Plattdeutsche Nachrichten Plattdüütsche Narichten vun'n 02. Oktober 2024

Israel draut mit Gegenslag för iranschen Raketenangreep

Tel Aviv: De iransche Raketenangreep op Israel hett woll wenig Schaadens achterlaten. De mehrsten vun rund 180 Raketen kunnt de israelsche Afwehrschirm Iron Dome affangen. Liekers blifft de Laag anspannt. Israels Premierminister Benjamin Netanjahu maakt en Gegenslag künnig. Unkloor bleev aver, wennehr Israel angrepen warrt. Irans Butenminister Abbas Araghschi verkloort, na Medienberichten, de iransche Militäroperatschoon is afsluten. De Iran warrt aver reageren, wenn Israel en Gegenslag maakt.

Studie to den Missbruuk in´t Bistum Ossenbrüggen warrt vörstellt

Ossenbrügge: Achterna dree Johren Arbeid stellt de Universität Ossenbrügge opstunns vör, wat bi dat Forschensprojekt to den sexuellen Missbruuk in dat kathoolsche Bistum Ossenbrügge rutsuert is. En Twuschenbericht weer al vör twee Johren rutgeven. De hett allerhand Verstööt vun de kathoolschen Kark in den Ümgang mit drapen Minschen faststellt. Achterna düsse Twuschenbericht, is de domalig Ossenbrügger Bischop Franz-Josef Bode ut sien Amt gahn.

Saneren vun Bremerhobens Stadthall drauht düer to warrn

Bremerhoben: Dat Saneren vun de marood Stadthall in Bremerhoben künnt opwenniger warrn as dacht. Gootachter hebbt in Deelen vun den Bo Asbest funnen. Informatschoon, de buten un binnen vörliggen, düden dorop hen. Of nu de veranslaan 40 Millioon Euro langen, is unseker. De Stadthallenbaas hett op Nafraag betnu nix seggt.

Eerste Lehrkräft för Plattdüütsch afsolveren Examen an de Uni Ollenborg

Ollenborg: An de Uni Ollenborg hebbt de eersten dree Lehrkräft för Plattdüütsch ehr Spraakzertifikaat kregen. Se schafft mit C1 en wiedergahn Spraakniveau. De Studiengang „Nedderdüütsch“ is vör een Johr losgahn. Bet dorhen kunnt de Spraak blots binnen dat Fach Germanistik studeert warrn.

Besapen Radfohrer föhrt Slingslang op de Autobahn

Emstek: In den Kreis Cloppenborg is en sprüttenduun Mann mit en Fohrrad op de A1 ünnerwegens weest. En poor Tüügen mellen bi de Polizei, dat he Slingslang op de Siedenspoor föhrt. De Beamten stoppden den 38-Johrigen ut Cappeln. Nu töövt en Ünnersöken op em, vunwegen he duun an den Straatenverkehr deel nahm hett.

Dat Weer

Un nu kiekt wi op dat Weer: In Möppen sünd dat 9 Graad, in Bremen 10 Graad un in Bremerhoben un Emm sünd dat opstunns 11 Graad. De Dag fangt mit Wulken un hier un dor Schuers an. An Namiddag trecken de Wulken af, dat warrt dröger un de Sünn lacht mal. In´n süüden Bremen wiederhen dicke Wulken, dat ganze bi 11 bet 14 Graad. In de Nacht mal mehr mal weniger Wulken, wenn blots korte Schuers. In Ostfreesland bet hen na de Elvmünnen süht man de Steerns funkeln. Dat Thermometer wiest us 11 Graad op de Eilannen un 8 bet 5 Graad in´t Binnenland. Dunnersdag lacht de Sünn un dat blifft dröög mit opstiegen Wulken bi 13 bet 15 Graad. Freedag geiht dat so wieder, wedder Sünnenschien mit en poor opstiegen Wulken bi 14 bet 16 Graad.

Dat weren de Plattdüütschen Narichten. Tohoopstellt vun Gabriele Intemann. Op Platt trechtmaakt un vörleest vun Martina Brünjes.