Plattdeutsche Nachrichten Plattdüütsche Narichten vun'n 4. April 2025

Trump will över US-Toll snacken

Washington: Eerst harr US-Präsident Donald Trump sien Toll-Paket bekannt maakt, un nu hett he anseggt: Dor kunn een över snacken. Wenn Länner wat to verhanneln hebbt, denn kunn een Deals maken, sä Trump. Mit dat Toll-Paket in de Hand kunnen de USA goot wat uthanneln. Trump rekent dormit, dat vele Unnernehmen Fabriken in de USA opboot, denn fallt keen Opslag an. In de EU wüllt se gau en Antwoort op den Toll-Striet finnen. EU-Hannelskommissar Maros Sefcovic will vundaag mit de Amerikaners snacken.

AfD so hooch as noch nie in ARD-Düütschlandtrend

Berlin: De AfD steiht in den ARD-Düütschlandtrend so hooch as noch nie. Infratrest dimap hett fraagt un 24 Perzent hebbt seggt, se deen dat Krüüz bi de AfD maken, wenn Sünndag Bunnsdagswahl weer. De Partei liggt knapp achter de Union, de bi 26 Perzent steiht. De SPD kummt op 16, de Grönen op 11 un de Linke op 10 Perzent. FDP un BSW wörrn jümmers noch nich över dat 5-Perzent-Mark kamen.

Verfatensgericht in Süüdkorea: Präsident Yoon afsett

Seoul: In Süüdkorea weer Präsident Yoon Suk Yeol al afsett worrn. Nu hett dat Verfatensgericht seggt: Ja, de Andrag vun dat Parlament weer rechtens. Nu hebbt se in dat Land twee Maand för en Wahl. Yoon harr Anfang Dezember dat Kriegsrecht in Süüdkorea utropen. Wat dor achter steken hett, weer en Striet mit de Oppositschoon över den Huusholt.

E-Katamaran na Nördernee nimmt Bedriev op

Noorddiek: En E-Katamaran bringt vun hüüt op an Lüüd vun Noorddiek na de Insel Nördernee. Dat is dat eerste Fährschipp unner düütsche Flagg, dat blots elektrisch andreven warrt, vör allen mit Sunn-Energie. De Reederee Norden-Frisia hett in den Haven vun Noorddiek allens opboot, wat to’n Laden nödig is. De Fohrt na Nördernee duert nu nich mehr een Stunn as bi de groten Fährscheep, man blots noch en halve. Dorför kost dat aver ok en beten mehr.

Scheten vör den Bahnhoff Bremerhaven-Lehe: Perzess löppt

Bremen: Seggt warrt, he harr vör den Bahnhoff Bremerhaven-Lehe op en Reeg Minschen schaten. Dorum steiht just nu en Mann vun 64 Johr vör dat Landgericht Bremen. De Anklaag seggt: Dat weer versöchten Moord. Bi dat Scheten verleden Oktober is een Minsch verletzt worrn un muss noot-opereert warrn. De Staatsavkaatschap seggt: Streden hebbt se sik um en Handwarks-Termin. Wenn de Mann Schuld kriggt, kunn he levenslang achter Trallen kamen.

Dat Weer

Un woans süht dat mit dat Weer umto ut? Opstunns hebbt wi in Cuxhaven 10 Graad, in Bremerhaven sünd dat 12 un in Bremen un Nienborg 13 Graad. Vundaag: Eerst lachen Sunnschien un överall dröög. An’n Namiddag un Avend kaamt en poor opstiegen Wulken dorto. Dat blifft aver hell un kloor. Dat Thermometer krabbelt op warme 17 bet 21 Graad, an de See 11 bet 16. De Wind dorto weiht flau oder en beten mehr. He dreiht vun de oosten op de noorden Kant. Tokamen Nacht blenkert de Steerns. Na Middernacht köönt ok mal Wulkenplacken dörtrecken, dat blifft aver dröög. An de See bi 6 Graad, anners bi 5 bet 1 Graad. Morgen: Vun de Elv her: Mal Sunnschien, mal treckt Wulken dör. Dröög. An’n Avend warrt dat denn vun de Noordsee her wedder wat heller. Mit 9 Graad op Wangeroog un 12 bet 15 Graad in’t Binnenland doch en ganz Stück köhliger as vörher. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jem Anja Guse.