Plattdeutsche Nachrichten Plattdüütsche Narichten vun'n 23. September 2024

SPD winnt Landdagswahl in Brannenborg

Berlin: De SPD hett de Landdagswahl in Brannenborg wunnen. So as dat för’t Eerste utsüht, kummt de Partei vun Ministerpräsident Woidke op 30,9 Perzent vun de Stimmen. De AFD kummt darna mit 29,2 Perzent. Dat Bündnis Sahra Wagenknecht hett ut’n Stand 13,5 Perzent schafft. De CDU is op 12,1 Perzent afrutscht, de Grönen sünd ut’n Landdag rutflagen. För en Regeern mit SPD un CDU fehlt een Mandaat för en Mehrheit.

Verkehrsminister leggt Pries för Düütschlandticket fast

Berlin: De Verkehrsministers vun de Länner stimmt hüüt över den tokamen Pries för dat Düütschlandticket af. Na dat digitale Extradrapen is för den Vörmiddag en Presskonferenz plaant. Bet Enn vun’t Johr kost dat Billjet noch 49 Euro per Maand, darna ward dat wohrschienlich dürer.

Neddersassens Gesundheitsminister will Tabakstüer hoochsetten

Hannover: Neddersassens Gesundheitsminister Philippi will dat Smöken dürer maken. He will de Tabakstüer höger setten. De Pries för een Schachtel Zigaretten kann na Menen vun den SPD-Politiker gern op 10 oder 11 Euro stiggen. De Extrainnahmen will Philippi dorför insetten, datt mehr in‘n Vörut gegen dat Smöken daan ward.

Bedrievsversammeln bi Thyssenkrupp wegen Wegstrieken vun Steden

Bremen: De Anlagenboer Thyssenkrupp informeert opstünns sien Mitarbeiders över dat plaante Wegstrieken vun Arbeitssteden an’n Standort Bremen-Farge. Genaue Tallen sünd betto nich bekannt. Bedrievsraat un Gewarkschaft hebbt Gegenwehr gegen de Plaans künnig maakt un Thyssenkrupp swore Fehlers bi’t Management vörsmeten. In Farge arbeit üm un bi 550 Minschen un boet dor Montageanlagen för Verbrenner- un Elektromotoren.

Autobahn 27 bi Nordholt af un an sperrt

Nordholt: Autofohrers mööt op de A27 bi Nordholt vun hüüt an mit wietere Maleschen bi’n Verkehr reken. An de Bosteed twüschen Nordholt un Olenwoold ward de eenzig free’e Spoor Richtung Bremen an dree Weekendaag vörmiddags sperrt. Na Utkunft vun de Autobahn GmbH ward dat woll bet Enn Oktober anduern.

Dat Weer

Un nu en Blick op dat Weer: In Deefholt un Emmen 12, in Bremen 13, in Cloppenborg 14, un in Bremerhaben un Cuxhaben sünd dat opstünns 15 Graad. Hüüt schuuvt sik vun Süüdwesten her jümmer mehr Wulken vör de Sünn, un middags sünd vun de Grafschaft Bentheim bet to’t Ossenbrügger Land eerste Druppen oder lichte Schuers mööglich. An’n Namiddag un Avend gifft dat mehr Wulken as Sünnschien, un vun Süüdwest na Noordoost treckt’n poor Schuers un enkelte korte Gewidder mit Gewaltschuers dör. Dat Thermometer kladdert op 19 bet 22 Graad. In de Nacht ward de Schuers weniger un treckt över Elv un Noordsee af. Dat lockert eerst op, later ward Oosten de Werser de Wulken wedder mehr, un to’n Morgen hen is hier un dor’n beten Regen mööglich bi 15 bet 11 Graad. Morgen gifft dat düütlich mehr Wulken as Sünnschien, un besünners vun Middag an gifft dat faken Schuers un dat een oder anner Gewidder bi 17 bet 19 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Marc Gelhart.