Plattdeutsche Nachrichten Plattdüütsche Narichten vun'n 9. September 2024

CSU-Boss Söder verlangt Grenz för Towannerung

München: CSU-Boss Markus Söder will för de Tall vun Asylandräge düütlich eene Grenz setten. Söder snackt vun wiet ünner 100.000 pro Johr in Düütschland. Jüst nu sünd dat an de 300.000. Söder seggt in de ARD, dat man mit dat , wat dorbi rutsuert un de Integration vun de Minschen nich kloor kummt. In vele düütsche Städte föhlt sik de düütschen Inwohner nich mehr tohuus, seggt he. Morrn will de Bunnsregeerung wedder mit de Opposition över de Inwannerungspolitik beraden.

Kniep bi Volkswagen- Politiker verlangt Hölp vun de EU

Berlin: Vunwegen de Kniep bi den Autoboer VW verlangt hoge Politiker, vun de Bunnsreegerung, Hölp ut Brüssel. SPD-Boss Lars Klingbeil seggt to de Süddüütsche Zeitung, EU-Kommissionspräsidentin Ursula von der Leyen mutt nu flink eenen Industrie-Kurs vörleggen. FDP-Fraktionsboss Christian Dürr gifft de EU ok eene Mitschuld an de Probleme. Dürr seggt, dat de afsurde europä`sche Politik de Autoindustrie vele Steene in den Weg leggt.

Lawei för Wohrschau bi de Spoorkass

Bremen: Bi de Filialen vun de Spoorkass mutt man hütt den ganzen Dag mit lütte Haken reken. Hier un dor maakt Filialen villicht ok ganz dicht. Grund dorför is een Streik-Uproop vun de Gewarkschaft Verdi in den Tarifstreik, de jüst löppt. Alle Anstellten vun de Bremer Spoorkass sünd to eenen Lawei för Wohrschau opropen, de den ganzen Dag anduern schall. Verdi verlangt 12,5 Perzent mehr Geld, tominnst aver 500 Euro mehr pro Maand.

Paralympics in Paris is to Enn

Paris: De paralympischen Spelen sünd an´t Avend in Paris mit eene grote Fier to Enn gahn. Staatspräsident vun Frankriek Emanuel Macron hett sik bi de, de dat plaant hebbt un de, de dor mitmaakt hebbt för de Wettstrieden vun de verleden Weeken bedankt. Dat düütsche paralympische Team hett 49 Medallien holt un liggt dormit bi den Medallien-Spegel op Platz 11. Op den eersten Platz liggt China.

Ieshockey: Fishtown Pinguins vergeigt tweetet Champions League-Speel

Bremerhaben: De Fishtown Pinguins hebbt ehr tweetet Speel in de Vörrünn vun de Ieshockey-Champions-League vergeigt. Gegen den Swiezer Vizemeister HC Lausanne hebbt se, to Huus, 2 to 1 eenen op de Mütz kregen. Dat Optaktspeel harr Bremerhaben dorvör noch wunnen. De komen Partie is an´t tokomen Dunnerstag.

Dat Weer

Un nu een Blick op dat Weer: in Bremen 14, in Ollenborg 15, in Neenborg 16 un Bremerhaben sünd dat opstünns 17 Graad. Hütt hebbt wi dichte Wulken an´t Heben, man dat blifft eerst noch dröge. Vun´t Emsland her lockert dat op un de Sünn kummt mal dör. Man later treckt vun´t Emsland her wedder Schuers op, ok mit Blitz un Dunnerslag, bi 19 bit 22 Graad. Tokamen Nacht mal mehr mal weniger Wulken, de meist in´t Oosten vun de Weser Schuers mit Gewidder mit sik bringt. De Nacht is frisch, bi 15 bit 11 Graad. Morrn geiht dat mit dichte Wulken los, de Sünn schafft dat blots hier un dor mal dör de Lücken to pielen. Ton´n Nomdag hen kummt vun de Nordsee her Schuers op, ok mit Blitz un Dunner.  De Temperaturen liggt bi 17 bit 19 Graad. Middeweeken blifft dat so wesselhaft. Jümmers wedder gifft dat nee`e Schuers un Gewidder , bi 14 bit 16 Graad. Dat weren de Narichten op Platt. Tohoopstellt hett se Michael Kück. Trechtmaakt un vörleest vun Antje Kruppa.