Plattdeutsche Nachrichten Plattdüütsche Narichten vun'n 10. Dezember 2024

Scholz un Macron beed Syrien an mitnanner to arbeiden

Berlin: Bunnskanzler Olaf Scholz un de Präsident vun Frankriek Emmanuel Macron willt vun d` Grundsatz her mit de nee`en Machthebbers vun Syrien tosamen arbeiden. Man blots, wenn se de Minschenrechte inhollt, un de Schutz för ethnischen un religiöse Minnerheiten seker is. Dat seggt een Spreker vun de Bunnsregeerung. Buterdem willt se sik in Syrien för een starket EU-Engagement insetten.

Israel flüggt Angriffen op militärsche Ennen in Syrien

Damaskus: De israelsche Luftwaff hett düchtige Angrepen op militärsche Ennen in Syrien flogen. De Syrische Beobachtungsstee för Minschenrechte snackt vun mehr as 100 Attacken in 12 Stünnen. Man hett ok Forschungssteden, Lager för Wapen un Flegerhabens dropen. An´t Morrn kunn man in de Hauptstadt Damaskus Explosionen hören. Boss vun de Regeerung Benjamin Netanjahu seggt, dat Israel dat “Gesicht vun´t Neger Oosten verännern will”.

Bi VW-Tarifstreik noch nich enig

Wolfsborg: Bi den Volkswagen-Konzern, de in de Kniep is, is ok bi de veerte Tarifrunn nix bi ruutsuert. De Böversten vun`t Konzern un de Gewarkschaft IG Metall seggt, dat dat mitenanner snacken vernünftig wesen is. Man de Positionen sünd noch wiet utenanner. Volkswagen hett seggt, dat se sparen willt. Dorto höört Dicht maken vun Steden, Kündigungen un weniger Gehalt. De Gewarkschaft verlangt een Perspektiv för jeden enkelt Mitarbeider. In eene Week willt se wieter verhanneln.

Parken an Straten vun Bremen schall dürer werrn

Bremen: De Stadtbörgerschaft will hütt Nomdag över de Parksituation in de Bremer Binnenstadt snacken. Bündnis Düütschland hett eene Aktuelle Stünn to dat plaante Ropsetten vun dat Parkgeld beandraggt. Plaant is, dat man vun´t kamen Fröhjohr an, dat Parken an´t Stratenrand, in de Bremer Binnenstadt, üm eenen Euro hoch sett. Veer Euro kost denn eene Stünn, dat is mehr as in de Parkhüüs.

Ex-Tennistrainer wegen sexuell Vergahn vör´t Brett

Bremerhaben: Een Ex-Tennistrainer ut Bremerhaben kummt an´t Enn vun Januar vör´t Bremer Landgericht. Man smitt em vör, dat he sik an Kinner un junge Lüüd sexuell Vergahn hett. He schall Jungs bi sexuellet Hanneln filmt hebben. Luut Anklage schall dat twischen 2018 un 2023 passiert sien.

Dat Weer

Un nu een Blick op dat Weer: in Defhold 4,in Cuxhaben, Bremen un Bremerhaben sünd dat opstünns 5 Graad. Hütt hebbt wi vele dichte Wulken an´t Heben. Vun`t Osnabrücker Land bit to de Verdener Heid hen kann dat hier un dor mal so´n beten pieseln. Vun Oostfreesland bit to de Elbmünnung kummt ok af un an mal de Sünn dör, bi 5 bit  6 Graad. Tokamen Nacht gifft dat wedder dichte Wulkenfeller, de to de Elb hen later uplockert. Nevel kummt hier un dor up, bi 3 bit -1 Graad. Morrn gifft dat vun de Küst, na Süden hen över Bremen, dat Ollenborger Münsterland un Ossenbrügger Land jümmers wedder Sünnenschien. An´t Nomdag treckt de Heben vun de Nordsee her to un bringt an de Küst Regen mit sik. De Temperaturen liggt bi 3 bit 7 Graad. Dunnersdag is dat meist gries, blots af un an kriegt wi de Sünn mal to sehn. Hier un dor kann denn ok mal Sprütterregen rünner kamen, bi 3 bit 6 Graad. Dat weren de Narichten op Platt. Tohoopstellt hett se Katrin Martens. Trechtmaakt un vörleest vun Antje Kruppa.