Plattdeutsche Nachrichten Plattdüütsche Narichten vun'n 18. Februar 2025

USA un Russland snackt över de Tokunft vun de Ukraine

Riad: Russlands Butenminister Sergej Lawrow un de US-Butenminister Marco Rubio kaamt in Saudi-Arabien tohoop. Snacken wüllt se över dat, wat twüschen de beiden Länner nich rund löppt. Man to allereerst warrt dat woll um den Krieg in de Ukraine gahn. Europa un de Ukraine sülvst blievt butenvör. De ukrainsche Präsident Wolodymyr Selenskyj sä: Förm em kann keen Afspraak gellen, bi de de Ukraine nich mit an’n Disch seten hett.

Europas Top-Lüüd vun Staaten un Regerungen verlangt Sekerheiten för de Ukraine

Paris: Wenn in de Ukraine en fasten Freden op Duer kamen schall, denn geiht dat blots mit faste un klore Garantien för de Sekerheit. Dat hett de franzöösche Präsident Emanuel Macron op X schreven. Vörher harr he mit en Reeg Top-Lüüd vun Staaten un Regerungen in Europa tohoopseten. Bi dat Drapen in Paris weren ok de EU un de Nato mit an’n Disch. Beslaten hebbt se nix, un se sünd ok nich övereens kamen, wat se Suldaten schicken wüllt, wenn Kiew un Moskau en Fredensafkamen maakt.

Staatsakt för fröheren Bunnspräsident Köhler

Berlin: Wo de fröhere Bunnspräsident Horst Köhler Anfang Januar dootbleven is, nimmt de düütsche Politik vundaag Afscheed mit en Truer-Staatsakt. De Reed höllt Bunnspräsident Frank-Walter Steinmeier. En Truer-Staatsakt gifft dat in Düütschland nich faken. He drückt allerhööchste Achtung ut. Bunnspräsident weer Köhler vun 2004 bet 2010, as he dat Amt vun sik ut afgeven hett. Köhler is 81 Johr oolt worrn.

Künstliche Intelligenz kann Hoochwater anseggen

Hamborg: Klimaforschers an de Uni Hamborg hebbt en KI-Modell utklookt, dat anseggen kann, wo faken Hoochwater kummt un wo hooch dat Water denn oplöppt. För de Noordseeküst bi Cuxhaven weer dat Modell so akraat, dat se nu ok dat Hoochwater in Cuxhaven för de tokamen teihn Johr utreken köönt. Bet 2029 blifft dat bi sowat twölf mal Hoochwater in’t Johr. Man dat normale Hoochwater warrt woll 50 Zentimeter höger oplopen – op dree Meter. Achterna mööt wi dormit reken, dat dat Water noch höger anstiggt.

Post: Wahl-Unnerlagen kaamt to laat

Bremen: De Düütsche Post hett togeven: Ja, hier un dor hebbt se in Bremen de Wahl-Unnerlagen to laat utlevert. En Sprekersch sä: To vele Mitarbeiders in’t Stadtgebiet weren krank. De Post sorgt aver dorför, dat Lüüd, de wählen dröfft, de Breefwahl-Paperen to rechter Tiet kriegt. Vörher harr dat Bremer Wahlamt anseggt: De siene Unnerlagen för de Bunnsdagswahlen bet vundaag nich in sien Breefkassen hett, schall sik stantepee mellen.

Dat Weer

Un woans süht dat mit dat Weer umto ut? Opstunns hebbt wi in Rotenborg 8 Graad unner 0, in Bremen un Bremerhaven sünd dat minus 5 Graad un in Emm minus 4. Vundaag: Sunnschien satt, blots na Westen to hangt mal en poor dünne Wulken an’n Heven. Dröög. Dat Thermometer krabbelt op 0 bet 2 Graad. De Wind dorto weiht eerst flau, an’n Namiddag en beten mehr vun de oosten bet süüdoosten Kant. Tokamen Nacht kriegt wi de Steerns to sehn. Blots in’n Westen en poor dünne Wulken, dat blifft dröög. Bi kole 2 bet 8 Graad unner 0. Morgen: Mehr Sunnschien un dröög, blots an’n Namiddag kann de een oder anner dünne Wulk dörtrecken. Dat Ganze bi 3 bet 5 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Sven Weingärtner.