Plattdeutsche Nachrichten Plattdüütsche Narichten vun'n 9. Oktober 2024

Söök na nejen Termin för Biden-Besöök in Düütschland

Washington. De Regerens in den USA un Düütschland söökt na en nejen Termin för den Düütschlandbesöök, de afseggt wurr, vun US-Präsident Biden. De harr sien egentlich för morgen plante Reis in de Bunnsrepublik wegen den Hurrikan „Milton“ verschoven. De Storm hett middewiel wedder de höchste Nummer anlangt. Fachlüüd wohrschauen vör bannig grode Schadens, woll so in Florida, wenn he dor op dat Land dröppt. Of de Besöök vun Biden in Düütschland noch vör dat Enn vun sien Amtstiet in´n Januar nahaalt weern kann, is noch nich kloor.

Verkehrsminister snackt över rünnerkamen Infrastruktur

Duisburg. De Verkehrsminister vun de Bunnslänner kamen vundag to ehr Harvstdrapen tosamen. Bi dat Drapen geiht dat besünners üm den Tostand vun de Straten un Brüchen in Düütschland. De Länner verlangen vun de Bunnsregerung en Extrageld in Milliardenhöchde optoleggen, dat in dat to´n Deel rünnerkamen Verkehrsnett rinsteken weern schall. Achtergrund is de mitmal Tohoopfall vun Delen vun de Carolabrüch in Dresden vör knapp een Maand.

Fiefte Johrsdag na Anslag in Halle

Halle an de Saale. An´n fieften Johrsdag vun den Anslag op de Synagoge röppt Bunnsbinnenministersch Nancy Faeser to´n Kampf mit all Kraft gegen Rechtsextremismus op. De SPD-Politikersche see in Berlin, de Rechtsstaat mutt son mörderisch Gewalt mit all Middels bemöten. Vundag vör fief Johr harr en Rechtsextremist versöökt, in de Synagoge in Halle rintokamen – dat hett nich klappt. He maak later twee Passanten doot. To de Gedenkveranstalten vundag warrt ok Bunnspräsident Frank-Walter Steinmeier kamen.

Bunnsregeren leggt Wirtschaftsutsicht vör

Berlin. De Bunnsregeren leggt vundag ehr Konjunkturutsicht för de Wirtschaft op den Disch. Dorna warrt för düsset Johr dormit rekend, dat dat Bruttobinnenlandprodukt üm 0,2 Perzent torüch geiht. Wirtschaftsminister Habeck will de Tallen an´n Namiddag so richtig vörstellen. Dat Düütschland en wackelige Wirtschaft ok düsset Johr nich ut den Weg gahn kann, weer al vörher bekannt wurren. Toeerst gung de Bunnsregeren dorvun ut, dat de Wirtschaft üm 0,3 Perzent in Gang kaamt.

Klinikum Reinkenheide in Bremerhaben richt noch en Statschoon för jüst boren Kinner in

Bremerhaben. Dat Klinikum Reinkenheide richt för en Tiet lang noch en Statschoon för Fröh- un jüst boren Kinner in. Na Angaven vun en Spreker stahn erstmal veer Bedden praat. Noch mehr könen dorto kamen. Dat is wegen en Kiem-Fund op de Statschoon bet nu an´t verleden Wekeneen. Dorophen wurr dor en Opnahmstopp anornt. Lege Krankheiten wurren bet nu man nich faststellt.

Dat Weer

Un nu noch en Blick op dat Weer: In Hooksiel, in Bremen-Mitt, in Bremerhaben 13 un in Emden sünd dat opstunns 14 Graad. Vundag fangt de Dag mit Wulken, en beten Sünnschien un enkelten Regenschuern an. An´n Namiddag un Avend hebbt de Wulken denn de böverste Hand. Vun dat Emsland un Ossenbrügger Land fangt dat düchtig an to pladdern. De Wind weiht af un an in Maten. Dat Thermometer wiest 15 bit 17 Graad. In de Nacht is de Heven vull mit Wulken. In´n süüdoosten vun de Streek Graafschop Bentheim – Oolland gifft dat lange un deegte Regenschuer. In´n Noordwesten dorvun gifft dat enkelte Schuer un dat blifft länger dröög. De Temperaturen liggen bi negen bit 12 Graad. Morn sünd vele dichte Wulken an´n Heven un dat gifft to´n Deel lange Regenschuer. Blitz un Donnerslag könen ok dorbi ween. 13 bit 14 Graad stahn denn op dat Thermometer.

Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Markus Weise.