Plattdeutsche Nachrichten Plattdüütsche Narichten vun'n 11. Oktober 2024

Selenskyj in Düütschland

Berlin: De ukrainsche Präsident Selenskyj kummt hüüt na Berlin. An’n Namiddag ward he Bunnskanzler Scholz drapen. Op sien Tour dör Europa warvt Selenskyj üm mehr Stütt un Stöhn för sien Land in’n Krieg gegen Russland un weer dorüm güstern al in London, Paris un Rom. Butenpolitikers un Ministers för’t Verdeffendeern vun de Grönen, FDP un Union sett sik hüüt in Interviews dorför in, datt betere düütsche Wapensysteme in de Ukraine levert ward.

Oprüümarbeiden na Warvelstorm „Milton“

Tampa: Nadat de Warvelstorm „Milton“ över den US-Bunnsstaat Florida henwegtrucken is, fangt se dor nu mit dat Oprümen an. Wo groot de Schaden is, ward eerst pö a pö düütlich. Tominnst ölben Minschen sünd na Utkunft vun de Behörden dorbi dootbleven. Millionen Huusholden sünd ahn Stroom, un dusende vun Minschen hebbt keen Drinkwater. As de Gouverneur von Florida Ron de Santis säe, harr dat aver noch leger kamen könen. De Warvelstorm weer mit Windgeschwindigkeiten vun bet to 193 Kilometers per Stünn ünnerwegens.

Nee’er GSG9-Standoort in Sleswig-Holsteen

Neestadt: De Polizei-Elitetrupp GSG9 schall en wieteren Standoort an de Oostseeküst in Sleswig-Holsteen kriegen. Bunnsbinnenministersche Faeser hett na Informatschonen vun dat ARD Hauptstadtstudio in düsse Week den Startschuss dorför geven. Düütschland will sik dormit gegen de wassen Gefohr op See rüsten un so to’n Bispill Pipelines schützen oder bi Terrorattacken op Scheep in’n Noorden gauer vör Oort ween.

Reders wegen Verkopen vun Schrottschipp anklaagt

Rendsborg: To’n eersten Mal in Düütschland mööt twee Reders vör Gericht. Se hebbt woll en Schrottschipp gegen dat Gesetz na Süüdasien bröcht. Na Informatschonen vun NDR un „Süüddüütsche Zeitung“ ward de Fall vun dat düütsche Frachtschipp „Westerhamm“ in’t tokamen Fröhjohr vör dat Amtsgericht Rendsborg verhannelt. De beiden Anklaagten ward vörsmeten, datt se gegen dat Affallrecht hannelt hebbt, denn Schrottscheep gellt na düütschen un europääschen Recht as Sondermüll.

Fredensnobelpriesdregers ward bekanntgeven

Oslo: In en halv Stünn ward dat Norweg’sche Nobelkomitee bekanntmaken, wokeen in dütt Johr den Fredensnobelpries kriggt. Meist 200 Personen un üm un bi 90 Organisatschonen staht düttmol op de List. Wokeen düsse Lüüd sünd, hollt se aver traditschonell geheem. In’t verleden Johr hett de iraansche Froenrechtlersche Narges Mohammadi den Fredensnobelpries kregen.

Dat Weer

Un nu en Blick op dat Weer: In Leer 5, in Bremen 6, in Deefholt 7 un in Bremerhaben un Emmen sünd dat opstünns 8 Graad. Hüüt gifft dat in’n Süüden vun Bremen en fründlich un meisttiets dröög Gemengsel ut Sünnschien un lockere Wulken. To de Noordsee hen gifft dat’n poor mehr Wulken, de ok’n poor Schuers mit sik bringt, de ok in’t Binnenland wietertreckt. De Temperaturen liggt bi 12 bet 14 Graad. In de Nacht löst sik de Wulken meist op. In’t Emsland blifft’n poor Wulken na, de aver keen Regen bringt. Wo keen Wind weiht, kann sik Daak billen, anners blifft dat klaar. An de Küst fallt dat Thermometer op 9 bet 6 Graad, in’t Binnenland op 5 bet 1 Graad. Morgen geiht dat mit wenig Wulken un veel Sünnschien in den Dag. Vun Süüden her schuuvt sik aver dünne Wulken vör de Sünn, un ok vun’t Emsland treckt an’n Namiddag mehr Wulken op. Dat blifft aver dröög bi 12 bet 14 Graad. An’n Sünndag dichte Wulken mit Regenschuers, darna lockert dat op mit’n beten Sünnschien bi 12 bet 14 Graad.

Dat weern de Narichten op platt. Tohoopstellt hett se Birgit Sagemann. Op Platt trechtmaakt un vörleest vun Marc Gelhart.