Plattdeutsche Nachrichten Plattdüütsche Narichten vun'n 05. September 2024

Däägt Regen richt veel Schaaden an

Bremen: In dat Land Bremen un in Neddersassen richt rusig Weer veel Schaden an. In een Stünn hett dat in Bremen so veel regent as anners in een Maand. Dorophen worrn Straaten, Tunnel un Keller ünner Waater sett. De Bremer Füerwehr hett seggt, dat se rund 400 Insätz harr. Man ok Bus un Bahn aver ok Toogverkehr, twuschen Bremen un Ollenborg, weren dorvun bedrapen.

Merz stellt Ampel Ultimatum bi de Asylpolitik

Berlin: Bi de Diskusschoon wo man tokamen Tiet mit de Asyl- un Migratschoonspolitik wieder maakt, maakt de Union de Bunnsregeern wiederhen Druck. Se puckt op gauer Besluten över ehr Verlangen, Immigranten bi de Inreis an de Grenz torüchtowiesen. CDU-Baas Friedrich Merz verlangt op ene Wahlkampf-Veranstalten in Brannenburg sogor en fastschreven Verkloren bet tokamen Dingsdag, wat SPD-Generalsekretär Kevin Kühnert aver torüchwiest.

Millioon Dode dör Luftversmuddeln

Genf: Na de Weltweerorganisatschoon, WMO, starvt jeed Johr rund veereenhalv Millioon Minschen an slechte Luft. Luftversmuddeln is woll dat gröttste Ümweltrisiko, heet dat in den nee´en Bericht vun de UN-Organisatschoon. Se schrifft vun en Düvelskrink, de sik jümmer starker op de minschliche Gesundheit, de Ökosystemen, aver ok op de Landweertschop utwarkt.

Bremen plaant Messverbott op Volksfesten

Bremen: Op Volksfesten in de Stadt Bremen rückt en Messverbott nöger. De tostännige Fachutschuss vun dat Lannsparlament hett dat Verbott güstern Avend op den Weg brocht. För de Bremer Polizei maakt dat kuntrullen ahn Grund vun verdächtig Minschen mööglich. Mit dat Verbott will Weertschopssenatorsche Kristina Vogt Konsequenzen ut den Meesanslag von Solingen trecken, bi den en Mann dree Minschen dootsteken hett.

Bedrievsversammeln in dat VW Wark Emm

Emm: Hüüt warrt bi en Bedrievsversammeln vun dat Emmner VW-Wark över deTokunft snackt. Vörweg hett de Volkswagen Kunzern künnig maakt, mööglicherwies ok twee Warken in Düütschland dicht to maken. Dat Emmner Wark gellt eegens as seker, wiel dat eerst annerletzt för 1,3 Millarden Euro för den Bo vun Elektroautos ümrüst wurr. Güstern geev dat bi en Bedrievsversammeln in dat Stammwark in Wulfsborg kien kloore Utsagen, wo veel Mitarbeiders gahn schüllt un wecke Warken dicht maakt warrn.

Dat Weer

Un nu kiekt wi op dat Weer: In Möppen sünd dat 19 Graad, in Bremen, Bremerhoben un Emm hebbt wi opstunns överall 20 Graad. Hüüt lacht vun Middag af an överall de Sünn un wi seht kien Wulken an Heven. Dat Thermometer wiest us 28 bet 31 Graad in´t Binnenland un 25 bet 26 Graad op de Eilannen. In de Nacht seht wi meist de Steerns funkeln, na Middernacht sünd ok mal Wulken an Heven, man dat blifft dröög bi twintig bet 19 Graad op de Eilannen un an de Küst, un 17 bet 16 Graad in´t Binnenland. Morgen wedder veel lachen Sünnenschien, en poor Wulken sünd ok dorbi aver dat blifft dröög bi 27 bet 29 Graad in´t Binnenland un 24 bet 26 Graad an de Waterkant.

Dat weren de Plattdüütschen Narichten. Tohoopstellt vun Katrin Martens. Op Platt trechtmaakt un vörleest vun Martina Brünjes.