Plattdeutsche Nachrichten Plattdüütsche Narichten vun'n 19. Dezember 2024

Bunnsdag will över Schuul vun´t Bunnsverfatensgericht spreken

Berlin: De Bunnsdag bestimmt hüüt över den Schuul vun dat Bunnsverfatensgericht. Ziel is, dat baverste düütsche Gericht unafhängiger vun politschen Inwarken to maken. De Richter dröfft denn to´n Bispill nich wedderwählt warrn, un se mööt bestimmt mit
68 Johren utscheden. Betnu köönt düsse Regeln mit en eenfachen Mehrheit in den Bunnsdag ännert warrn. Üm dor en P vörtosetten, schüllt se in´t Grundgesett fastleggt warrn.

EU-Top-Drepen mit Beraden to Syrien un de Ukraine

Brüssel: De Staats- un Regerensbaas vun de EU snackt hüüt, bi ehr letzt Drepen düt Johr, över de Laag in de Ukraine. Dorbi warrt över wiedere militärsche Stütt un Hölp för de Energieversorgen för Kiew diskereert. Russland hett toletzt jümmer wedder Karnkraftwarken mit Raketen un Drohnen angrepen, üm de Infrastruktur in de Ukraine twei to maken. Wieter warrt bi dat Top-Drepen över de Situatschoon in Syrien un den Machtwessel snackt.

Projekten för Bremer Arbeitsstütt streken

Bremen: Vunwegen dat Geld vun den Europääschen Sozialfond ESF op dat Bremen hööpt hett nich kummt, fallt mehrere Projekte vun de Arbeitsstütt in Bremen to´n Johrsenn överraschend weg. Dat hett de tostännige Behöörd, na Buten-un-Binnen-Informatschoon, den Steden nu künnig maakt. Annern warrt dorto de Toschüss för dat tokamen Johr bannig kört. Bedrapen sünd to´n Bispill Düütschkursen för Flüchten, Bewarbertrainigs för behinnert Minschen un Beraaden un Hölp för angahn Modders.

Schausteller in Bremen mööt högere Afgaven betahlen

Bremen. Op Johrmarkten schüllt Schausteller in Tokunft högere Standafgaven betahlen. De nee Geböhrenornen hett de Weertschopsdeputatschoon an Namiddag op den Weg brocht, se mutt nu noch vun de Stadtbörgerschop beslaten warrn. De Weertschopsbehöörd hööpt dorbi op Mehrinnahmen vun 1,3 Milloon Euro. De Bremer CDU bekriddelt de anstiegen Kosten för de Standbedriever.

Wiehnachtsklassiker: Kantuffelsalaat is düer worrn

Köln: De Pries för Kantuffelsalaat mit Mayonaise is in den verleden Johrn düütlich na baven kladdert. Dat hebbt Forschers vun dat „Institut de Düttschen Weertschop“ utrekend. In Vergliek to dat vörig Johr kladdert de Pries üm 4,6 Perzent. Dormit is de Kantuffelsalaat dürer worrn as annere Levensmiddel in den glieken Tietruum. In jedeen drütten Huusholt gifft dat an Hilligavend traditschonell Knackwust un Kantuffelsalaat.

Dat Weer

Un nu kiekt wi op dat Weer: In Emm sünd dat olben Graad, in Bremerhoben un Möppen twolf Graad un in Bremen hebbt wi opstunns darteihn Graad. De Dag fangt mit dicke Wulken un jümmer wedder Regen an. Övern Namiddag warrn de Wulken vun de Nordsee her weniger un dat is af un an ok mal dröög. Dat Thermometer wiest hüüt vörmiddag eerst twolf bet darteihn Graad, vun Middag af an warrt dat köhler bi söven bet negen Graad. In de Nacht wesseln sik Wulken un Steerns af, meist hebbt de Wulken de Nees vörn, jümmer wedder schuert dat man ok Grisselgrussel is dorbi. An de Küst kann dat kort mal Gewidder geven bi söss Graad op Wangeroog un fief bet veer Graad in´t Binnenland. Freedag sünd meist dicke Wulken an Heven, de Sünn schafft dat aver hier un dor sik an de Wulken vörbi to schuven, wedder mischt ok de Regen mit. In Richten Emsland warrt dat an Namiddag meist dröög un dat denn bi söss bet acht Graad.

Dat weren de Plattdüütschen Narichten. Tohoopstellt vun Michael Kück. Op platt torechtmaakt un vörleest vun Martina Brünjes.