Plattdeutsche Nachrichten Plattdüütsche Narichten vun'n 4. September 2024

Punkte över Asyl- un Sekerheitspolitik warrt rechtlich prövt

Berlin. Bund, Länner un Vertreder vun de Union wüllt na ehr Drapen över dat anners maken in de Asyl- un Sekerheitspolitik güstern Avend wieder in´n Uttuusch blieven. As de Bunnsbinnenministersch Nancy Faeser vermellt, weern nu eerst eenmal de Punkte, över de se snackt hebbt, rechtlich prövt. CDU-Baas Friedrich Merz wiest sick open för noch mehr Drapen. He will aver an dat Verlangen vun de Union fasthollen un makt to Bedingen: Lüüd de Asyl sökt mööt in Tokunft an de düütschen Grenz torüchwiesen weern könen.

Mitarbeiders vun Volkswagen drapt sick

Wulfsborg. De Mitarbeiders bi den Autobuer Volkswagen sünd in Wulfsborg to en Bedrievsversammlung tosamen kamen. De Mitarbeiders wüllt mit den VW-Vörstand över de ankünnig Spoorakschonen diskereren. De böverste Etasch vun den Konzern kann sick in Tokunft dat Dichtmaken vun Warken un op de Straten setten vun Mitarbeiders vörstellen. Dat makt se üm düchtig sporen to könen. Bedrievsrat un de Gewarkschop IG Metall hebbt al grode Gegenwehr ankünnigt.

Mitnehmen vun Metzen op Volksfesten verboden

Bremen. Dat Mitnehmen vun Metzen schüllt op Volksfesten as den Bremer Freimarkt al bold heel un deel verboden ween. Dat steiht in en Poppier ut den tostännigen Utschuss vun de Bremschen Börgerschaft. För de Initschatiev vun dat Wirtschaftsressorts mutt dat Bremsche Oortsgesett ännert weern. Dat Ressort will mit düssen Schritt ok op de mörderische Attack mit en Metz in Solingen mit dree Doden vör goot een Week reageren.

96 Johr old Mann stört in´t Gleisbett

Demorst. In den Bahnhoff vun Demorst is güstern en 96 Johr old Mann in dat Gleisbett stört un vun en Togg mitreten wurren. De Bunnspolizei ünnersökt nu, wo dat passeren kunn. De Mann hett böös wat afkregen un muss in en Krankenhuus flogen weern. Wegen den Unfall keem dat to Maleschen in den Bahnverkehr.

Warnstreik bi Radio Bremen

Bremen. Bi Radio Bremen löppt in Ogenblick en Warnstreik. Achtergrund is dat Verhanneln över de Tarife twüschen de Gewarkschoppen, Radio Bremen un de Bremedia. Dat kann dorüm to Folgen bi den Höörfunk, bi dat Feernsehn un in dat Onlineangebott kamen.

Dat Weer

Un nu noch en Blick op dat Weer: In Ollenborg 19, in Bremen-Mitt un in Bremerhaben 21 un in Deefholt sünd dat opstunns 20 Graad. Vundag sünd dichte Wulken an´n Heven. De Sünn schafft dat nich würklich dör de Wulken to kieken. Hier un dor is Regen un ok en kortet Gewidder möglich. An´n Namiddag un Avend pladdert dat hier un dor reell. Düchtige Gewidder sünd ok hier un dor möglich. De könen so düchtig ween, dat dat „Land ünner“ bedüden kann. En rusig Weer. De Wind weiht en beten. Dat Thermometer wiest 21 bit 26 Graad. In de Nacht sünd noch vele Wulken an´n Heven. Hier un dor pladdert dat ok noch. Starke Gewidder könen ok dorbi ween, so dat dat wieder „Land ünner“ heet. 16 bit 19 Graad stahn denn op dat Thermometer. Morn fangt de Dag mit Wulken an. In´n Dagsverlop lacht de Sünn vun baven un dat blifft drög bi 25 bit 27 Graad.

Dat weern de Narichten op platt. Tohoopstellt hett se Jan Siegert. Op Platt trechtmaakt un vörleest vun Markus Weise.