Plattdeutsche Nachrichten Plattdüütsche Narichten vun'n 12. Dezember 2024

Wehrminister Boris Pistorius verlangt mehr Insatz vun Düütschland in Syrien

Berlin: Minister för Verdeffenderen Boris Pistorius verlangt mehr Insatz vun Düütschland in Syrien. Achterna dat Assad-Regiem stört wurr mööt man nu op de Milizen togahn, see Pistorius. Dat weer en Fehler, dat sik in Europa meist nüms intensiv üm dat Vörankamen in Syrien kümmert un dat Feld an Enn Putin överlaten hett. Dat geiht nu dorüm, so Pistorius, aftowenn, dat de Terrormiliz IS wedder starker warrt.

Drogenbeopdraagte sorgt sik över anstiegen Drogenkonsum

Berlin: De Drogenbeopdraagte vun de Bunnsregeern sorgt sik över den anstiegen Crack-Konsum in Düütschland. To de Bildzeitung see Burkhard Blienert, en grötter Rutföddern is de Crack-Konsum in düütschen Grootstädern. Dorto is en wassen Problem, dat unbekannte un meist synthetsche Stoffen op den Markt hannelt warrt. Blienert verlangt mehr Hölp, ünner annern Rüüm to´n konsomeren un Drogenteststeden.

Veel junge Minschen betwiefeln eegen politschen Influss

Gütersloh: Dat Geföhl, dat de eegen politsche Insatz nix bringt, is bi junge Lüüd in en aktuellen Studie wiet verbreedt. Blots jedeen Föffte glöövt doran, dat dat en Ünnerscheed maakt, sik persönlich för en bestimmtst Anliggen intosetten. Dat is bi en Ümfraag twuschen 16 bet 30 Johrige rutsuert. Blots 8 Perzent vun den Deelnehmers sünd övertüügt dorvun, dat de Politik de Sorgen vun junge Minschen eernst nimmt.

Letzt Bodeel vun de Friesenbrüch över de Ems insett

Weener: Dat letzte Bodeel vun de Friesenbrüch över de Ems is verleden Nacht insett worrn. Negen Johr is dat her, dat en Frachter de Brüch rammt un dormit twei maakt hett. De Neebo hett sik jümmer wedder hensleept. De Bahn maakt künnig, dat de Kosten bi mehr as 200 Million Euro liggen. För dat Inswimmen vun dat Brüchdeel wurr de Ems opstaut. Midd 2025 schall de Brüch denn ganz fardig sien.

Bremsche Börgerschop besluut Huusholt för tokamen Johr

Bremen: De Bremsche Börgerschop warrt hüüt Middag den Huusholt för 2025 för dat Land un de Stadt Bremen besluten. To´n eersten Mal siet mehreren Johren will Bremen dütmol ahn nee´e Schullen utkamen. Binah söss Millarden Euro warrt dat Land Bremen tokamen Johr utgeven. Dat sünd rund söss Perzent weniger as düt Johr. Finanzsenator Björn Fecker beschrievt den Etat as „tokunfswiesend“ – liekers den Druck to sporen.

Dat Weer

Un nu kiekt wi op dat Weer: In Bremen un Möppen hebbt wi dree Graad, in Bremerhoben veer Graad un in Emm sünd dat opstunns fief Graad.

Hüüt wedder meist gries aver ok meist dröög, vun Flach to Flach is Spütterregen mööglich un dat bi dree bet fief Graad in´t Binnenland un söss Graad op de Eilannen. In de Nacht sünd wiederhen dicke Wulken an Heven, meist dröög, hier un dor drieselt dat. Dat Thermometer wiest us veer Graad op de Eilannen un twee bet een Graad in´t Binnenland. Morgen fangt erst gries mit dicke Wulken an, liekers blifft dat dröög. Övern Namiddag schafft de Sünn dat denn aver in´n süüden Neddersassen tominnst kort an de Wulken vörbi. Un dat bi twee bet dree Graad in´t Binnenland un veer Graad op de Eilannen.

Dat weren de Plattdüütschen Narichten. Tohoopstellt vun Sven Weingärtner. Op platt torechtmaakt un vörleest vun Martina Brünjes.