Plattdeutsche Nachrichten Plattdüütsche Narichten vun'n 17. April 2024

Butenministersch Baerbock för Drepen in Israel

Tel Aviv: Bunnsbutenministersch Annalena Baerbock dröppt hüüt Vörmiddag Ministerpräsident Benjamin Netanjahu un annere böverste Politiker in Israel. Bi dat Drepen schall dat dorüm gahn, wiedere Eskalatschoon, achterna den iranschen Angreep verleden Wekenenn, aftowennen. Israel hett meist künnig maakt, op de Attack to reageern.

Woso dat bi de Kopenhaager Böörs brennt hett is noch nich kloor

Kopenhagen: De däänsche Polizei versöcht wieder ruttofinnen wat achter dat Füer vun de historische Böörs stickt. Dat Huus is güstern in Flammen opgahn, groote Deele sünd meist twei. In dat Böörsenhuus sitt de dänsche Hannelskaamer, bavento is dor en groot Kunstsammlung. De Hannelskaamer hett künnig maakt, de Böörs wedder optoboen.

Bremerhobens Stadtverordneten sünd bang üm Stimmrecht

Bremerhoben: Twee Stadtverordneten sünd bang üm ehre Rechte as Afordnete. Dor achter stickt en plaante Ännerung vun de Geschäftsornen vun dat Bremerhobener Stadtparlament. Dorno harrn enkelte Afornete, de to kien Fraktschoon or Grupp tohöört, kien Stimmrecht mehr in Utschüss. De Enkeltafordneten Claudia Baltrusch un Bianca Ax verlangt vun Oberbörgermeister Melf Grantz nu gegen düsse nee´en Regeln wat to seggen.

24-johriger in Bremen wegen Moord anklaagt

Bremen: Siet Klock negen steiht en 24-johriger wegen Moord vör dat Landgericht. De Anklaagte hett woll in den Stadtdeel Walle mit en Kökenmess op sien een Johr jünger Süster insteken. Dor achter stickt, dat de Oort wo se leevt hett, nich passlich för sien Weltbild is, maakt de Anklaag künnig. De Froo is noch dor sturven, wo dat passert is. Ehr Broder, de dat woll doon hett, hett achterna sülvst de Polizei ropen.

Fischtown Pinguins starten in de Finaalserien

Bremerhoben: För de Fischtown Pinguins geiht dat hüüt Avend los mit de Finaalserie in den Kamp üm de düütsche Ieshockey-Meisterschop. Üm Klock halvig acht hebbt de Bremerhobener de Iesboren Berlin to Gast. Speelt warrt tokaamen Daag in en „Best-of-Seven-Serie“. Meent is dormit: De Kru, de as eerste veer mal de Nees vörn hett, is de nee´e düütsche Meister.

Dat Weer

Un nu kiekt wi op dat Weer: In Möppen hebbt wi 5 Graad, in Emm 6 Graad, in Bremen 7 Graad un in Bremerhoben sünd dat opstunns 9 Graad. Hüüt gifft dat en Wessel ut Wulken un Sünn, man de Sünn lacht dorbi meist mehr as güstern. Hier un dor sünd en poor Schuers ünnerwegens. Övern Namiddag blifft dat an de Nordsee meist dröög. De Wind weiht flau bet in Maaten vun de noordwesten bet noorden Kant un dat den bi 9 Graad op de Eilannen un 10 bet 12 Graad in´t Binnenland. In de Nacht blinkern ok mal de Steerns twuschen de Wulken, verenkelte Schuer sünd wiederhen mööglich. In de tweeten Nachthälft blifft dat meist dröög un wi köönt länger mal de Steerns bi dat blinkern tokieken. Un dat denn bi 7 Graad op de Eilannen un plus 6 bet minus 1 Graad in´t Binnenland. Morgen lacht eerst de Sünn, övern Vörmiddag drängeln sik jümmer wedder Wulken dorvör, opletzt deelen sik Sünn un Wulken den Heven. Enkelte Schuers sünd ok wedder dorbi. Dat Thermometer wiest us 9 Graad op de Eilannen un 10 bet 12 Graad in´t Binnenland.

Dat weren de Plattdüütschen Narichten. Tohoopstellt vun Justus Wilke. Op Platt trechtmaakt un vörleest vun Martina Brünjes.