Plattdeutsche Nachrichten Plattdüütsche Narichten vun'n 06. September 2024

Ukraine-Kuntaktgrupp snackt över wiedere Hölp för de Ukraine

Rammsteen: De Ukraine-Kuntaktgrupp snackt just nu op de US-Militärbasis in Rheinland-Pfalz över wiedere militärsche Stütt för de Ukraine. Blangenbi de Ministers för Verdeffenderen un baverste Militärvertreder vun de foftig Liddmaten de Ukraine-Kuntaktgrupp warrt ok op Präsident Wolodymyr Selenskyj töövt. An´n Namiddag is en vertrolich Drepen mit Bunnskanzler Olaf Scholz in Frankfurt am Main plaant.

Bunnskanzler Scholz gifft Start-Teken för IFA in Berlin

Berlin: Bunnskanzler Scholz hett dat Start-Teken för de 100. Mess för Ünnerhollenselektronik un Huusholtstechnik IFA geven. Düt Johr warven de Utrichters mit den Slogan „Innovatschoon för All“. All tohoop schall de Mess düt Johr jünger un internatschonaaler warrn. De Utrichters töövt op rund 182.000 Besökers bet Dingsdag.

Videoöverwachen op Hillmannplatz in Bremen geiht los

Bremen: De Hillmannplatz in de Binnenstadt warrt vun nu af an Videoöverwacht, dorto gifft dat en mobile Polizeistatschoon. Dat höört to dat Sekerheitskunzept, wat Polizei un Binnensenator güstern bi de Binnendeputatschoon vörstellt hebbt. Opletzt hett dat jümmer mehr Verbreken op den Hillmannplatz geven. De Videoöverwachen is eerstmal bet Enn 2024 verlööft – Grundlaag is dat Bremsche Polizeigesett.

Tahl vun Cyberattacken op düütsche Havens stiggt an

Nordenham: De Haven-Sekerheit is Hauptthema op den neddersässchen Havendag. Dor achter stickt de grote Tahl vun Hackerattacken siet den russchen Angreep op de Ukraine. De Tahl hett sik verhunnertfacht, man ok in Bremen un Bremerhoben. Meist hebbt de Hacker de Internettsieten vun Havensellschoppen in Sinn, meent Bremenports. De Bremer BLG Kunzern seggt, betnu kunnt en groten Schaden verhinnert warrn.

Oppositschoon bekriddelt Tietplaan för Saneeren vun Bremer Werserbrüchen

Bremen: De Verkehrsbehöörd hett güstern in de Bodeputatschoon ehren Tietplaan för dat Saneren vun de Werserbrüchen vörstellt. Alltohoop söss Brüchen mööt bet 2030 utbetert warrn. De Oppositschoon bekriddelt, dat so jümmer wedder to glieke Tiet an verscheeden Brüchen arbeid warrn schall. Dormit drauht en Verkehrschaos, wat dat betnu noch nich geven hett, see CDU-Verkehrspolitiker Michael Jonitz.

Dat Weer

Un nu kiekt wi op dat Weer: In Möppen un Emm hebbt wi 20 Graad in Bremen un Bremerhoben sünd dat opstunns 21 Graad. Hüüt lacht wedder örntlich de Sünn, en poor Wulken sünd ok dorbi un dat blifft dröög. An Namiddag un Avend warrn de Wulken vun dat Münsterland un Werserbargland mehr, dat kann ok mol kort Schuers geven, meist blifft dat aver dröög bi 27 bet 30 Graad in´t Binnenland un 25 bet 26 Graad op de Eilannen. In de Nacht seht wi en poor lütte Wulken, an de Ems ok mal mehr, dor kann dat ok mal pladdern, anners blifft dat dröög bi 19 Graad an de Waterkant un 17 bet 15 Graad in´t Binnenland. Morgen wesseln sik Wulken un Sünn af, hier un dor sünd Schuers mööglich, meist blifft dat aver wedder dröög bi 26 bet 30 Graad in´t Binnenland un 24 bet 25 Graad an de Küst. Sünndag eerst daakig un achterna lacht de Sünn, denn hebbt aver jümmer mehr de Wulken de Nees vörn un dat kann ok Schuer un Gewidder geven bi 24 bet 27 Graad in´t Binnenland un 22 bet 24 Graad op de Eilannen.

Dat weren de Plattdüütschen Narichten. Tohoopstellt vun Gabriele Intemann. Op Platt trechtmaakt un vörleest vun Martina Brünjes.