Plattdeutsche Nachrichten Plattdüütsche Narichten vun'n 27. März 2024

Brüch in de USA fallt tohoop: Woll söss Minschen doot

Baltimore: Wo en mehr as twee Kilometer lange Brüch in den US-Bunnsstaat Maryland tohoopfullen is, meent de Rettungslüüd: Dor sünd woll söss Minschen to Dode kamen. De Küstenwacht seggt: Se söökt nich mehr na Lüüd, de in't Water rinfullen sünd. Vörher harrn se twee Lüüd rett. In Baltimore weer en Containerschipp gegen en Pieler vun en Autobrüch fohrt. Dorvun is en groten Deel vun de Brüch tohoopsackt.

Israel: Hogen Hamas-Kommandöör is doot

Gaza-Stadt: Israel hett vermellt: En hogen Hamas-Kommandöör is doot. Seggt warrt: Dat weer en Top-Mann vun den Hamas-Militär-Twieg. Bi de Anslääg op Israel in’n Oktober harr he en grote Rull speelt. As Israel dat Gaza-Land nu ut de Luft angrepen hett, is he storven. De Hamas hett dor bet nu nix to seggt un vun Israel verlangt, se schullen bewiesen, dat de Mann doot is.

Utsichten: Woneem löppt de Wirtschap hen?

Berlin: De gröttsten düütschen Forschungsinstitute för Wirtschap stellt opstunns frische Tallen to de Utsichten vun de Wertschap vör. Se rekent nu noch weniger dormit, dat de Wirtschap in Düütschland in Gang kummt. För düt Johr schrievt se blots noch en Plus vun 0,1 Perzent. Verleden Harvst harrn se noch 1,3 Perzent ansett. Ok rekent se dormit, dat de Inflatschoon in de tokamen Maanden wieder trüchgeiht.

Vunnamiddag: Fre’e Fohrt op A 27 twüschen Bremen un Bremerhaven

Hagen: Dat afsparrte Stück vun de Autobahn 27 twüschen Hagen un Uthlede warrt vunnamiddag wedder freegeven – een Dag fröher as ansett. Ünner de Fohrbahn weer Water ünnerwegspöölt. Fachlüüd weren bang, de Straat kunn afsacken. Dat Autobahnstück hebbt se för sowat 3 Millionen Euro wedder trechtmaakt.

Düütsche Footballers winnt gegen de Nedderlannen

Frankfort an’n Main: De düütsche Football-Natschonalmannschap hett güstern Avend en Testspeel gegen de Nedderlannen wunnen. Un dat mit twee to een. Dat Twee-Een hett de fröhere Bremer Niclas Füllkrug schaten. Mit Bunnstrainer Julian Nagelsmann hett de düütsche Kru nu in söss Spelen dreemal wunnen. Un denn: Fast steiht nu, wokeen bi de Europameisterschap vun Juni op an allens mitmaakt. Güstern sünd noch de Ukraine, Polen un Georgien wiederkamen.

Dat Weer

Un woans süht dat mit dat Weer umto ut? Opstunns hebbt wi in Bremen 9 Graad, in Bremerhaven, Nienborg un Weyerbarg sünd dat 10 Graad. Vundaag: Eerst dröög mit Sunnschien. An’n Namiddag treckt vun’t Emsland her dichte Wulken op, de ok en beten Regen mitbringt. Ööstlich vun de Werser blifft dat bet na’n Avend hen dröög. Dat Thermometer krabbelt op 12 Graad op de Inseln bet 17 Graad in’t Binnenland. De Wind dorto weiht flau oder en beten mehr, he dreiht vun Süüdoost över Süüd op West bet Noordwest. Tokamen Nacht: Wulken över Wulken, un de smiet veel un deegten Regen op us daal, vör allen twüschen Werser un Elv. Gegen Morgen warrt dat vun Westen her wat dröger. Bi 7 bet 5 Graad. Morgen: De letzten Regenflagen treckt över de Elv na Noordoosten af. Denn pliert ok de Sunn mal dör de Wulken dör. Man vun’t Emsland kaamt över Dag wedder Wulken rin, ut de dat ok wedder pladdern kann. Blots noch 11 bet 12 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.