Plattdeutsche Nachrichten Plattdüütsche Narichten vun'n 8. Oktober 2024

De ne’e SPD-Generaalsekretär: Matthias Miersch

Berlin: In de SPD hett Matthias Miersch eerstmal dat Amt vun den Generaalsekretär övernahmen. Miersch is 55 Johr oolt un höört to de Linken bi de Sozialdemokraten. Kümmert hett he sik bet nu um Energie-, Klima- un Wirtschaftspolitik. De Bunnsvörstand un dat SPD-Präsidium hebbt to Miersch ja seggt, man he mutt noch op en Parteidag wählt warrn. Bet nu weer Kevin Kühnert Generaalsekretär vun de SPD ween. Güstern harr he anseggt: He is krank un geiht ut sien Amt rut.

Trüchdenken an Hamas-Överfall op Israel vör een Johr

Bremen: Wo dat akkraat een Johr her weer, dat de Hamas Israel angrepen harr, hebbt sik güstern Avend op den Bremer Marktplatz 450 Minschen versammelt. Börgermester Andreas Bovenschulte sä: De Stadt steiht heel un deel achter Israel. Man de Truer gellt för all, de dor lieden doot, ok för de Palästinensers. Vör de Börgerschaft hebbt se as Teken 101 Talglichter anbrennt. Se staht för de israelschen Geiseln, de jümmers noch in de Hand vun de Hamas sünd.

Mehr un mehr Rentners in Düütschland bruukt Sozialhölp

Berlin: In Düütschland bruukt mehr un mehr Rentners Geld vun de Sozialhölp. Dat vermellt de Ne’e Ossenbrügger Zeitung. Dat Statistische Bunnsamt weet: Meist 729.000 Minschen kriegt de Grundsekerung in’t Öller. Dat sünd sowat 37.000 mehr as verleden Johr, un meist 40 Perzent mehr as vör negen Johr. De Öllerssekerung köönt all de kriegen, de 67 Johr sünd oder öller un bi de dat Rentengeld för’t Leven nich langt.

Öllern in Düütschland leest de Kinner wedder mehr vör

Mainz: Kinner in Düütschland kriegt wedder mehr vörleest. Dat is bi en Studie vun de Stiftung Lesen rutkamen. Twee vun dree Öllern seggt: Se maakt dat en poormal de Week. Vör twee Johr weren dat noch söss Perzent weniger. Man ok 18 Perzent vun de Öllern hebbt seggt, se leest nie wat vör, bi Kinner, de noch nich acht sünd. För de Repräsentativ-Studie hebbt se mehr as 800 Öllern in Düütschland utfraagt.

Florida maakt sik praat för den neechsten Hurrikan

Miami: In den US-Bunnsstaat Florida richt se sik op den neechsten Hurrikan in. „Milton“ hett vör de Westküst toleggt un is mit meist 300 Stunnenkilometer unnerwegens. Morgen warrt de Storm woll an Land kamen. De Behörden seggt: De Gefohr is gewaltig. Dat is eerst annerthalv Weken her, dor harr de Warvelstorm „Helene“ in de USA veel tweireten, mehr as 200 Minschen weren to Dode kamen.

Dat Weer

Un woans süht dat mit dat Weer umto ut? Opstunns hebbt wi in Bremen un Cuxhaven 14 Graad, in Bremerhaven sünd dat 15 un in Leer 16 Graad. Vundaag: Noch an’n Vörmiddag treckt de Regen över de Noordsee un de Elv af. Denn lockert de Wulken pö a pö op. An’n Namiddag un Avend ööstlich vun de Werser mal mehr, mal weniger Wulken un meisttiets dröög. Na’t Emsland un Oostfreesland to blifft de Sunn wat länger stahn. Dat Thermometer krabbelt op 16 bet 19 Graad. De Wind dorto weiht flau oder en beten mehr, vör allen an de See. He dreiht vun de süüdoosten op de süüdwesten Kant. Gegen Avend weniger Wind. Tokamen Nacht: Eerst blots en poor Wulken un dröög. Na Middernacht treckt vun Holland her mehr dichte Wulken rin, un de smiet ok en beten Regen daal, vun Oostfreesland bet na dat Ossenbrügger Land. Noordööstlich dorvun blifft dat dröög. Bi 13 bet 11 Graad. Morgen: Kloor mehr Wulken as Sunnschien. Över Dag treckt de een oder anner Schuer dör, ok mal mit Blitz un Dunnerslag. Bi 16 bet 17 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.