Plattdeutsche Nachrichten Plattdüütsche Narichten vun'n 30. August 2024

Anslag vun Solingen in’n Bunnsdags-Utschuss

Berlin: In den Binnen-Utschuss vun den Bunnsdag snackt se hüüt Vörmiddag över den Anslag vun Solingen, de woll en islamistischen Achtergrund hatt hett. De Bunnsregerung un de tostännige General-Bunnsanwalt schüllt Bericht geven. Güstern harr de Regerung en Paket vörstellt, mit dat se Lüüd, de na Asyl söökt, in Schranken sett. Ok dat Waffenrecht in Düütschland schall strenger warrn.

Sprütt-Akschoon in’t Gaza-Land kann losgahn

Gaza-Stadt: In den Gaza-Striepen köönt se nu vele Lüüd gegen Kinnerlähmung impfen. De Weltgesundheitsorganisatschoon WHO vermellt: Israel hett toseggt, in bestimmte Gegenden warrt dree Daag lang nich schaten. Dat gellt vun Sunndag op an vun morgens Klock 6 bet namiddags. De Vereenten Natschonen wüllt 640.000 Kinner in’t Gaza-Land de Sprütt gegen Polio geven.

Bremerhaven schall püker warrn

Bremerhaven: De Stadt will ehren Börger- un Ordnungsdeenst vun nu 30 op 95 Steden hoochsetten. De Magistrat schall dor en Plaan för opstellen, in den binnensteiht: Wat kost dat in’t Johr, wat is mit Utbildungs- un Deensttieden un wo genau schall de Deenst unnerwegens ween? Dat hett de Versammeln vun de Stadtverordneten fastleggt. De Börger- un Ordnungsdeenst schall mehr as nu op den Verkehr oppassen un dor wat gegen doon, dat Autos in de twete Reeg oder op den Footweg afstellt warrt.

Bremer Traditschoons-Unnernehmen maakt dicht

Bremen: Bi de Bremer Silverworen-Manufaktur Wilkens un Söhns löppt vundaag dat letzte Mal de Verkööp an‘t Wark in Bremen-Hemeln. Verleden Johr weer rutkamen: De Firma is bankrott. So geiht de Unnernehmens-Geschicht vun mehr as 200 Johr Wilkens un Söhns in Bremen to Enn.

Maleschen op de A 27

Bremerhaven: Op de A 27 bi Bremerhaven löppt vun hüüt op an nich allens rund. Na Noorden to is twüschen Bremerhaven-Zentrum un Bremerhaven-Överseehavens blots een Fohrbahn free. Dat blifft so bet Enn Oktober. Vörher harrn se hier de Autobahn na Süden enger maakt. Wat dor achter stickt: Se ünnersöökt den Unnergrund, denn hier wüllt se in de tokamen Johren Brüchen nee opstellen.

Dat Weer

Un woans süht dat mit dat Weer umto ut? Opstunns hebbt wi in Bremen un Weyerbarg 16 Graad, in Bremerhaven un op Börkum sünd dat 18 Graad. Vundaag: Langs de Küst: Dröög mit mal Sunnschien, mal en poor Wulken. Wieder na Süden to staht de Wulken dichter tohoop, un vun’t Emsland över Bremen bet hen na dat Ole Land kann Regen daalkamen oder ok de een oder anner Schuer. An’n Namiddag lockert dat wat op. Dat Thermometer krabbelt op blots noch 19 bet 22 Graad. De Wind dorto weiht flau, an de See ok en beten mehr, vun de noordwesten bet noorden Kant. Tokamen Nacht: Ok süüdlich vun Bremen lockert de Wulken mehr un mehr op. De Steerns funkelt un dat blifft dröög. Bi 16 oder 15 Graad op de Inseln, anners 12 bet 9 Graad. Morgen: Hell un fründlich mit Sunnschien un en poor lockere Wulken. De meiste Sunn lacht an de See, süüdlich vun Bremen mehr Wulken, man ok hier druppelt dat blots af un an mal. Dat Ganze bi 21 bet 24 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Ralph Stölting.