Plattdeutsche Nachrichten Plattdüütsche Narichten vun'n 16. Dezember 2024

Kanzler Scholz stellt Vertoensfraag

Berlin: An´t Middag will Bunnskanzler Olaf Scholz in´t Bunnsdag de Vertroensfraag stelln. Dormit will he den Weg för Neewahlen, de man vörtreckt, free maken. Opsichtslüüd glöövt, dat sik blots de SPD un een paar AfD-Afordnete för Scholz utspreekt. Wenn he dat bi de Afstimmung nich schafft, denn so ward he Bunnspräsident Frank-Walter Steinmeier vörslaan, den Bunnsdag optolösen un Neewahlen antosetten. De Termin dorför is denn de 23. Februar.

Merz stellt sik achter Wahlprogramm

Berlin: De Kanzlerkandidat vun de Union Friedrich Merz hett sik achter dat Wahlprogramm vun CDU un CSU stellt.  Dat Wahlprogramm warrt naseggt, dat dor vele Verspreken binnen sünd, man keene Vörslagen, wat an Geld dorför in de Kass is. Merz seggt to de ARD, man will dat System Börgergeld vun´t Kopp op de Fööt stellen. Hier kunn man tweestellige Milliardenberäge insporen.

Tarifverhanneln bi Volkswagen geiht wieter

Hannover: Dat Tarifverhanneln bi den gröttsten Autoboer in Europa, Volkswagen, geiht hütt in de fiefte un villicht wichtigst Runn. Se stüert op hen noch vör Wienachten op en Brett to kamen. Man noch liggt de Positionen wiet utenanner. VW verlangt vun de Mitarbeiders ok 10 Perzent weniger Lohn. Un seggt, dat dat ok wesen kann, dat man Warke dicht maakt un ok Mitarbeiders bedreefsbedingt künnigen mutt. De IG Metall verlagt dorgegen dat man de Standorte hollt un de Garantie hett, datt dat keene Kündigungen gifft.

Staatsgerichtshoff Bremen leggt Oordeel to Utbildungsplatzafgave fast

Bremen: De Staatsgerichtshoff Bremen gifft hütt Vomdag sien Oordeel to de Utbildungsplatzafgave, wo dat mehrere Menen to gifft, bekannt. Vun Januar an sullt all Bedrieve in Bremen un Bremerhaben in eenen Pott inbetahlen. Keen utbillt schall denn för jeden Azubi-Platz eenen fasten Bedrag trüch kriegen. Ok de Hannelskamer und Handwarkskamer meent, dat dat in de Verfaten nich tolaten is.

Bi Nacht-Bosteed op A1 löppt nich allens rund

Bremen: Op de A1 mööt Autofohrers vun´t Avend an, twischen Brinkum un Arsten, mit Maleschen reken. Vun Klock 7 an, hütt Avend, bit morrn fröh Klock 5 kann man blots op eene Spoor fohren. Luut Autobahn GmbH gellt dat för beide Fohrtrichtungen. Grund dorför sünd Arbeiden an de Ochtumbrüch. Dat gellt ok för de Nacht op Middeweeken.

Dat Weer

Un nu een Blick op dat Weer: in Bremerhaben un Defhold 10, un in Emm un Bremen sünd dat opstünns 11 Graad. Hütt sünd vele dichte Wulkenfeller an´t Heben, de hier un dor mal Regen or Sprütterregen mit sik bringt, bi 10 bit 12 Graad. Tokamen Nacht hebbt wie Daak in de hoge Luft, man dat blifft meist dröge. Blots af un an kann dat mal so´n beten nieseln, bi 9 bit 8 Graad. Morrn blifft dat jümmers noch so gries un so mild. Dat kann mal so´n beten Sprütterregen geven. De Temperaturen liggt bi 9 bit 10 Graad.  Middeweeken wedder dichte Wulken de ok Schuers mit sik bringt. De Sünn kummt blots af un an mal dör, bi 10 bit 13 Graad. Dat weren de Narichten op Platt. Tohoopstellt hett se Katrin Martens. Trechtmaakt un vörleest vun Antje Kruppa.