Plattdeutsche Nachrichten Plattdüütsche Narichten vun'n 17. Februar 2025

EU-Staatsböverste snackt över Fredenslösung för de Ukraine

Paris: Mehrere europääsche Staats- un Regerungsböverste kaamt hüüt in Paris tosamen, üm över de Ukraine to snacken. Grund dorför sünd de Plaans vun US-Präsident Trump, mit Russlands Staatsbaas Putin över en Enn vun’n Krieg to verhanneln. De Europäer hebbt to weten kregen, datt se mit dat möögliche Verhanneln wenig bet gor nich to doon hebben ward. Nu wüllt se doröver snacken, wo se to en Fredenslösung bidragen köönt.

Tarifverhanneln in’n Öffentlichen Deenst geiht wieter

Potsdam: De Gewarkschaften, de Bund un de kommunalen Arbeitgevers maakt an’n Namiddag mit dat Tarifverhanneln för den öffentlichen Deenst wieter. Verdi un de Beamtenbund wüllt acht Perzent mehr Inkamen, tominnst aver 350 Euro mehr in’n Maand, un dree free’e Daag bavento. De Arbeitgevers hebbt betto noch keen Angebott vörleggt. In de verleden Week hebbt in Bremen un Neddersassen ünner annern Kita- un Krankenhuusmitarbeiders streikt.

Flegerbomb in Ossenbrügge sprengt

Ossenbrügge: In Ossenbrügge sünd veer Blindgängers ut’n Tweten Weltkrieg unschädlich maakt worrn. Dree Flegerbomben hebbt se entschärft, de veerte is güstern Avend sprengt worrn. Meist 12.000 Minschen sünd ut ehr Wahnungen ruthaalt worrn. Ok de Hauptbahnhoff leeg in dat sperrte Flach, dorüm is de Verkehr na wiet weg ümleit worrn.

Medizinscher Nootfalldeenst in Bremerhaben in Tokunft in‘t Klinikum Reinkenheid

Bremerhaben: In Bremerhaben ward de medizinsche Deenst, de för Nootfäll praat steiht, nee opstellt. Betto weer de Deenst an’t fröhere Ameos-Klinikum, dat aver middewiel dicht is. Vun hüüt an övernimmt dat Klinikum Reinkenheid. Düsse Nootdeenst is dacht för Patschenten, de buten de normalen Spreekstünnen op’n mal Wehdaag hebbt. Dat schall de Nootopnahm entlasten.

Mannslüüd överfallt Restaurang-Mitarbeitersch in Bremen-Osterholt

Bremen: In Bremen-Osterholt is en Restaurang-Mitarbeitersch na’t Dichtmaken vun’n Laden vun fief Mannslüüd överfallen worrn. Se hebbt de Froo mit en Metz trüch in’t Restaurang dwungen, den Huustresor utrüümt un sünd denn flücht. De Polizei hett kort darna söss Lüüd in en Auto fastnahmen, vun de se denkt, datt se dat daan hebbt. Se harrn en Metz, Masken un en Boorgeldbedrag dorbi. De Mannslüüd vun 16, 17 un 22 Johr hebbt se nu wegen sworen Roov op’n Kieker.

Dat Weer

Un nu en Blick op dat Weer: In Bremführ -8, in Bremen un Bremerhaben -6, in Leer -5, un in Cuxhaben sünd dat opstünns -3 Graad. Hüüt gifft dat veel Sünnschien. Dorto bildt sik över Dag’n poor lockere opstiegen Wulken, de sik bet to’n Avend wedder oplöst. Dat blifft heel un deel dröög. Na frostigen Temperaturen an’n fröhen Morgen stiggt dat Thermometer op 0 bet 2 Graad. In de Nacht is de Heben toeerst meisttiets klaar, vun Middernacht an treckt vun’t Emsland her’n poor dünne Wulken op. Dat blifft wieter dröög, ward aver noch köhler as toletzt mit -3 bet -5 Graad op de Eilannen un -8 bet -10 Graad op’t Fastland. Morgen gifft dat wedder veel Sünnschien, na Westen hen sünd hööchstens wenige dünne Wulken dorbi. Dat blifft dör de Bank dröög bi 1 bet 2 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Marc Gelhart.