeroog wedder trechtmaken. Sowat 25.000 Kubikmeter Sand sünd weg. In de Johren vörher weer dat kloor mehr. Kösten schall dat 180.000 Euro.

Dat Weer

Un woans süht dat mit dat Weer umto ut? Opstunns hebbt wi in Bremerhaven un Staad 5 Graad, in Bremen un Syke sünd dat 6 Graad. Vundaag: Mal en beten Sunnschien, mal en Handvull dichte Wulken, un denn treckt ok noch mal en Schuer vörbi. Na de Lümborger Heid un de Aller to blifft dat wat länger dröög. Dat Thermometer krabbelt op 6 bet 9 Graad. De Wind dorto weiht flau, an de See ok en beten mehr un in Böen, vun de westen bet süüdwesten Kant. Gegen Avend flaut de Wind af. Tokamen Nacht: Eerst blots en poor Wulken, man schuern kann dat liekers noch. Denn kloren Heven, un bet to’n Morgen köönt sik Placken mit Daak oder hogen Daak utbillen. Bi 2 Graad över bet 3 Graad unner 0. Hier oder dor kann dat glatt warrn. Morgen: Eerst dakig oder gries un grimmelig. Achteran: Mal Sunnschien, mal Wulken. Över Dag kann dat regen oder grisselgrusseln. Dat Ganze bi 5 bet 8 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Sven Kuhnen.