Plattdeutsche Nachrichten Plattdüütsche Narichten vun'n 19. Februar 2025

In´n Staatsdeenst drauhen neje Warnstreiks

Potsdam. In den Staatsdeenst vun den Bund un de Kommunen gifft dat in de tokamen Weeks wedder Warnstreiks. Dat hebbt de Gewarkschoppen ankünnigt. Grund is, wiel in de tweete Runn vun de Tarifverhanneln in´n Staatsdeenst an´n Avend nix bi rutsuert weer. De Gewarkschop verdi smiet den Arbeitgevern vör, jümmer noch kien Angebott vörleggt to hebben. Verdi verlangt acht Perzent mehr Geld. Tominnst man 350 Euro un dree Dag mehr free. Bunnsministersch Nancy Faeser un de dat Leit bi dat Verhanneln hebbt, wiesen op de knappen Kassen un de Interessen vun de Stüerbetahler hen.

US-Präsident Trump will noch in´n februar mit Russland över Ukrainekrieg verhanneln

Washington. US-Präsident Donald Trump plant noch in düssen Maand en Drapen mit den russ´sch Präsidenten Wladimir Putin. Na Drapen vun de Butenministers vun beiden Lännern, weer he toversichtlich in´n Betog op en Enn vun den Ukraine-Krieg, see Trump. Intwüschen hett de Staatspräsident vun Frankriek Emanuel Macron för vunavend wedder egen Beradens to´n Ukraine-Krieg ankünnigt. Plant is en Videodrapen mit Vertredern vun en poor europäisch Staaten. Dor könen aver ok nich-europäisch Lännern mitmaken, as to´n Bispill Kanada. En Freden op Duer is blots mit de Ukraine un den Europäers to maken, see Macron.

Ok Bremen richt Dublin-Zentrum för nee ankamen Flüchtlinge in

Bremen. Dat Land Bremen sammelt opstunns nee ankamen Minschen op de Flucht, de över en anner EU-Land inreiist sünd, zentral in twee Quarteren. Dat vermellen dat Binnen- un dat Sozialressort op Nafraag vun buten un binnen. Dorbi geiht dat üm de, as dat nöömt warrt, Dublin-Fallen. Dat bedüüd Flüchtlinge, bi de en anner EU-Land för dat Asylverfohren tostännig is. En vun de beiden Quarteren is för Familien vörsehn, de anner för enkelte Personen. Ok anner Bunnslänner richten opstunns Dublin-Zentren in. Dat schall dat Torüchföhren in de tostännigen EU-Länner gauer maken.

Bremen verteken as eenzigstet Bunnsland Towass bi Booverlöven

Bremen. As eenzigstet Bunnsland hett Bremen in dat verleden Johr en Towass bi de Booverlöven verteken. Dor wurren rund 37 Perzent mehr Andrääg freegeven as in dat Johr vörher. Dat vermellt dat Statistisch Bunnsamt. In all annern Bunnslännern geev dat en – to´n Deel düütlichen – Torüchgang. Dat Booressort süht vele Grünn dorför, dat Ünnernehmen un Privatpersonen jüst in´t Land Bremen boen wüllt. Ünner annern gifft Bremen Föddergeller för Neeboten. Bavento schrifft sick Bremen weniger Papeerkraam un en ganz fixe Bearbeiden vun Boandrääg op de Fahn.

Weltruumschrott tridd över den Noordwesten in de Eeratmosphäär in

Cloppenborg. Över den Noordwesten hebbt an´n fröhen Morgen en poor Minschen den Wedderintritt vun Weltruumschrott in de Eeratmopsphäär ankieken. As de Polizei vermellt, snacken Anroper ut de Gegend vun Cloppenborg, Damme un Cuxhaben vun en hellen Ding an´n Heven, de as en grode Steernsnupp or en Komet utsehn harr. Na Angaven vun de Polizei schall sick dat üm en Boodeel vun en Weltruum-Fleger hannelt hebben. De Behörden hebbt dat al vörher wussen.

Dat Weer

Un nu noch en Blick op dat Weer: In Emden minus dree, in Bremen-Mitt minus veer, in Bremerhaben minus dree un in Rodenborg Wümm sünd dat opstunns minus fief Graad. Vundag fangt dat bannig kold mit Frost an. Man denn lacht blots noch de Sünn vun baven. An´n Namiddag kamen en poor dünne Wulken dorto. Dat blifft aver dröög un de Wind weiht in Maten. Dat Thermometer wiest dree bit fief Graad. In de Nacht kann man de Sterns an Heven funkelt sehn. Dat blifft dröög. De Temperaturen gahn op minus fief bit minus een Graad rünner. Morn töövt op us en Mischmasch ut Sünnschien un lockeren Wulkenfeller. An´n Namiddag weern die Wulken dichter un in´n Westen vun de Weser fangt dat an to drüppeln. Söven bit acht Graad stahn  denn op dat Thermometer.

Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Markus Weise.