Plattdeutsche Nachrichten Plattdüütsche Narichten vun'n 27. September 2024

September-Maand: Weniger Lüüd ahn Arbeit

Nörnbarg: Dat dat op den düütschen Arbeitsmarkt nich recht löppt, geiht ok in’n September-Maand wieder. Ahn Arbeit sünd 66.000 Lüüd weniger. De Bunnsagentur för Arbeit vermellt: Dat sünd nu 2.806.000 Minschen. De Tallen gaht aver langsamer trüch as normal in’n September. De Quoot is um 0,1 Punkt op 6,0 Perzent trüchgahn. Ok in Neddersassen un Bremen weren de September-Tallen för Minschen ahn Arbeit lütter. Man ok hier sünd de Tallen nich so dull trüchgahn as in de verleden Johren.

Bunnsdag snackt över Rentenreform

Berlin: In den Bunnsdag snackt dat eerste Mal över dat Rentenpaket II. Dat warrt woll nich licht to, wo doch noch nich mal de Ampel densülvigen Kurs stüert. Na de FDP müss noch wat ännert warrn, denn so stiegt de Rentenbidrääg wieder an. Parteibaas Christian Lindner harr aver kloor maakt, över dat Reformpaket hebbt se noog verhannelt. SPD-Baas Lars Klingbeil wohrschau: Wenn nu nix in Gang kummt, kriegt Millionen Minschen bald veel weniger an Rente.

Nee York: Selenskyj sitt mit Trump tohoop

Nee York: De ukrainsche Präsident Wolodymyr Selenskyj sett sik vundaag tohoop mit Donald Trump, de för de US-Republikaners Präsident warrn will. Eerst wull de Selenskyj nich to Gast hebben. Trump is dorgegen, dat noch mehr Geld an de Ukraine geiht, un he harr bekriddelt, dat Selenskyj nich mit Russland verhanneln will. Vörher harr Selenskyj snackt mit US-Präsident Joe Biden un Kamela Harris, de för de Demokraten dat Präsidenten-Amt övernehmen will. Biden harr toseggt: De Ukraine kriggt noch mal Milliarden för’t Militär.

Florida: Hurrikan kummt an Land

Miami: De Hurrikan „Helene“ kunn gewaltigen Schaden anrichten. Nu is he in den US-Bunnsstaat Florida an Land kamen. Dat hett dat Natschonale Hurrikanzentrum anseggt. Dat Zentrum harr den Warvelstorm op den tweethööchsten Graad veer hoochsett. Dat US-Amt för Katastrophenschutz hett wohrschaut: Dat kunn för dull regen, Land ünner geven, de Stroom kunn utfallen un de Storm kunn böös wat anrichten. Gouverneur Ron DeSantis sä: Een Minsch is al vun Trümmerstücken to Dode kamen.

Bremerhaven: Eurogate nimmt Container-Frachtstatschoon ut den Bedriev rut

Bremerhaven: De Versammeln vun de Gesellschafter vun dat Haven-Unnernehmen Eurogate hett seggt: Ja, en Deel vun den Bedriev in Bremerhaven löppt för sik wieder. Dat geiht um de Container-Frachtstatschoon. Hier packt se Woren in Container um. Dor arbeidt bet 140 vun de um un bi 1000 Eurogate-Mitarbeiters. De Konzern will sik dat Lohngeld woll passlicher inrichten.

Dat Weer

Un woans süht dat mit dat Weer umto ut? Opstunns hebbt wi in Rotenborg 13 Graad, in Bremen, Bremerhaven un Frieseythe sünd dat 14 Graad. Vundaag: Mal mehr Wulken, mal wat heller. Meisttiets dröög. Vun Middag op an treckt vun de Noordsee her mehr Wulken rin, un de smiet an’n Avend vun de See un de Ems her ok düchtig Regen op us daal. Dat Thermometer krabbelt op 16 bet 18 Graad. De Wind dorto weiht frisch vun de süüdwesten Kant, an de See ok deegt oder düchtig. In’t Binnenland deegte bet störmsche Böen. An de See ok ossige Stormböen. Gegen Avend dreiht de Wind op West, an de See op Noordwest, warrt denn aver in’t Binnenland kloor weniger. Tokamen Nacht: Dichte Wulken, ut de dat ok mal pladdert. Na Middernacht warrt de Regen weniger, un denn treckt he na de Aller un de Lümborger Heid af. Gegen Morgen kaamt aver vun de See her mehr Schuer rin. Bi frische 12 bet 7 Graad. Morgen: Vun allens wat: Sunnschien, dichte Wulken, mal en Schuer. An’n Namiddag un Avend kann hier un dor de Sunn de Bavenhand kriegen. Dat blifft bi köhlige 13 bet 14 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Anja Guse.