Plattdeutsche Nachrichten Plattdüütsche Narichten vun'n 18. September 2024

Hisbollah-Pager womööglich mit Sprengstoff manipuleert

Beirut. Na de Exploschoon vun lütten Apparaten to´n Kommunizeren in den Libanon, de womööglich manipuleert weern, hebbt de Vereenten Natschonen vör en Eskalatschoon in den Oosten Blangenbi wohrschaut. Güstern weern hunnerte vun düssen lütten Apparaten meist to glieke Tiet in de Luft gahn. Negen Minschen sünd dootbleven. Üm un bi 2.800 hebbt wat afkregen. Vele Versehrte sünd Liddmaten vun de Hisbollah-Miliz. Na Medienberichten schüllt de israelisch Geheemdeenst de lütten Apparate mit Sprengstoff präpareert hebben. De Hisbollah drauht dormit dat trüchtobetahlen.

Merz kann sick kien Koalitschon mit den Grönen vörstellen

Berlin. CDU-Baas Friedrich Merz kann sick kien Koalitschon mit den Grönen in Ogenblick vörstellen. In de ARD see he an´n Avend, dat kien anner Partei vun de politisch Mitt bi den egen Anhängers in Ogenblick so en Groll in Gang sett. Bi en Ümfraag vun dat Forsa Institut keem ruut, dat blots jeedeen fiefte Minsch Merz för en passlich Kanzlerkandidaten hollt. Dartig Perzent vun de Lüüd, de se fraagt hebbt, weern för den Bunsminister för´t Verdeffenderen Boris Pistorius.

Oberverwaltungsgericht vun Bremen verhannelt dat Afschuven vun en Imam

Bremen. Dat Oberverwaltungsgericht vun Bremen verhannelt vundag den Fall vun en Imam, to den dat mehrere Menen gifft. De islamisch Prediger harr in de eerste Instanz wunnen un mutt nich na Tunesien utwiesen weern. Dor is de Binnensenator vun Bremen, Ulrich Mäurer, gegen an gahn. He geiht dorvun ut, dat de Imam ok in Tokunft to Haat un Woot opropen waart.

Metzen op Volksfesten in Bremen in Tokunft verbaden

Bremen. De Stadt-Börgerschaft hett en Verbott vun Metzen op Volksfesten in Bremen fastleggt. Dormit reageert Bremen op de mörderisch Angrepen mit Metzen in Düütschland in de verleden Maanden. De Gesettännerung gellt af eersten Oktober – also vör den Anfang vun den Freimarkt in Bremen.

Neje Fähranbeder na Norderney

Noorddiek: Af Noorddiek is en neje Fährlinie na Norderney anfungen. In Tokunft schall de neje Autofähr „Meine Fähre Eins“ vun de Norderneyer Reederee mit den sülvigen Naam, veermal an Dag twüschen dat Eiland un dat Festland hen un herfohren. Dormit kriegt de Reederee AG Norden Frisia to´n eersten Mal siet 1871 en Mitbewarver op de Streck.

Dat Weer

Un nu noch en Blick op dat Weer: In Cuxhaben 15, in Bremen-Mitt 14, in Bremerhaben 15 un in Emden sünd dat opstunns 14 Graad. Vundag sünd noch en poor Nevel- or Hoochnevelfeller to sehn. Af den Middag schient mehr un mehr de Sünn. An´n Namiddag un Avend lacht de Sünn mehrsttiets neven en poor dünnen Wulken vun´n Heven. De Wind weiht en beten bit in Maten. Op de Eilannen sünd dat 20 bit 22 Graad. In´t Binnenland wiest dat Thermometer 24 bit 25 Graad. In de Nacht sünd an´n Heven meist en poor Wulken. Hier un dor sünd man de Sterns to sehn. Later kamen vun de Nordsee dichte Wulken un enkelte Nevelfeller. Dat Thermometer wiest elven bit 16 Graad. Morn fangt dat gries an. Later gifft dat en Mischmasch ut dünnen Wulken un Sünnschien. An´n Namiddag könen vun dat Ossenbrügger Land över de Middelweser-Region bit to de Aller un Lümborger Heid korte Regenschuer un Gewidder opdükern. 20 bit 24 Graad stahn denn op dat Thermometer.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Markus Weise.