Plattdeutsche Nachrichten Plattdüütsche Narichten vun'n 11. Februar 2025

Bunnesdag to letzter Sitzung tohoopkamen

Berlin – De dütsche Bunnesdag is to sien letzte Sitzung vör de Bunnesdagswahl tohoopkamen. Dree Stunnen sünd för de Debatt över de Laag nu in Dütschland plaant. As erster hett Bunneskanzler Scholz snackt. He hett Unionskanzlerkandidat Merz vörsmieten, dat he stännig een Kehrtwenn maakt un bekrittelt dat gemeensam Afstimmen vun de CDU mit de AfD.  Merz hett de aktuell Regeern mit dat Leit vun een Ünnernehmen verglieken, dat nix henkriegt hett. Düsse Böversten höört vör de Döör sett, meent Merz.

Ämters sünd bang över Tostand vun Bremer Brüggs

Bremen – De Senat informeert hüüt Middag över de maroden Werserbrüggs in‘t Binnenstadtrebeet. Güstern weer vermellt worrn, dat blangen de sperrte Börgermeister-Smidt-Brügg ok de Wilhelm-Kaisen-Brügg utfallen kunn. De FDP in de Oppositschon snack vun een Verkehrs-Super-GAU. De Senat harr dat över Johren nich henkregen, de Straten un Brüggs op schick to hollen, nu mööt de Lüüd in Bremen darunner lieden, so de FDP.

USA roopt Tölle op Stahl un Aluminium ut

Washington – US-Präsident Trump hett hoge Tölle op Stahl- un Aluminiumimporte in de USA utropen – so, as he dat ankünnigt harr. Dat ward 25 Perzent ahn Utnahmen, sä Trump as he een Dekret darför in’t Witte Huus ünnertekent harr. De Bunnesregeern un ok de EU harrn de US-Regeern vör den Schreed wahrschaut. Kanzler Scholz sä, wokeen Tölle utroopt, mutt mit Gegentöllen reken.

Hamas sett dat Freelaten vun Geiseln ut

Gaza – De radikalislamsche Hamas smiet Israel vör, dat se gegen de Wapenroh verstött. Darüm will de Terror-Organisatschon erstmal keen Geiseln mehr freelaten. Dat Freelaten, dat för Sünnabend plaant weer, ward verschuven, bit Israel „sien Plicht nakummt“. Vunwegen de Wapenroh schull de Hamas tohoopnahmen 33 israelsche Geiseln freelaten, hunnerte Palästinenser schullen darför ut israelscher Haft freekamen.

Senat plaant Hunnenföhrerschien

Bremen – In’n Summer vun’t nöchste Johr schall in Bremen un Bremerhaben een so nöömter Hunnenföhrerschien inföhrt weern. Dat steiht in een Plaan vun een Gesett, de buten un binnen vörliggt un över den de Bremer Senat afstimmen will. All Lüüd, de in’t Land Bremen een Hund hebbt or de, de een hebben wüllt, mööt in Tokunft een theoreetsch un een praktisch Pröfen afleggen. Dat schall sekerstellen, dat Lüüd mit Hund ok mit een Deert ümgahn köönt.

Dat Weer

Un nu een Blick op dat Weer: op Wangerooge 1, in Bremen, Bremerhaben un Deefholt sünd dat opstunns minus 1 Graad. Vundag fallt Snee, de an’n Namiddag weniger wird. An de Elv kummt meist keen Flock an, an’n Namiddag kann in Oostfreesland ok de Sünn rutkieken – bi natt-kohlen null bit 2 Graad. Tokamen Nacht sünd meist vele Wulken an’n Heben, de ok mal oplockert. Mag ween, un dar fallt een beten Snee. Man meist blifft dat dröög. Dat Thermometer sackt op plus 1 bit minus 2 Graad. Morrn sünd meist vele Wulken to sehn un de Sünn kiekt gar nich rut. Darto gifft dat Sneeregen- or Sneeschuers un dat kann glatt weern. Dar kann ok för een paar Stunnen Snee fallen, man wo genau, weet wi noch nich, bi null bit plus 2 Graad. Dat weern de Narichten op Platt. Sven Kuhnen hett se tohoopstellt. Op platt trechtmaakt un vörleest hett se Heidi Jürgens.