Plattdeutsche Nachrichten Plattdüütsche Narichten vun'n 30. September 2024

Opstellen vun Regerung un Öösterriek is vigeliensch

Wien: Na de Wahlen för´t Parlament in Öösterriek hett Bunnspräsident Alexander van der Bellen ankünnigt, dat se mit all Parteien snacken willt. Denn dat Opstellen vun de Regerung schient nich so eenfach so sien. Dat eerste Mal is bi de Wahl de rechtspopulistische FPÖ de starkste Kraft worden. De Kanzlerpartei ÖVP, de bit nu de Nääs vörn harr, is nu blots tweete. De anneren Parteien hebbt eene Koalition mit de FPÖ bit nu aflehnt. Tominnst mit ehren Vörsitter willt se nich tosamen kamen.

Israelsche Attacken op Hamas, Hisbollah un Huthi-Rebellen

Gaza: De israelsche Armee geiht wieter düchtig gegen de vör, de op de Siet vun`t Iran staht. In den Gazastriepen, hebbt se, na egen Angaven, eene Kommandozentral vun de islamsistische Hamas ut de Luft angrepen. De Zentral harr de Hamas för dat Planen un Utföhren vun Terrorangrepen gegen israelische Suldaten nutzt. In´t Libanon hett Israel wieter Stellungen vun de Hisbollah- Miliz attakert. De libanesischen Behörden hebbt mehr as 50 Dode mellt. Ok in´t Jemen hett dat Attacken ok op Kraftwarke un eenen Haben geven.

Tempo 30 in Ollenborg

Ollenborg: Op de Hauptstraten in de Stadt schall bald Tempo 30 gellen. De Ollenborger- Verkehrsutschuss hett all „Ja“ dorto seggt. Hütt schall de Rat dat Thema een för allemal op den Weg bringen. Vun`t Enn vun dat kamen Johr an, schall dat op all Hauptverkehrsstraten gellen. Kann wesen, dat man de 30 Zone 2027 denn noch grötter maakt.

Urdeel na Angrepen op Klockenmaker

Bremen: In den Perzess üm den Roovöverfall op eenen Klockenmaker in´t Bremer Viertel schall dat jüst vör´t Landgericht een Urdeel geven. De 21-jöhrige Anklagte schall in´t April eenen 72-jöhrigen Klockenmaker in sien Laden mit Pfefferspray angrepen un brutal daalslaan hebben. Op een Video vun een Oppasskamera kann man sehn, wo de Fro, de dat Geschäft nebenan tohöört, den Angreper verdrieven kunn. De Angreper hett togeven, dat he dat wesen is. Vunwegen versökten sworen Roov drauht em mehrere Johren achter Trallen.

Truer üm Country-Singer Kris Kristofferson

Maui (Hawaii): De US-Country-Singer  un Songwriter Kris Kristofferson is dot. He is in´t Öller vun 88 Johren in sien Huus op Hawaii sturven. Kristofferson gellt as grote un wichtige Songwriter. Seine Songs hebbt ok sungen: Elvis Presley, Johnny Cash, Janis Joplin un Ray Charles. Se sülvst hett in siene Karriere alleen in de USA rund 7 Millionen Alben verköppt. Ok as Schaupeeler harr he Erfolg: 1977 hett he för sein Spööl in dat Drama „A Star is Born“ eenen Golden Globe kregen.

Dat Weer

Un nu een Blick op dat Weer: in Defhold 7, in Emm 8 un in  Bremen un Bremerhaben un sünd dat opstünns 9 Graad. Hütt wesselt sik de Sünn un de dichten Wulken af. To`n Avend hen kummt jümmers mehr Wulken op. Vun´t Emsland her fangt dat denn ok an to pieseln, bi 14 bit 16 Graad. Tokamen Nacht hebbt wi dichte Wulken, de veel Regen mit sik bringt, bi 12 bit 10 Graad. Morrn blifft dat jüst so wesselhaft. Dat gifft jümmers wedder Schuers, hier un dor ok mit Blitz un Dunnerslag. De Sünn kriegt wi blots mal kort to sehn. De Temperaturen liggt bi 13 bit 15 Graad. Middeweeken geiht dat eerst mit vele Wulken un Schuers los, man to´n Nomdag hen lockert dat op un de Sünn kummt mal dör, bi 14 bit 15 Graad. Dat weren de Narichten op Platt. Tohoopstellt hett se Sven Kuhnen. Trechtmaakt un vörleest vun Antje Kruppa.