Plattdeutsche Nachrichten Plattdüütsche Narichten vun'n 3. September 2024

Union maakt Druck vör Snacken över Migrationspolitik

Berlin: Vertrederinnen un Vertreder vun de Ampel-Koalition, de Union un de Bunnslänner willt an´t Nomdag doröver snacken wat dor, na de Attack mit ´n Mess in Solingen, achterher kümmt. Grundlage dorför schüllt de Vörsläge vun de Bunnsregeerung vun de verleden Week sien. CDU Boss Friedrich Merz verlangt wieter to gahn. De egentlichen Probleme sünd nich dat Wapenrecht or dat Afschuven. Dat Thema Nummer 1 mööt eene Grenz för dat Towannern sien.

Negen Johr na Dieselgate kummt Ex-VW-Vörstand Winterkorn vör´t Brett

Brunswiek: 9 Johr na den Afgasschandaal bi VW schall hütt de Staafperzess gegen den Ex-Boss Martin Winterkorn los gahn. Vör dat Landgericht Brunswiek willt se glieks de Anklage gegen den 77 –jöhrigen vörlesen. Winterkorn smitt se Bedregeree in´t Gewerbe, Manipulation an´t Markt un Legen för.

Bremer Senat bringt Larmaktionsplaan op den Weg

Bremen: De Senat will in sien Sitten den nee`en Larmaktionsplaan op den Weg bringen. Dat geiht dorüm, dat man den Larm in de Stadt düütlich rünner sett. Plaant sünd mehr Bussen un Bahnen, een LKW-Leitplaan, Wännen gegen Larm un ok nee`e 30 ger-Zonen.

Britische Suldaten föhrt dör Neddersassen

Emm: Op de Straten in Neddersassen gifft dat vun hütt an eene grote Reeg vun Geleitautos vun`t Britische Militär. Fohrtüüg un Personal sünd mit Schipp na Emm kamen. Vun´t Haben geiht dat för se all denn in de Kasern na Paderborn. Dor schall een grotet Manöver to´n Öven stattfinnen. Bit Freedag sünd denn, na Angaven vun de Armee, jeden Dag bitt to 70 Militärfohrtüch in en Reeg vun Koppeln ünnerwegens.

Bargen vun den Frachter Verity, de ünnergahn is, willt se afsluten

Langeoog: Wenn dat Weer mitspeelt willt se hütt dat tweete Wrackdeel vun den Frachter Verity, de ünnergahn is, bargen. Dat Boogdeel is 50 Meters lang un 580 Tunnen swoor. Bi dat Bargen kummt de starksten Swümmkraans ut Europa to´n Insatz. Letze Week hebbt se all dat Heckdeel vun dat Schipp, vun den Grund vun de See,  hooch haalt. De Wrackdeele bringt se denn in de Nedderlannen. Dor willt se de Deele utenanner nehmen.

Dat Weer

Un nu een Blick op dat Weer: in Nienborg, in Bremen, in Bremerhaben un in Ollenborg sünd dat opstünns 18 Graad. Hütt gifft dat eenen Wessel ut Sünn un dichte Wulken. Hier un dor kann dat ok mal düchtig Pladdern, deels ok mit Blitz un Dunnerslag. To de Elb hen gifft dat mehr Sünnenschien, man an de Ems sünd vele Wulken ünnerwegens. Dat is bruttig warm, bi 22 bit 28 Graad. Tokamen Nacht geiht dat mit de Schuers un Gewidder hier un dor wieter. Later treckt de Wulken denn över de Elb un de Nordsee af. Dorna blifft dat denn meist dröge. Daak un Nevel kann sik billen, bi 19 bit 16 Graad. Morrn Vomdag lööst sik de Nevel op un de Sünn kummt dör. Man denn kummt vun de Nedderlannen un NRW dicke Wulken op, de Schuers un Gewidder mit sik bringt. To´n Avend hen kann dat ok mal länger onnig gallern. Hier un dor kann dat ok Land ünner geven! De Temperaturen liggt bi 20 bit 25 Graad. Dunnerstag eerst vele Wulken un meist dröge. To de Elb hen kummt mehr de Sünn dör, bi 20 bit 24 Graad. Dat weren de Narichten op Platt. Tohoopstellt hett se Irene Lottes. Trechtmaakt un vörleest vun Antje Kruppa.