Plattdeutsche Nachrichten Plattdüütsche Narichten vun'n 17. September 2024

Tall vun Doden na Hoochwater stiggt

Breslau: In’t Hoochwater in Süüd- un Oosteuropa sünd wietere Minschen to Dode kamen. Middewiel sünd ut Öösterriek, Tschechien, Polen un Rumänien 18 Dode mellt worrn. Veele Oorten staht ünner Water. Polen hett för 30 Daag den Katastrofentostand utropen. Bunnskanzler Scholz hett verspraken, datt he de Naverlänner Stütt un Stöhn geven will.

Ok in’n Noordwesten stiegen Waterpegel wohrschienlich

Lünborg: Wegen dat Hoochwater in Tschechien un Polen rekent Fachlüüd to’n Enn vun de Week ok mit stiegen Water an de Elv in Neddersassen. Mit en groden Hoochwater as in de Johren 2002, 2006 oder 2013 is aver opstünns nich to reken, as dat tostännige Amt vermellt. De Pegelstänn an’n neddersäss’schen Deel vun de Elv sünd in’n Momang woll ok eher siet.

Intel boet nee’e Chipfabrik later

Magdeborg: De Chiphersteller Intel verschuuvt vöreerst den plaanten Bo vun en Fabrik in Sassen-Anhalt. Dat Projekt ward woll noch twee Johr länger duern, as dat US-Ünnernehmen vermellt hett. Grund dorför sünd rode Tallen bi Intel un dat Spoorprogramm, dat dorüm gellt. De Bunnsregeern hett för den Bo vun de Fabrik 10 Milliarden Euro dortogeven wullt.

Bremerhabener Polizisten hebbt to veel to doon

Bremerhaben: De Mitarbeiders vun de Oortspolizeibehöörd klaagt över to hoge Arbeitslast wegen to wenig Personaal. Dat is bi en Ümfraag ünner de meist 500 Mitarbeiders rutsuert, de hüüt vörstellt ward. De Bremer Landsregeern will na den Koalitschoonsverdrag 80 nee’e Steden in de Oortspolizeibehöörd Bremerhaben schaffen, un twars bet 2027.

Autos in Walle utbrennt

Bremen: In’n Bremer Westen sünd in de Nacht fief Autos utbrennt. Passeert is dat op den Parkplatz vun en Supermarkt in’n Oortsdeel Oosterfüerbarg. Na Angaven vun de Füerwehr is nümms versehrt worrn. Betto gifft dat keen Utkunft vun de Hölpslüüd, woso dat brennt hett.

Dat Weer

Un nu en Blick op dat Weer: In Bremen un Deefholt 14, in Bremerhaben un Leer 15, un op Borkum sünd dat opstünns 17 Graad. Hüüt Vörmiddag hollt sik faken veele Wulken as hogen Daak, de sik blots langsam oplöst. Se bringt aver blots enkelte Druppen, un hier un dor schient ok mal de Sünn. Vun Middag an löst sik de deepen Wulkenfeller mehr un mehr op, so datt bet to’n Avend blangen lockere Wulken fakener de Sünn dörkummt bi 18 bet 19 Graad op de Eilannen un 20 bet 22 Graad in’t Binnenland. In de Nacht breedt sik vun Elv un Noordsee her jümmer mehr dichte Feller mit hogen Daak ut. Dat blifft aver överall dröög bi 16 bet 11 Graad. Morgen lockert un löst sik de Feller mit hogen Daak bet to’n Middag to’n gröttsten Deel op, so datt later för längere Tiet de Sünn schienen kann. Dat blifft heel un deel dröög bi 20 bet 22 Graad op de Eilannen un an de Küst, un 25 Graad in’t Binnenland.

Dat weern de Narichten op platt. Tohoopstellt hett se Sven Kuhnen. Op Platt trechtmaakt un vörleest vun Marc Gelhart.