Plattdeutsche Nachrichten Plattdüütsche Narichten vun'n 4. Oktober 2024

Plattdüütsche Narichten 3. Oktober 2024

EU Kommischoon lett över Töll op E-Autos ut China afstimmen

Brüssel. De EU-Kommischon lett de EU-Staaten över Extra-Töll op E-Autos ut China afstimmen. Düütschland warrt nich dorför stimmen. Bunnskanzler Olaf Scholz hett in den Striet in de Koalitschon mit de Fuust op´n Disch haut un dat bestimmt. Kasseert weern kann de Extra-Toll af Anfang November. Kunkret geiht dat üm knapp acht Perzent för Tesla un goot 35 Perzent för Ünnernehmen, de nich mit de EU-Kommischon bi de Ünnersökens tosamen arbeid hebbt.

Israel fleegt noch mehr Angrepen in de Nacht

Tel Aviv. Israel hett noch mehr Angrepen op de Hisbollah un de Hamas flogen. In de Nacht wurren Exploschonen in´n Süüden vun de libanesisch Hauptsadt Beirut mellen. As en poor Medien vermellt, weer dat Teel en wichtige Liddmaat vun de Hisbollah-Miliz. Bavento geev dat en israelisch Luftangreep op Telen in dat Westjordenland. Na palestinensisch Angaven sünd tominnst 18 Minschen dootbleven.

Plaante Nattgas in Bruunsbüddel warrt schienbor dürer

Kiel. Dat plaante Nattgas-Terminal in dat schleswig-holsteenisch Bruunsbüddel warrt schienbor düütlich dürer as dat plant weer. Dat hebbt Naforschens vun den NDR an´t Licht brocht. Dorna stiegen de Kosten för den Bund op fast een Milliarde Euro. 200 Millionen Euro mehr as Wirtschaftsminister Robert Habek al in den Plaan för den Huushold för de tokamen Johr angeven hett. In Bruunsbüddel schall en feste Terminal boot weern. Bet nu gifft dat in Düütschland blots Terminals op dat Water. Ünner annern ok in Wilhelmshaben un Stood.

Bremisch Buernverband is tofreden mit de Oorn

Bremen. De Bremisch Buernverband is mit de Oorn in düsset Johr all tohoop tofreden. De Oornen sünd na dat natte Föhrjohr beter as se dacht harrn. Besünners de Melkbedrieven kieken to´n Oorndankfest an´n Sünndag op en gode Tiet torüch. De Sommer weer för dat Grönfoder vun de Derten de perfekte Mengelaasch ut Regen un Sünn, so de Viezpräsident vun den Bremisch Buernverband, Carsten Schnackenberg, to buten un binnen. Ok de Maissilos sünd dorna vull, liekers de Fodermais wegen to veel Water in den Bodden erst laat utseit weern kunn.

Unfall sorgt för dat Dichtmaken vun de B6 för en poor Stünnen

Syke. De Bunnsstraat söss weer in Hööchde Syke Hegenfelle na en Unfall in de Nacht över Stünnen dicht. An en Krüzung harr de 41 Johr old Fohrer vun en Lüttlaster bi dat Afbegen en LKW översehn. De Lüttlastfohrer as ok de 59 Johr old LKW Fohrer hebbt bi dat Tosamekrachen en beten wat afkregen. Wiel de Tank vun den LKW bi den Unfall opreten wurr un Diesel utlopen weer, muss ok en Deel vun de Eer neven de Straat utbaggert weern.

Dat Weer

Un nu noch en Blick op dat Weer: In Demorst negen, in Bremen-Mitt fief, in Bremerhaben thein un in Hooksiel sünd dat opstunns 12 Graad. Vundag fangt dat mit veel Sünnschien an. Af den Middag gifft da topstiegen Wulken, de to´n Avend wedder weg sünd. De Wind weiht en beten vun de Noordoosten bit Noorden Kant. Dat blifft dröög bi 14 bit 16 Graad. In de Nacht kann man de Steerns an´n Heven funkeln sehn. Dat kann ween, dat man viellicht Polarlicht sehn kann, wiel kien Wulken dor sünd. In´n Verloop dükert hier un dor Nevel op. Dat warrt frisch bi een bit söss Graad. Hier un dor is Frost an´n Bodden möglich. Morn fangt dat mit Nevel an. Denn schient wedder de Sünn. De opstiegen Wulken sünd to´n Avend weder weg. Dat blifft dröög bi 14 bit 15 Graad. Sünndag: Eerstmal Sünnschien. Af Namiddag Wulken un denn Regen bi 14 bit 16 Graad.

Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Markus Weise.