Plattdeutsche Nachrichten Plattdüütsche Narichten vun'n 13. September 2024

Tschechien un Polen reken mit böse Watersnoot

Prag: En poor Naberlänner vun Düütschland maakt sik för de slimmste Watersnoot siet Johrteihnten trecht – un twors Tschechien, Polen Österriek un de Slowakei. De tschechsche Ümweltminister Petr Hladik wohrschaut, de Laag künnt so slimm warrn as bi dat rusig Weer 1997 un 2002. Ok Düütschland hett damals wat afkregen, dat rusig Weer föhrt to dat Oderhoochwaater un fief Johr later weer denn de Johrhunnertfloot in Dresden.

Deelafriet vun Dresdener Carola-Brüch hat anfungen

Dresden: Dat Afrieten vun de Carola-Brüch blifft vigeliensch. De Polizei mellt, dat fröh an Morgen en wiederen Afsnitt afsackt is. Dorbi hannelt sik dat üm en Deel vun de Brüch mit Straatenbahngleisen, de al vör twee Daag instört un to´n Deel in de Elv fullen weer. Siet güstern Avend is en Fachfirma dorbi Deele vun de Brüch aftodrägen. Dorbi mööt de Arbeiders bannig vörsichtig vörgahn, vunwegen de Gefohr besteiht, dat dat ganze Bowark in de Elv stört.

Vele Gemenden sünd na en Ümfraag vun Extremweer bedrapen

Berlin: Mehr as dree Vertel vun de Gemenden in Düütschland hebbt in den verleden teihn Johren Extremweervörfäll so as Starkregen, lange Hittperioden un Dröögde beleevt. Dat vermellt dat Redaktschoonsnettwark Düütschland un beröppt sik dorbi op en Ümfraag vun dat Ümweltbunnsamt. Liekers hett man blots jedeen achte Gemeend betnu en Plaan, wo se sik an de Folgen vun den Klimawannel anpassen will – um un bi een Veertel arbeid, na eegen Angaven, in Momang an en Lösen.

Trump will kien wiederes TV-Duell mit Harris

Washington: In den US-Präsidentschopswohlstriet warrt dat woll kien wieder Fernsehduell twuschen Trump un Harris geven, vunwegen de republikansche Bewarver Trump dat aflehnt. Harris hett dorgegen kloor maakt, dat se en wieder Tweekampf will. Experten hebbt vermellt, dat de Demokratin in ehren eersten Drapen för Kameras mit Trump övertüügt un den Republikaner in de Defensiev drängt hett.

Bremen will vun Müllsünners Geller kasseern

Bremen: In Bremen draff woll bold de Butendeenst vun de Stadtreinigung direktemang Wohrschogeller gegen „Müll-Sünner“ anoorn. Dat hett de Ümwelt-Deputatschoon beslaten. De Fachpolitiker hapen dorto, dat en Utbo vun den Butendeenst pö a pö hölpt de Stadt schierer to holen un de Tahl vun verbaden Affallbargen lütter to maaken.

Dat Weer

Un nu kiekt wi op dat Weer: In Bremen hebbt wi 8 Graad, in Möppen 9 Graad, in Emm sünd dat 12 Graad un in Bremerhoben hebbt wi opstunns 13 Graad. Hüüt wesseln sik wedder Sünn un Wulken af, man an de Küst un üm de Werser umto kann dat Schuer geven. Vun´t Ole Land över de Lüneborger Heid blifft dat meist dröög bi 15 bet 17 Graad. In de Nacht mal mehr mal weniger Wulken dorto gifft dat Schuers, de vun de Nordsee in´t Land trecken aver över Nacht weniger warrn. Dat Thermometer wiest us 13 Graad op de Eilannen un 11 bet 5 Graad in´t Binnenland. Sünnavend wedder en Mix ut Wulken un Sünn mit en poor lütten Schuern, de wedder vun de Nordsee in´t Binnenland trecken, meist blifft dat aver dröög bi 15 bet 17 Graad. Sünndag meist Wulken, af un an schubst de Sünn mal de Wulken an´ne Siet, wietgahns dröög bi 17 bet 19 Graad.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.