Plattdeutsche Nachrichten Plattdüütsche Narichten vun'n 11. September 2024

USA: Kandidaten för dat Präsidentenamt gaht in TV-Duell opeenanner daal

Philadelphia. De beiden Kandidaten för dat Präsidentenamt in de USA, Kamala Harris un Donald Trump, sünd to´n eersten mal in en Fernsehdebatt direkt openanner drapen. Beide hebbt sick dorbi gegensiedig Vörholden makt. De republikanisch Bewarver Trump hett de Demokratsche Harries mehrmals as „radikal Linke“ betekend, de dat Land in en Afgrund sörten warrt. Harris smiet Trump wedder mal vör to lögen, he hett de USA as Präsident 2021 in en gräsigen Tostand achterlaten. De Wahl is Anfang November.

Delen vun en Brüch in Dresden tosamenbroken

Dresden. In de Binnenstadt is en Deel vun en Brüch över de Elv tosamenbroken. De Füerwehr vermellt, dat dat Bowark op en Läng vun um un bi eenhunnert Meter inbroken weer. Dor hett nüms wat afkregen. De ganze Gegend üm de Brüch is wiederhen dicht. Bi den Tohoopfall wurren ok Fernwärmeleitungen kaputt makt. De Versorgen in dat Stadtgebeet is ünnerbroken. Dat is noch nich kloor, woso dat to dat Unglück kamen is.

Schaustellers vun Volksfesten in Bremen wehren sick gegen dubbelt Standgebühr

Bremen. De Schausteller vun Bremen wehren sick gegen dat vun de Wirtschaftsbehörde plante Verdubbeln vun de Standgebühren bi Volksfesten. De Vörsitter vun den Schaustellerverband Bremen, Rudolf Robrahn, verlangt vun dat Ressort, de Kosten vun den Freimarkt un de Oosterwiese to´n Bispill open to leggen. De Wirtschaftsbehörde Bremen argumentert, dat de Standgebühren toletzt vör elven Johrn höger makt wurren un de Kosten sietdem düütlich hooch gahn weern.

Mehr un mehr Waterkontrollen op Müll in Bremen un Neddersassen

Bremen. Vundag fangen besünners Kontrollen vun Strööm un Seen in Bremen un Neddersassen op illegal Müll an. Dat geiht to´n Bispill dorüm, of Binnen- or Freetiedschipper Müll un anner giftigen Kraam, de nicht rechtens sünd, in Strööm un Seen afföhren. De Scheep weern dorophen vun de Waterschutzpolizei vun beiden Lännern överprövt. De Kontrollen lopen een Week lang.

Football Nations-League: Düütschland un Nedderlannen spelen Unentscheden

Amsterdam. De Düütsche Football-Natschonalmannschop hett in de Nations-League güstern Avend twee to twee Unentscheden speelt. Na en fröhen torüch ween gung Düütschland eerstmal noch mit en twee to een – Föhrung in de Halftiet. De Doren för Düütschland schoten Deniz Undav un Joshua Kimmich. De DFB-Mannschop steiht in de Tabell vun de Grupp dree dormit wieder op den eersten Platz.

Dat Weer

Un nu noch en Blick op dat Weer: In Hooksiel thein, in Bremen-Mitt elven, in Bremerhaben twölf un in Bassen sünd dat opstunns thein Graad. Vundag gifft dat en klass´sch Schuerweer mit mehr Wulken as Sünnschien un jümmer nejen Regenschuern as ok enkelte Gewidder. De Wind weiht vun de süüdwesten bit westen Kant. In´t Binnenland in Maten mit frischen bit starken Böen. An de See af un an frische bit stieve Böen. Dat Thermometer wiest 14 bit 16 Graad. In de Nacht wesseln sick dichte Wulken un Wulkenlöcker af. Dat blifft meist överall dröög, wenn de Regenschuer aftrecken. Fief bit elven Graad stahn denn op dat Thermometer. Morn schient neven Wulken af un an de Sünn. Regen gifft dat blots an de Küst. An´n Namiddag ok in´t Binnenland. Dat Thermometer wiest 14 bit 16 Graad.

Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Markus Weise.