Plattdeutsche Nachrichten Plattdüütsche Narichten vun'n 07. April 2025

Koalitschonsverhanneln geiht wieter

Berlin – Bi dat Koalitschonsverhanneln twüschen CDU, CSU un SPD fangt woll de Week an, de allens entscheden ward. Vör allens de Union steiht ünner Drock. Junge-Union-Baas Winkel draut mit een „Nee“ to een mögelk Koalitschonsverdrag, wenn sik de Unionsparteien nich noog dörsett. Winkel sä to de Süddütsche Zeitung, in den Verdrag mutt de Politikwessel binnen sien, de in’n Wahlkampf versproken woorn is.

EU-Hannelsminister hollt Raat över Trumps Tölle

Luxemborg – De Hannelsminister un –ministersche vun de EU-Staaten kummt hüüt tosamen, üm Raat to hollen. Dat geiht üm den Tollstriet mit den USA. Se wüllt vör allens daröver snacken, woans se op de Sünnertölle antern wüllt un woans een US-Präsident Trump darto kriegt, dat he se wedder trüchnimmt.

32-Jöhriger in Bremen dootschaten

Bremen – In Woltmershusen is in de Nacht een Mann op apen Straat dootschaten worrn. De Polizei seggt, dat Anwahners mellt hebbt, dat dar schaten worrn is. In de Straat „An’n Bohnenkamp“ hebbt de Beamten denn den 32-Jöhrigen funnen. He weer vun een paar Kugeln drapen worrn, jede Hölp keem vör em to laat. Woso dat passeert is, weet se noch nich. De Mordkommischon ermiddelt nu un söökt Tügen.

Polizei fangt mit Blitzer-Marathon an

Bremen – De Polizei meet düsse Week in velen Bunneslännern dat Tempo, mit dat de Lüüd op de Straten ünnerwegens sünd – ok in Bremen un Neddersassen. De ADAC vermellt, dat dar 14 Bunneslänner mitmaakt, blots dat Saarland un Berlin sünd nich darbi. In Bremen schüllt jeden Dag een paar Trupps mit Blitzern an wesselnden Steden in’n Insatt sien.

Lööpt nich allens rund op de Bahnstreek Bremen-Hannober

Bremen – Twüschen Bremen un Hannober fohrt vun hüüt an dree Weken lang keen Tog eenfach dör. Darachter stickt Booarbeiden an een Bahndamm bi Wunstorf. IC-Töög föhrt gar nich twüschen Bremen un Hannober. Regionaltöög fohrt blots twüschen Bremen un Neestadt an’n Rübenberge, vun dar geiht dat denn mit Bussen un de S-Bahn wieter.

Dat Weer

Un nu een Blick op dat Weer: op Wangerooge un in Deefholt 7, in Bremen un Bremerhaben sünd dat opstunns 8 Graad. Vundag gifft dat wieter veel Sünn, an’n Namiddag kummt een paar lockere Wulken darto un gegen Abend treckt vun de Küst een paar deepe Wulken op. Mit Regen is aver nicht to reken – bi 11 bit 14 Graad. An de See bi 8 bit 10 Graad. Tokamen Nacht breedt sik een paar dicke Nevelfeller ut. Dat Thermometer sackt op plus 5 bit plus 2 Graad an de Küst un 0 bit minus 1 Graad in’t Binnenland. Morrn hett de Sünn dat erst swar, meist överall hollt sik dicke Nevelfeller. Bit to’n laten Vörmiddag lööst se sik aver faken op. An’n Namiddag un Abend hebbt wi in’t Werser-Ems-Rebeet blangen een paar lockeren Wulken denn ok wedder Sünnschien. In’n Oosten vun de Werser ward dat wulkiger, man liekers dröög. Bi 11 Graad an de Küst un 15 Graad in’t Binnenland. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.