Plattdeutsche Nachrichten Plattdüütsche Narichten vun'n 18. Dezember 2024

Bremer CDU geiht hart in’t Gericht mit de Bildungsbehöörd, bi de de SPD dat Leit hett

Bremen: De CDU is mit de Bildungsbehöörd hart in’t Gericht gahn. Dor achter stickt en Nootbreef vun Direktoren vun Bremer Grundscholen. De CDU snackt vun bankrott un verlangt, Bildung schull in Bremen in de Hand vun den Böversten. Wenn dat um Bremer Scholen geiht, müss ok Börgermester Andreas Bovenschulte mit an’n Disch sitten. Tohoop harrn de Direktoren vun de stadtbremschen Grundscholen Meldung wegen Överlastung maakt un wohrschaut: de ganze Apparaat kunn tweibreken.

Na Attack op russschen General: Mann fastsett

Moskau: Wo güstern en hogen russschen General to Dode kamen is, hebbt de Behörden en Mann fastsett. Seggt warrt: De Mann is 29 Johr oolt un kummt ut Usbekistan. De russsche General Igor Kirillow weer güstern fröh bi en Bombenanslag vör sien Wahnhuus to Dode kamen. Fachlüüd seggt: Dat weer en Terroranslag. De Mann vun 54 Johr weer een vun de Lüüd, de för vele Russen för den Krieg gegen de Ukraine steiht. De Geheemdeenst vun dor hett nu seggt: Ja, dat hebbt wi maakt.

Bremer Polizei: Slag gegen Bedreger-Koppel mit Enkel-Dreih

Bremen: De Polizei hett dree Lüüd fastsett, vun de se meent, de weren mit den Enkel-Dreih unnerwegens. Öllere Lüüd hebbt se vertellt, se weren en Schandarm, een vun de Bank oder en Staatsanwalt. So wullen se an Geld oder Weertsaken ran. De Polizei seggt, de Koppel harr överall in Düütschland wat in Gang. 50 Schandarms harrn sik güstern in veer Hüüs in Bremen umkeken. Funnen hebbt se Geld, düre Uhren un Datendregers.

Afschuven ut Bremen hett nich klappt

Bremen: De Behörden hebbt dat noch mal wedder nich henkregen, en Mann ut't Karkenasyl aftoschuven. Dat hett de Avkaat vun den Mann den Bremer Flüchtlingsraat vertellt. Güstern schull de Mann ut Somalia ut de Remberti-Gemeend in Swackhusen afhaalt un na Sweden brocht warrn. Fehlt hebbt aver de nödigen Paperen. Vörher harr dat in de Bremer Lannsregerung mit SPD, Gröne un Linke Striet geven, woans Lüüd in Karkenasyl behannelt warrn schüllt.

Ieshockey: Fishtown Pinguins sünd rut

Bremerhaven: De Fishtown Pinguins sünd in de Champions League Hockey nich ünner de letzten Veer kamen. De Ieshockey-Kru ut Bremerhaven hett in dat twete Speel gegen Genf blots 2:2 schafft. Un in de Basketball-Champions-League hett güstern Avend Rasta Vechte dat letzte Gruppenspeel to Huus verloren – mit 64:74 gegen Galatasaray Istanbul. Ok Rasta is dormit rut.

Dat Weer

Un woans süht dat mit dat Weer umto ut? Opstunns hebbt wi in Bremerhaven un Weyerbarg 8 Graad, in Bremen un Emm sünd dat 9 Graad. Vundaag: Vun Westen her treckt Regen över dat Bremen-Een-Land weg. Gegen Middag kriegt wi ok mal en drögen Törn, un dat kann ok mal heller warrn. An’n Namiddag kummt aver mehr Smuddelregen vun de See rin. Dat Thermometer krabbelt op warme 11 bet 13 Graad. De Wind dorto weiht frisch un mit deegte Böen, op de Inseln ok mit störmsche Böen. He dreiht vun Süüd op Süüdwest. Tokamen Nacht: Vele Wulken, un de smiet ok mal en beten Natts vun baven. Na Middernacht treckt vun Westen her mehr un ok deegten Regen rin. Bi 11 bet 9 Graad. Morgen bringt dichte Wulken Schuer. An’n Namiddag un Avend ok mal dröög. Bet Middag 11 bet 13 Graad, later denn blots noch 7 bet 5 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.