Plattdeutsche Nachrichten Plattdüütsche Narichten vun'n 21. Juni 2024

Bund un Länner warrt sik eenig vunwegen Ünnersökens to de Asylverfohren buten de EU

Berlin: De Bunnsregeren ünnersöcht wiederhen, of un wo se Asylverfohren in Lännern buten de EU maken kann. Dat is bi dat Bund-Lännerdrepen in dat Kanzleramt to dat Thema Migratschoon rutsuert. Bet Dezember schüllt konkrete Resultaten vörliggen. Bremen un Neddersassen hebbt ehrder dat Drepen Bedenken hatt, of de Vörslag wat beter maakt.

US-Regeern verbeedt Virenschutz-Programm Kaspersky

Washington: De US-Regeern verbeedt dat russche Virenschutz-Programm Kaspersky, vunwegen se bedenken för de natschonaale Sekerheit hebbt. Updates sünd evenso verbaden. De US-Regeern is bang dat de russche Regeern Kaspersky stüert. In Düütschland wohrschaut dat Bunnsamt för Sekerheit in de Informatschoonstechnik vör den Insatt vun dat Programm. Kaspersky stried af wat mit den russchen Geheemdeenst to doon to hebben.

ver.di röppt Bank-Arbeiders to en Wohrschostreik op

Bremen: Hüüt mööt Kunnen vun de een or annere Bank in Bremen un Neddersassen mit Inschränken bi den Kunnendeenst reken. De Gewarkschop ver.di hett de Arbeiders to en Wohrschostreik opropen, üm Druck vunwegen de Tarifverhanneln to maken. Mit dorbi sünd ünner annern de Düütsche Bank, Postbank un de Ollenborgische Lannsbank. De Gewarkschop verlangt 12,5 Perzent mehr Geld bi ene Verdragslooptiet vun een Johr. Betnu beden de Banken 8,5 Perzent mit en düütlich länger Looptiet an.

In Bremen fangt dat HOEG CitySommerFest an

Bremen: Hüüt Middag fangt dat HOEG CitySommerFest an. Bet Sünndag sünd fief verscheeden Bühnen in de Binnenstadt opboet. Ünner annern gifft dat an de Slachte un op den Marktplatz Livemusik, Akrobaten un en Kinnerprogramm. Organiseert warrt dat Sommerfest vun de „Cityinitiative Bremen Werbung e.V.“, de Intritt is free.

Landgericht Bremen verordeelt fief „verkehrte Polizisten“

Bremen: Fief junge Bremer, de sik as Polizisten utgeven un anner Bedregereen maakt hebbt, mööt för twee bet binah veer Jahren achter Trallen. Dat hett dat Landgericht beslaten. All hebbt se dat, wat se maakt harrn, togeven. De Mannslüüd schüllt mehr as 20 mal as Bankmitarbeider, Staatsafkaten or Polizisten opdükert ween, üm an Geld or Weertsaken rantokamen, tweemal hebbt se dat schafft.

Dat Weer

Un nu kiekt wi op dat Weer: In Möppen un Emm hebbt wi 16 Graad, in Bremerhoben 17 Graad un in Bremen sünd dat opstunns 18 Graad. Hüüt sünd meist mehr Wulken as Sünn an Heven, eerst enkelte Regenschuer, över Middag kann dat böös pladdert mit Gewidder. Twuschen Werser un Elv is ok mal Land ünner mööglich. Twuschendör kann dat ok mal dröög un bruttig warm ween bi 17 bet 18 Graad op de Eilannen un 20 bet 24 Graad in´t Binnenland. In den Nacht sünd wedder deegt Regen un Gewidder ünnerwegens, vun Middernacht af an, blots noch verenkelte Schuer or dröög bi 14 Graad op de Eilannen un 13 bet 11 Graad in´t Binnenland. Morgen wesseln sik Sünn un Wulken af, af un an mit en poor Schuern, in´t süüdliche Binnenland blifft dat dröög. Dat Thermometer wiest us 18 bet 20 Graad an de Küst un 22 bet 23 Graad in´t Binnenland. Sünndag blifft dat dröög un wedder wesseln sik Sünn un Wulken af bi 20 bet 23 Graad in´t Binnenland un 18 bet 19 Graad an de Küst un op de Eilannen.

Dat weren de Plattdüütschen Narichten. Tohoopstellt vun Gabriele Intemann. Op Platt trechtmaakt un vörleest vun Martina Brünjes.